Адыгеим щыщэу, Росгвардием иофи­церэу Александр Ланиным хэгъэгум каратэмкIэ итурнир дышъэр къыщихьыгъ.

Росгвардием и ГъэIорышIапIэ икъутамэу Адыгэ Республикэм щыIэм къулыкъур щызыхьырэ лейтенантэу Александр Ланиныр Краснодар краим икъалэу Темрыкъо щыкIогъэ зэнэкъокъум чанэу хэлэжьагъ.

Урысыем зэкIэ ишъолъырхэм къарыкIыгъэ бэнакIохэр 600 фэдиз хъущтыгъэх. Шъхьэзэкъо зэнэкъокъухэр къекIокIыгъуи 3-мэ ащыкIуагъэх. Килограмм 90-м нэс къэзыщэчыхэрэм якуп А. Ланиным икъулай къыщигъэлъэгъуагъ. Батырым апэрэ чIыпIэр къыдихи, Урысыем спортымкIэ имастер хъунымкIэ шапхъэхэр ри­гъэкъугъэх.

Зэнэкъокъум исудья шъхьаIэу, Урысыем каратэмкIэ и Федерацие ипрезидент иапэрэ гуадзэу Александр Сосниныр полицием илейтенантэу Александр Ланиным фэгушIуагъ, дышъэ медалыр, Щытхъу тхылъыр ритыжьыгъэх.

Адыгеим щыщхэу зэнэкъокъум хэлэжьагъэхэр А. Ла­ниным фэгушIуагъэх, адыгэ быракъыр зэхахьэм щагъэ­быбэтагъ, зэхэтхэу нэпэеплъ сурэтхэр атырахыгъэх.