Мыекъопэ гандбол клубэу «АГУ-Адыифым» ипащэу Къудайнэт Мэджыдэ гущыIэгъу тызыфэхъум, гъэзетеджэхэм яупчIэхэр къыдэтлъытагъэх.

Хэгъэгум игандбол клубхэу суперлигэм хэтхэм 2020 – 2021-рэ илъэс ешIэгъур аухыгъ. Зэфэхьысыжьхэр тшIыхэзэ, тимурадхэм тягупшысэ, — къеIуатэ Къудайнэт Мэджыдэ.

— Клубэу «Адыифым» суперлигэм я 11-рэ чIыпIэр къы­щыдихыгъ. Апшъэрэ купым щешIэрэ «Адыиф-2-м» я 9-рэ чIыпIэр къыхьыгъ.

— Суперлигэм клуб 12 хэтыр, апшъэрэ купым 19. «Адыифым» иешIакIэ тигъэрэзагъэп. «Уфа- Алисэм» кIэух зэнэкъокъум тIогъогогъо тызыдешIэм, зы Iэгуа­окIэ тапэ ишъыгъ. Ащ къыхэкIэу я 11-рэ чIыпIэм тыфэбэнэн фаеу хъугъэ, «Лучым» тытекIуагъ.

— 2021 – 2022-рэ илъэс ешIэгъум зыфэшъогъэхьазыры. Клубым хэкIыжьыгъэхэм, кIэу къы­хэхьагъэхэм гъэзетеджэхэр къакIэупчIэх.

— ЗэхъокIыныгъэу тиIэр макIэп. Галина Измайловар, Елена Стрельцовар, Анастасия Серадскаяр, Валерия Логвиненкэр, Мария Кучеренкэр, къэ­лэпчъэIутэу Екатерина Толмачевар «Адыифым» хэкIыжьыгъэх, Юлия Олейник сабый къыфэ­хъущт, шIэхэу «Адыифым» щешIэщтэп.

— КIэу къыхэхьагъэхэм ацIэ­хэр къытфепIохэ тшIоигъу.

— Виктория Мещеряковар сэмэгубгъумкIэ гупчэм щешIэ, Анна Красновар джабгъумкIэ ыпэкIэ щешIэ. «Уфа-Алисэм» пшъашъэхэр къыхэтщыгъэх. Линейнэу Александра Колодягинар Волгоград икомандэу «Динамо-Синарэм» щешIэщтыгъ. Опыт зиIэ къэлэпчъэIутэу Дарья Ламзинар «Ставропольем» къыхэтщыгъ.

— «Адыиф-2-м» укъытегущыIагъэгоп.

— Ащ щешIэхэрэр тинэплъэгъу итых. Гупчэм иджабгъу лъэныкъо дэгъоу зыкъыщигъэлъэгъуагъ, Iэгуаор къэлапчъэм бэрэ дедзэ Алина Казанджян. «Адыифым» ар тштагъэ, нэмыкI ешIакIохэм яIэпэIэсэныгъэ зэрэхагъахъорэм тылъэплъэ.

— Мэджыд, «Адыифым» тегъэгугъэ, ау тренер шъхьаIэу иIэм тыкъыкIэупчIэнэу тыфай.

— Адыгэ Республикэм изаслуженнэ тренерэу Никита Голуб «Адыифым» хэкIыжьыгъ. «Кубань» Краснодар итренер шъхьа­Iэу агъэнэфагъ. Урысыем изаслуженнэ тренерэу, «Адыиф-2-м» аужырэ илъэсым итренер шъхьа­Iэу Iоф зышIэгъэ Александр Реввэ «Адыифым» итренер шъхьаI. «Адыиф-2-м» итренер шъхьаIэр Яна Усковар ары.

— Яна Усковар гандболым дэгъоу щашIэ, Александр Реввэ ишъхьэгъус.

— Олимпиадэ джэгунхэм 2008-рэ илъэсым Яна Усковам тыжьыныр къащыдихыгъ, дунаим изэ­нэкъокъу хагъэунэфыкIырэ чIыпIэр къыщихьыгъ. Адыгэ къэралыгъо университетым щеджагъ. Тренерэу тиспорт еджапIэ Iоф щишIэщтыгъ.

