«Зэкъошныгъэм» имафэхэр гумэкIыгъох
Мыекъопэ футбол клубэу «Зэкъошныгъэм» 2021 — 2022-рэ илъэс зэнэкъокъум зыфегъэхьазыры.
— Мэкъуогъум и 21-м клубым иешIакIохэр тыугъоижьыгъэх, ныбджэгъу зэIукIэгъухэр Краснодар, нэмыкI къалэхэм якомандэхэм адытиIагъэх, — къытиIуагъ клубэу «Зэкъошныгъэм» ипащэу ХъокIо Къэплъан. — Аужырэ илъэсхэм тренер шъхьаIэу Iоф зышIэщтыгъэ Ешыгоо Сэфэрбый иIэнатIэ IукIыжьыгъ. Тренерэу Максим Васильченкэр япащэу тиешIакIохэм яIэпэIэсэныгъэ хагъахъо. Тренер шъхьаIэр агъэнэфагъэгоп.
Бэдзэогъум и 18-м купэу «Къыблэм» илъэс зэнэкъокъур щырагъэжьэнэу щыт. УплъэкIун ешIэгъухэр «Зэкъошныгъэм» зэхищэщтых. Клубым аштэщтхэр, тренер шъхьаIэу иIэщтыр мы мафэхэм къыхахыщтых.
2020-2021-рэ илъэс зэнэкъокъум «Зэкъошныгъэм» я 14-рэ чIыпIэр къыдихыгъ, купым командэ 17 щешIагъэр. ИлъэсыкIэ ешIэгъум «Зэкъошныгъэм» пшъэрылъэу зыфишIыжьыхэрэм, инеущрэ мафэ зыфэдэщтым, нэмыкIхэм афэгъэхьыгъэхэр «Адыгэ макъэм» шIэхэу къыщыхэтыутыщтых.