«Мыекъуапэ инэфылъэхэр» мэшIэтых
КIэлэцIыкIу къэшъокIо ансамблэу «Мыекъуапэ инэфылъэхэр» илъэс 30 хъугъэх.
Хэгъэгу ыкIи дунэе фестиваль-зэнэкъокъухэм щытхъуцIэхэр къащыдэзыхыгъэ «Мыекъуапэ инэфылъэхэм» яюбилей пчыхьэзэхэхьитIу «Налмэсым» и Унэ щыкIуагъ.
Адыгэ Республикэм и ЛIышъхьэу КъумпIыл Мурат «Мыекъуапэ инэфылъэхэм» къафэгушIуагъ. Культурэм, искусствэм хэхъоныгъэ ашIыным яIахь зэрэхашIыхьэрэм фэшI рэзэныгъэ тхылъыр ансамблэ цIэрыIом фигъэшъошагъ.
КъыфэгушIуагъэх
Адыгэ Республикэм культурэмкэ иминистрэ игуадзэу Кушъу Светланэ, Мыекъуапэ инароднэ депутатхэм я Совет итхьаматэу Джарымэкъо Азмэт юбилей зэхахьэм къыщыгущыIагъэх, къэшъокIо купым хэтхэм, кIэлэегъаджэхэм, ны-тыхэм къафэгушIуагъэх, «Мыекъуапэ инэфылъэхэм» щытхъоу къахьырэм хагъэхъонэу афаIуагъ.
Красноярскэ дэт кIэлэцIыкIу Унэу Шъэумэн Хьазрэт ыцIэ зыхьырэм иеджакIохэр, ансамблэр дэгъоу зышIэхэрэр онлайн шIыкIэм тетэу «Мыекъуапэ инэфылъэхэм» къафэгушIуагъэх, гущыIэ фабэхэр къыфаIуагъэх.
Адыгэ Республикэм, Къэбэртэе-Бэлъкъарым язаслуженнэ артистэу, композиторэу Апэнэс Астемир «Мыекъуапэ инэфылъэхэм» яныбджэгъушIу, Москва къикIи, концертым орэдхэр къыщиIуагъ.
Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артистэу Быщтэкъо Азэмат илъэси 10-м нахьыбэрэ «Мыекъуапэ инэфылъэхэм» къащышъуагъ, «Налмэсым» хэтэу концертхэм ащэуджы.
Азэмат Адыгэ хэкум, шIулъэгъум афэгъэхьыгъэ орэдхэр ыгъэжъынчыгъэх.
Концертыр
Къэралыгъо телерадиокомпаниеу «Адыгеим» ижурналистэу Беданыкъо Замирэ пчыхьэзэхахьэхэр зэрищагъэх. Ащ зэрэхигъэунэфыкIыгъэу, «Мыекъуапэ инэфылъэхэр» Адыгэ Республикэм имызакъоу, Урысыем, IэкIыб хэгъэгухэм ащашIэ. Ансамблэм щагъэсагъэхэм ащыщхэр дунаим щыцIэрыIо «Налмэсым» къыщэшъох, Адыгеим щытхъур къыфахьы.
— ЗэкIэ дгъасэхэрэр къэшъуакIо зэрэмыхъущтхэр тэшIэ, — къытиIуагъ «Мыекъуапэ инэфылъэхэм» яхудожественнэ пащэу Нэныжъ Айдэмыр. — Сыд фэдэ сэнэхьат къыхахыщтми, цIыфышIу хъунхэу, хэгъэгум дэгъоу щыпсэунхэу тыфай.
КIэлэцIыкIу-ныбжьыкIэ ансамблэу «Абрекхэр», художественнэ пащэр ТхьакIумэщэ Налбек, «Мыекъуапэ инэфылъэхэм» къафэгушIуагъ, лъэпкъ къэшъо дахэ къыгъэлъэгъуагъ.
Къашъохэр дахэх
«Мыекъуапэ инэфылъэхэм» къашъоу къашIырэр бэ. Лъэпкъ фольклорым, искусствэм, тарихъым ахэр къыхэхыгъэх. «ЗэфакIу», «Удж», «Лъэпэрышъу», «КъушъхьэчIэс къашъу», «Си Адыгей», «НыбжьыкIэ къашъу», «Ислъамый», фэшъхьафхэри гум рехьых. КIэу агъэуцугъэхэм ащыщых «Зыгъэлъатэр», «Абхъаз къашъор», «Оркъ къашъор», нэмыкIхэри. Шъонтырпаохэм яIэпэIэсэныгъэ къызыщагъэлъэгъуагъэу тызэплъыгъэри ансамблэм кIэу къыхэхьагъэхэм ахэтэлъытэ.
КъэшъокIуи 160-м нахьыбэ зыхэлэжьэгъэ концертым хэта къахэбгъэщыщтыр? Теунэ Амин, Бахъукъо Амир, Быжь Эльдар, Хьакъуй Ислъам, Ожъ Динарэ, Хьакъуй Даринэ, Анастасия Татарницевам, нэмыкIхэу къашъохэр къэзышIыхэрэм пчыхьэзэхахьэр къагъэдэхагъ.
Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр IэпыIэгъу къыфэхъухэрэ Къулэ Мурадин, Нэныжъ Амир, Алыбэрд Мурат тафэраз, къэшъуакIохэр дэгъоу агъасэх. Шъуашэхэм ягъэхьазырын Iоф дэзышIэрэ Мышъэ Фатимэ ишIушIагъи къыхэтэгъэщы.
— Шъэумэн Хьазрэт къэшъокIуи 110-мэ сомэ миллионитIу къаритыгъ, гъэзетымкIи «тхьауегъэпсэу» етIожьы тшIоигъу, — къытиIуагъ Нэныжъ Айдэмыр. — Адыгэ Республикэм и Парламент идепутатэу Пэнэшъу Къэплъан спонсор IэпыIэгъу къытитыгъ. ЗэкIэ IэпыIэгъу къытфэхъугъэхэм, лъэпкъ искусствэм хэхъоныгъэ ышIынымкIэ зишIуагъэ къытэкIыхэрэм, ны-тыхэм тафэраз.
Адыгэ ашугэу Теуцожь Цыгъо июбилей медаль Нэныжъ Айдэмыр къызэрэфагъэшъошагъэр тигуапэу къыхэтэгъэщы.
Концертым урысхэр, адыгэхэр, ермэлхэр, Тыркуем къикIыгъэхэр, фэшъхьафхэри еплъыгъэх. КъэшъуакIохэм яшъуашэхэр къэшIэтыхэзэ дахэу зэрэуджыгъэхэм тигъэгушхуагъ. «Мыекъуапэ инэфылъэхэм» языгъэпсэфыгъо уахътэ ыуж Адыгэ Республикэм имэфэкI зэхахьэхэм зафигъэхьазырыщт. Шъопсэу, тилъапIэхэу «Мыекъуапэ инэфылъэхэр»! Шъуикъашъохэм лъэпкъхэр зэфащэ, искусствэр лъагэу аIэты.
ЕмтIылъ Нурбый.