Европэм футболымкIэ изэнэкъокъу хэлэжьэрэ командэхэм финалныкъом хэхьэрэ ешIэгъухэр аухыгъэх.

Италиер Испанием зыдешIэм, зэIукIэгъу уахътэр ыкIи такъикъ 30-у къафыхагъэхъуагъэр 1:1-у аухыгъ. ПенальтикIэ 4:2-у Италием текIоныгъэр къыдихыгъ.

Англиер Данием зыдешIэм, та­къикъ 90-м ыуж пчъагъэр 1:1-у щытыгъ. Командэхэм та­къикъ 30 къазыфыхагъахъом, Англием ихэшыпыкIыгъэ командэ пенальтикIэ Iэгуаор Данием икъэлапчъэ дидзагъ, 2:1-у те­кIоныгъэр къыдихыгъ.

Дышъэм икъыдэхын фэгъэ­хьыгъэ кIэух зэIукIэгъум Анг­лиемрэ Италиемрэ щызэнэкъо­къущтых. ЕшIэгъур бэдзэогъум и 11-м зэ­хащэщт.

Зэфэхьысыжьхэр

Зэнэкъокъур амыухызэ зэ­фэ­хьысыжьхэу тшIыхэрэм къащы­хэтэгъэщых Германиер, дунаим ичемпионэу Франциер, Европэм ичемпионэу

Португалиер, Бельгиер, фэшъхьаф командэ лъэшхэр медальхэр зыхьыщтхэм зэрахэмыфэщтхэр.

2016-рэ илъэсым Португалием Европэм изэнэкъокъу апэрэ чIы­пIэр къызыщыдехым, хэгъэгум мэфэкI мафэкIэ щыхагъэунэфыкIыгъагъ.

Урысыем ихэшыпыкIыгъэ коман­дэ пэшIорыгъэшъ ешIэгъу­хэм текIоныгъэр зэ къыщыди-хыгъ. Финляндием 1:0-у дешIагъ. Бельгием, Данием афэдэ командэ лъэшхэм Урысыем иешIакIохэр атекIонхэм непэ фэхьазырхэп — зэнэкъокъум ар къыушы­хьатыгъ.

Урысыем ихэшыпыкIыгъэ футбол командэ итренер шъхьаIэу щытыгъэ Станислав Черчесовым мы уахътэм щыкIагъэу фа­лъэгъурэр макIэп. Европэм ыуж дунэе зэнэкъокъур зэрэщыIэщтыр къыдэтлъытэмэ, сыд фэдэ хэкIыпIэхэр пащэхэм къагъотыщтха?