ШIыкIэшIур цIыфым къетэжьы
Тарихъ-лъэпкъ музееу Джамбэчые дэтым иобщественнэ IофышIэу ЛIышэ Ахьмэд иIэпэIэсэныгъэ Урысыем, IэкIыб хэгъэгухэм ащашIэ.
Къыблэ лъэныкъомкIэ Мыекъуапэ идэхьапIэ щыкIогъэ зэхахьэм республикэм илъэпкъ IэпэIасэхэр хэлэжьагъэх. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ Iофтхьабзэхэм лъэпкъ шIэжьым ехьылIэгъэ гупшысэхэр ащыпхыращых.
ЛIышэ Ахьмэд пхъэм хишIыкIыгъэ пкъыгъохэр гъэшIэгъонэу ыгъэпсыгъэх. Адыгэ быракъым щыщ щэбзищыр, ижъырэ убых унагъом ищагу, унэу ащ дэтым ятеплъэхэр, ижъырэ адыгэ музыкальнэ Iэмэ-псымэу шыкIэпщынэр, адыгэ хьакIэщыр, унагъом щагъэфедэхэрэ хьакъу- шыкъухэр, адыгэ Iанэр, адыгэ нысащэ пэпчъ къыщаштэрэ пхъэкIычыр, нэмыкIхэри лъэгъупхъэх.
Ахьмэд къызщытхъужьырэп, жэбзэ зэгъэфагъэкIэ иIофшIагъэ къеIуатэ. ПщэрыхьакIом ищыкIэгъэ Iэмэ-псымэхэм еплъыкIэу афыриIэри лъэпкъ шIэжьым къыщежьэ. Бзылъфыгъэм Iэрыфэгъу фэхъухэрэ бэлагъыр, тхьацуфыр, фэшъхьафхэри ышIыхэ зыхъукIэ, бысымгуащэм иIофшIэн ыгъэпсынкIэ шIоигъу.
IэпэIасэм пхъэм хишIыкIыщт пкъыгъом егупшысэзэ, пхъэ лъэпкъэу ыгъэфедэщтым ынаIэ тыредзэ. ПхъэкIычыр, шыкIэпщынэр музыкальнэ Iэмэ-псымэх, ау пхъэу ыгъэфедэрэр зы чъыгэп къызыхихырэр.
ШIухьафтын сурэтхэр зыми фэдэхэп, IэпэIасэм игупшысэхэм къапкъырэкIых. КъэшъуакIор, къамэр, нэмыкIхэри уяплъынкIэ дахэх. Къыуатыгъэ шIухьафтыныр бгъэлъапIэ зыхъукIэ, ар зиIэшIагъэр зэбгъашIэ пшIоигъощт.
Лъапсэ зимыIэ чъыгымрэ шъэогъу зимыIэ цIыфымрэ зэдгъапшэхэу къыхэкIы. Лъапсэр сыдигъуи пытэн фаеу А. ЛIышэм елъытэ. Пхъэм хишIыкIырэ лъэпкъ пкъыгъор зэрэдахэм дакIоу, ипытагъи мэхьэнэ ин реты.
Музеим ифэмэ-бжьымэ зытырихьэрэ къэгъэлъэгъонхэри зэхахьэм къыщыхагъэщыгъэх. ИлъэсыбэкIэ узэкIэIэбэжьмэ, патефонхэмкIэ адыгэ орэдхэм ядэIущтыгъэх. Ижъырэ лъэпкъ орэдхэр А. ЛIышэм патефонымкIэ ыгъэжъынчыгъэх, искусствэр зышIогъэшIэгъонхэр ягуапэу едэIугъэх.
Къэгъэлъэгъонхэр
Лъэпкъ IэшIагъэхэм апылъхэм яIофшIапIэ ипащэу ПIатIыкъо Айдэмыр, искусствэм иIэпэIасэхэу Абрэдж Гощэфыжь, Боджэкъо Бэлэ, Теуцожь Фатимэ яIофшIагъэхэр зэIукIэгъум къыщагъэлъэгъуагъэх. ПIатIыкъо Айдэмыр музыкальнэ Iэмэ-псымэу пхъэкIычым къытегущыIагъ. Пщынаомрэ пхъэкIычаомрэ зэгъусэхэу джэгум е нэмыкI зэхахьэм хэлажьэхэ зыхъукIэ зэгурыIоныгъэу ахэлъыр къыхигъэщыгъ. ПхъэкIычыр зэрэбгъэфедэщт шIыкIэм иеплъыкIэхэр къыриIолIагъэх.
Адыгэхэм ядышъэидэ, лъэпкъ тхыпхъэхэм яхьылIагъэу Теуцожь Фатимэ узыIэпищэу къыIотагъэр макIэп.
ЗекIо Iофхэм апылъхэмрэ лъэпкъ IэпэIасэхэмрэ зэрэзэIукIэхэрэм шIуагъэу къытырэр зэфахьысыжьыгъ. ЗекIонымкIэ республикэ проектым Iоф дэзышIэрэ Юлия Пилипайтите Адыгеим икъушъхьэхэм жьыр зэращыкъабзэм, псауныгъэм игъэпытэн зэкIэми зэдыряIофэу зэрэщытым иеплъыкIэхэр къариIолIагъэх.
Адыгэ Республикэм культурэмкIэ и Министерствэ, Мыекъуапэ иадминистрацие культурэмкIэ и ГъэIорышIапIэ, нэмыкIхэм зэхащэгъэ Iофтхьабзэм чанэу хэлэжьагъэхэм афэгушIуагъэх. Лъэпкъ IэпэIасэу ЛIышэ Ахьмэд ышIыгъэ пхъэкIычхэр, унагъом ищыкIэгъэ пкъыгъохэр шIухьафтын афашIыгъэх.
ЛIышэ Ахьмэд икъоджэгъухэу, иIахьылхэу, искусствэр зышIогъэшIэгъонхэу зэIукIэгъум хэлэжьагъэхэм «тхьашъуегъэпсэу» ариIожьыгъ. А. ЛIышэм иIофшIагъэхэр Москва, Мыекъуапэ, фестиваль-зэнэкъокъухэм къащагъэлъагъохэу пчъагъэрэ къыхэкIыгъ. Республикэ общественнэ движениеу «Адыгэ Хасэм» и Хэсашъхьэ хэт. Адыгэ хьалыжъом и Мафэ бэмышIэу Сырыфыбг зыщызэхащэм Ахьмэд хэлэжьагъ, лъэпкъ IэшIагъэхэм якъэгъэлъэгъон зэхищи, къэбархэр къафиIотагъ. Ростов хэкум, Краснодар краим, Адыгеим, нэмыкIхэм ащыпсэухэрэм IэпэIасэм къафиIотагъэр зырагъэпшэщтыр ашIагъэп. Щысэ тезыхы зышIоигъохэр къеупчIыгъэх, телефонкIэ къыфытеощтхэу къыраIуагъ.
Сахьидэкъо Нурбый.