Суперлигэм изэ­хъокIыныгъэхэр

— Клуб 12 суперлигэм хэт. КупитIоу гощыгъэхэ зэрэхъугъэм ишIуагъэ къэкIощта?

— Апэ ит команди 6-р Мые­къуапэ щешIэщтэп. Хэгъэгум иклуб анахь дэгъухэм «Адыифыр» янэкъокъун ылъэкIыщтэп. Ощ нахь лъэшым удешIэзэ бэмэ зафэогъасэ. Гандболым пылъхэм Урысыем испортсменкэ цIэ­рыIохэр Мыекъуапэ щалъэгъухэ ашIоигъу.

— Зэнэкъокъур сыдэущтэу кIощта?

— КъекIокIыгъуи 4-м командэхэр щызэдешIэщтых.

— Апшъэрэ купым хэтхэм сыда къарыкIощтыр?

— Клуб 12 зэдешIэщт, къе­кIокIыгъуи 2 яIэщт. ЗэхъокIыныгъэхэм шIуагъэ къатыщтми тшIэ­рэп, уахътэм къыгъэлъэгъощт…

— Бэдзэогъум и 1-м зыгъэ­псэфыгъо уахътэр кIэухым фэкIуагъ.

— Апэрэ мафэхэм псауны­гъэм игъэпытэн, кIуачIэм хэгъэхъогъэ­ным тренерхэм Iоф дашIэщт. Адыгеим жьыр щыкъабз, къушъхьэхэр къытпэгъунэгъух. Зэнэкъо­къум зыфагъэхьазырыным фэшI тиешIакIохэм амалышIухэр яIэх.

— «Адыиф-2-м» къыхэкIыгъэ­хэ Алина Морозовам, Ангелина Куцеваловам, нэмыкIхэм тагъэ­гушIо. «Адыифыр» ауж къинэ­хэрэм къахэкIыжьыщта?

— Купэу тызхэтым апэрэ чIыпIэр къыщыдэхыгъэным тыфэбэнэщт. ЕшIэкIо дэгъу хъун зылъэкIыщтхэр «Адыиф-2-м» къыхэкIыщтхэу тэгугъэ. Адыгеим щагъэсэгъэ пшъашъэхэр ары нахьыбэ хъухэу клуб шъхьаIэм щешIэнхэ фаер.

Егъэжьэгъур

— Суперлигэм сыдигъуа зэ­нэкъокъур зыщырагъэжьэщтыр?

— Iоныгъом и 11-м «Луч» Москва тыдешIэнэу щыт. «Адыиф-2-м» Iоныгъом и 18-м апэрэ ешIэгъур иIэщт.

— МэзитIум нахьыбэ уахътэ щыI. ЕшIэгъу шъуиIэщтба?

— «Губернаторым и Кубок» Астрахань щыкIощт. А зэнэкъо­къум тыхэлэжьэщт, нэмыкI ешIэгъухэри тиIэщтых.

— ТизэдэгущыIэгъу кIэухым фэкIуагъ. Сыда джыри къытапIо пшIоигъор?

— Адыгэ Республикэм и ЛIышъхьэу КъумпIыл Мурат, Правительствэм тафэраз. Спорт псэолъэ зэтегъэпсыхьагъэхэр тиIэх. Спорт унэшхохэу Кобл Якъубэ ыцIэ зыхьырэм, «Ошъуте­нэм» клубым иешIэгъухэр ащэкIох. ЕджэпIэ-зыгъэсапIэхэр шэпхъэ лъагэхэм адештэх. Адыгеим щапIугъэ пшъашъэхэр клуб шъхьаIэм щешIэнхэм фэдгъэхьазырыщтых.

— Олимпиадэ джэгунхэм, дунаим дышъэр къащызыхьыгъэхэр Мыекъопэ еджапIэу Джэнчэтэ СултIан ыцIэ зыхьырэм щагъэсагъэх.

— Тарихъым инэкIубгъохэр тщыгъупшэхэрэп. КъытфэгумэкIыхэрэр зэрэдгъэгушIощтхэм тыпылъыщт.

— Шъуимурадхэр къыжъудэхъунхэу шъуфэтэIо.

— Тхьауегъэпсэу.

ЕмтIылъ Нурбый.