Сусанэ фитыныгъэр къыдихыгъ
Адыгэ Республикэм щыщ пшъэшъэ ныбжьыкIэу КъокIасэкъо Сусанэ Олимпиадэ джэгунхэу бэдзэогъум и 23-м Токио щырагъажьэхэрэм ахэлэжьэщт.
Дунаим и Кубок къыдэхыгъэнымкIэ батутым щыдэпкIаехэрэм язэнэкъокъу Португалием щыкIуагъ. Шъхьэзэкъо зэIукIэгъухэм С. КъокIасэкъом иIэпэIэсэныгъэ къащигъэлъагъуи, апэрэ чIыпIэр къыдихыгъ.
Теуцожь районым икъуаджэу Лъэустэнхьаблэ КъокIасэкъо Сусанэ щапIугъ. Дунаим изэнэкъокъухэм апэрэ чIыпIэр, медальхэр къащыдихыгъ, спортымкIэ дунэе класс зиIэ мастер.
— Батутыр къыхэсхынэу сянэ-сятэхэр къысэушъыигъэх. А лъэхъаным илъэси 6 сыныбжьыгъ. Краснодар сыкIозэ спортым зыфэзгъасэу зесэгъажьэм, сикIэлэегъаджэхэм, тренерэу Алексей Рыжковым сагъэгушхощтыгъ. ГущыIэ фабэу къысаIохэрэм сигуетыныгъэ хагъахъощтыгъ, — къытиIуагъ КъокIасэкъо Сусанэ. — Спортышхор сшIогъошIэгъон, Токио щыкIощтхэ зэнэкъокъухэм гъэхъагъэ ащысшIы сшIоигъу.
— Лъэустэнхьаблэ игурыт еджапIэ ыуж физкультурэм и Институт, Пшызэ мэкъумэщ университетыр Сусанэ къыухыгъэх, — тизэдэгущыIэгъу лъегъэкIуатэ спортсменкэ цIэрыIом ятэу Аркадий.
КъокIасэкъо Сусанэ Лъэустэнхьаблэ щэпсэу, адыгэ къашъохэр ыгу рехьых. Краснодар краим ихэшыпыкIыгъэ командэ хэтэу Урысыем, дунаим язэнэкъокъухэм ахэлажьэ. Батутыр спорт лъэпкъ гъэшIэгъонэу елъытэ. Хъагъэм тетэу дэпкIае, жьым лъагэу зыщеIэты, зегъэчэрэгъу, IэпэIэсэныгъэ ин хэлъэу шIыкIабэ къегъэлъагъо.
— Сыгу къыздеIэу сыфэгушIо! Зэрэреспубликэу, зэрэкъэралыгъоу тыкъыпфэгумэкIыщт! — къыщитхыгъ исоциальнэ нэкIубгъо Адыгеим и ЛIышъхьэу КъумпIыл Мурат..
ЕмтIылъ Нурбый.