Токио щыкIощт Олимпиадэ джэгунхэм Асэкъалэ Рустам ахэлэжьэнэу зегъэхьазыры.

Адыгэ бэнакIор Узбекистан ихэшыпыкIыгъэ командэ хэтэу 2016-рэ илъэсым Рио-де-Жанейро щызэхащэгъэ Одимпиадэ джэгунхэм я 8-рэ чIыпIэр къащихьыгъ. Азием изэнэкъокъу, азие джэгунхэм дышъэр, нэмыкI медальхэр къащыдихыгъ. Дунаим урым-рим бэнакIэмкIэ изэнэкъо­къу хагъэунэфыкIырэ чIыпIэр къыщихьыгъ.

— Сятэу Сыхьатбый спорт бэ­накIэхэм апыщагъэу зэнэкъо­къухэм ахэлажьэщтыгъ, — къе­Iуатэ Асэкъалэ Рустам. — Си­кIэлэцIыкIугъом сэри спортыр сыгу рихьыгъ. Еджэркъуае пэгъу­нэгъу къутырэу Свободнэм сыкъыщыхъугъ. Сянэ Саид ыцIэр, шынахьыкIитIу сиI.

Олимпиадэм хэлэжьэщтхэр зы­щагъэхьазырырэ спорт еджапIэу Краснодар дэтым 1999-рэ илъэсым Р. Асэкъалэм зыщи­гъасэу ригъэжьагъ, 2009-рэ илъэ­сым Урысыем изэнэкъокъу медаль къыщихьыгъ.

Апэрэ тренерыр Владимир Холодаевыр ары. ГукIэгъоу, цIыфыгъэу ащ хэлъыр Рустам егъэ­лъапIэ. ЩыIэныгъэм игъогу рыкIоным фэшI щысэ тырехы. Урысыем изэнэкъокъу Р. Асэкъалэр хэлажьэзэ, финалым хэ­хьащтэу гугъэщтыгъ, ау судьяхэр зафэу къыдэзекIуагъэхэп, зэIу­кIэгъур шIуахьыгъ. Гукъао ар бэ-на­кIом щыхъугъ, Урысыем икIы­жьыгъ. Узбекистан икомандэ фэ­банэзэ медальхэр къыдихыгъэх.

Олимпиадэ джэгунхэу Рио-де-­Жанейро щыкIуагъэхэм захэла­жьэм ыуж дзюдомкIэ дышъэр къэзыхьыгъэ Мудрэнэ Бислъан игъусэу Адыгеим Рустам къэкIогъагъ. ГущыIэгъу тызыфэхъум, Адыгеим ныбджэгъухэр зэрэ­щыриIэхэр, республикэм ихэхъо­ныгъэхэм зэрарыгушхорэр къытфиIотагъэх.

Адыгеим щыщ. Исабыигъор Нэтыхъуае, Новороссийскэ ащыкIуагъ, Пшызэ къэралыгъо университетыр Краснодар къыщиу­хыгъ. 2010-рэ илъэсым къыщыублагъэу Ташкент щэпсэу, адыгабзэр дэгъоу ешIэ, лъэпкъ шэн-хабзэхэр зэрехьэх.

Адыгэ Республикэм спорт псэолъэ инхэр зэрэщагъэпсыгъэ­хэм Асэкъалэ Рустам щыгъуаз. Урым-рим бэнакIэм тиреспубликэ зыщиушъомбгъу шIоигъу. — Спортышхом зыкъыщыбгъо­тыныр IэшIэхэу щытэп, — еIо Р. Асэкъалэм. — Зэнэкъокъухэм сахэмылэжьэжьы зыхъукIэ Урысыем ихэшыпыкIыгъэ командэ тренерэу Iоф щысшIэ сшIоигъу.

Адыгэ Республикэм и ЛIы­шъхьэу КъумпIыл Мурат исоциаль­нэ нэкIубгъо къыщитхыгъ Асэ­къа­лэ Рустам Токио щыкIощт Олимпиадэ джэгунхэм зэрахэлэжьэщтыр, спортсменым гъэхъа­гъэ ышIынэу зэрэфиIорэр. Рустам адыгэ гур ыбгъэ къыщытео. Тыдэ щэпсэуми, Адыгэ Республикэр, иныбджэгъухэр, Iахьылхэр щы­гъупшэхэрэп. Батырыр спорты­шхом щылъыкIотэнэу, ищытхъу хигъэхъонэу фэтэIо.

ЕмтIылъ Нурбый.