«Шапсыгъэр» дахэу мэуджы
Дунэе фестиваль-зэнэкъокъоу «Адыгеим ижъогъожъыехэм» къэшъокIо ансамблэу «Шапсыгъэр» лауреат щыхъуи, апэрэ чIыпIэр къыфагъэшъошагъ.
Шъачэ и ПсышIопэ район лъэпкъ культурэмкIэ и Гупчэ ипащэу, Адыгэ Республикэм культурэмкIэ изаслуженнэ IофышIэу Хэшх Руслъан фестивалэу «Адыгеим ижъогъожъыехэм» анахьэу къыхигъэщырэр ныбжьыкIэхэр куп зэфэшъхьафхэм ахэтхэу яIэпэIэсэныгъэ зэрэхагъахъорэр ары.
Къэралыгъо 14, Урысыем ишъолъыри 6 зыхэлэжьэгъэ Дунэе фестивалым ансамблэу «Шапсыгъэр» илъэси 10 — 15 зыныбжьхэм язэнэкъокъу лауреат щыхъугъ. КIэлэеджакIохэм лъэпкъ къашъохэу «ЗэфакIор», «Уджыр», нэмыкIхэри концерт хэхыгъэм къыщашIыгъэх.
Художественнэ пащэу Тэрчэкъо Мурат лъэпкъ къашъохэм кIэлэеджакIохэр афегъасэх. Искусствэм ехьылIэгъэ къэбархэр къафеIуатэх.
— Тигуапэу «Шапсыгъэм» тыкъыщэшъо, — ягупшысэхэм тащагъэгъуазэ Камилла Янинам, Къэбж Данэ, Щагудж Саидэ, фэшъхьафхэм. — «Адыгеим ижъогъожъыехэм» лъэпкъ зэфэшъхьафхэр щытлъэгъугъэх. Мыекъуапэ джыри тыкъакIо тшIоигъоу ПсышIопэ районым тэгъэзэжьы.
Москва щыкIогъэ фестивалым «Шапсыгъэм» адыгэ къашъохэр къыщишIыгъэх. Дагъыстан, Къалмыкъым, Урысыем игупчэ, нэмыкIхэм къарыкIыгъэхэр фестивалым щызэIукIагъэх.
Адыгэ шъуашэм идэхагъэ бэмэ ашIогъэшIэгъонэу упчIэхэр тикъэшъуакIохэм къаратыщтыгъэх. Сэе плъыжьхэр пшъашъэхэм къякIоу ащыгъых. Лъэпкъ шъуашэр зепхьаным зыфэбгъэсэныр IэшIэхэу щытэп. Ар кIэлэеджакIохэм къагурэIо, лъэпкъ шэн-хабзэхэм мэхьэнэ ин араты.
— Адыгэ шъуашэм и Мафэ Iоныгъом и 28-м игъэкIотыгъэу дгъэмэфэкIыщт, — тизэдэгущыIэгъу лъегъэкIуатэ Хэшх Руслъан. — Лъэпкъ культурэм и Гупчэ щылажьэхэрэм а мафэм адыгэ шъуашэр ащыгъэу IофшIапIэм къэкIощтых. Адыгэ шъуашэр зезыхьэхэрэм япчъагъэ хэпшIыкIэу нахьыбэ зэрэхъурэм тегъэгушIо.
БэмышIэу Къэлэжъ щыкIогъэ пчыхьэзэхахьэм «Шапсыгъэр» къыщышъуагъ. Гъунэгъу къуаджэхэм ащыщхэри ансамблэр дахэу зэрэуджырэм ашIогъэшIэгъонэу еплъыгъэх.
«Шапсыгъэм» икъэшъуакIохэм къытаIуагъ зэIукIэгъухэм яшIуагъэкIэ нэIуасэ ныбжьыкIэхэр зэрэзэфэхъухэрэр. Адыгэ орэдхэм ядэIухэзэ музыкальнэ искусствэм нахьышIоу щыгъуазэ мэхъух, адыгабзэри нахь дэгъоу зэрагъашIэ.
Мы мафэхэм кIэлэеджакIохэм языгъэпсэфыгъо уахът, зэфэхьысыжьхэр ашIых. Адыгэ шъуашэм имэфэкI, лъэпкъ зэхахьэхэм «Шапсыгъэм» зафегъэхьазыры.
Сурэтхэм арытхэр: «Шапсыгъэм» икъэшъокIо пшъашъэхэр.