Адыгэ Республикэм и Къэра­лыгъо филармоние инысхъэпэ театрэу «Дышъэ къошыным» икъэгъэлъэгъонхэр Мыекъуапэ гъэшIэгъонэу щыкIуагъэх.

Владимир Орловым пшысэу ытхыгъэм техыгъэу тыгъужъым икъэбархэм, щыIэкIэ-­псэукIэу иIэм яхьылIэгъэ къэгъэлъэгъоныр режиссерэу Нэгъой Асыет ыгъэуцугъ.

Чэтжъыер, тыгъужъыр, баджэр зэIукIагъэх. «Сэ сытыгъужъ, ау техакIоу, хъункIакIоу сыщытэп, шIу сшIэнэу сыфай», — къеIо тыгъужъым. Чэтжъыем ар зэхехы шъхьае, упчIэхэр къетых, тыгъужъыр зыфэдэр зэ­ри­гъашIэ шIоигъу. Чэтжъыер баджэми кIэ­упчIэ.

— Сэры уятэр, — еIо тыгъужъым, — баджэр уян.

Адыгэ Республикэм изаслуженнэ артисткэу Къапэ Саидэ чэтжъыем ироль къешIы. Нысхъапыр IупкIэу, игущыIакIэ гурыIогъошIоу зэрэщытым узыIэпещэ. Тыгъужъым ироль артистэу Аванес Татосян фэгъэзагъ. Тыгъужъым гукIэгъоу хэлъыр артистым къыгъэлъагъозэ, шIушIагъэм имэхьанэ къызэIуехы. Баджэм иорэдхэмкIи, игупшысэхэмкIи чэтжъыем зыкъыфигъэзэным фэшI уахътэу ыгъэкIуагъэр къэгъэлъэгъоным къыхэщы.

Тыгъужъым шIу ышIэн зэрилъэкIырэм, чэтжъыем IэпыIэгъу зэрэфэхъурэм яшIуагъэкIэ зыкъыуегъаштэ.

Павел Гуриным сурэтхэмкIэ къэгъэлъэгъоным гупшысэ гъэшIэгъонхэр хилъхьагъэх. Баджэм, тыгъужъым, чэтжъыем ясурэт­хэр дахэх.

Къэгъэлъэгъонхэу Кащей къыщэнэу зэ­рэфэягъэм, «Рыу, сибэщым!», «Зиусхьанэу Блэгъожъым», нэмыкIхэм кIэлэцIыкIухэр, ны-тыхэр ягуапэу яплъыгъэх. Пшысэхэм ахэт лIыхъужъхэм, шIур зезыхьэхэрэм, гукIэгъу зыхэлъхэм кIэлэцIыкIухэр акIырэплъых. Пшысэхэр хъугъэ-шIагъэхэу къащы­хъузэ, къэгъэлъэгъонхэм яплъыхэ зыхъукIэ, кIэлэцIыкIухэм агу ихъыкIырэр макIэп.

— Филармонием имызакъоу, гъэмэфэ къэгъэлъэгъуапIэхэм тиспектаклэхэр ащэкIох, — къытиIуагъ «Дышъэ къошыным» ихудожественнэ пащэу, Адыгэ Республикэм инароднэ артистэу Сихъу Станислав. — Урысхэр, адыгэхэр, къэндзалхэр, ермэлхэр, фэшъхьаф лъэпкъхэр тикъэгъэлъэгъонхэм яплъых.

Театральнэ искусствэр кIэлэцIыкIухэм пIуныгъэ дэгъу ятыгъэным фэлажьэ. Гъэмэфэ зыгъэпсэфыгъом ыуж пьесэ гъэшIэгъонхэм атехыгъэ къэгъэлъэгъонхэр агъэуцущтых.

Сурэтхэр къэгъэлъэгъонхэм къащытет­хыгъэх.