Игугъэ шхомлакIэ пытэу ыIыгъ
Игъом зигъор пшIэмэ укIэгушIужьы. АщкIэ чаныгъэ-хъупхъагъэр хэлъэу сэлъытэ тхакIоу, усакIоу, драматургэу, журналистэу Дэрбэ Тимур.
Усэныр хэлъэу къэхъугъэти, зыкIи зигъэхьаулыягъэп: лъыкIуагъ шIэныгъэм, лъыкIуагъ акъылым, игугъэ лъыкIуагъ — теIэбагъ усэу псэм икъабылым, гупшысэ лъагъор джы зэIуигъэкIотыгъэу, итворческэ жьыкъащэ гупсэфэу, тынчэу бгъэм къыдэкIы — гупшысэ гъогушхом тетэу дахэу ыпэкIэ лъэкIуатэ.
Я 70 — 90-рэ илъэсхэм адыгэ литературэм къыхэхьэгъэ усэкIо-тхакIохэм ащыщ Т. Дэрбэр. Илъэс 17-м къыщегъэжьагъэу, ытхыхэрэр хеутых. Илъэсхэм итворческэ гупшысэ ащытIыргъуагъ. Илъэси 100 ныбжьым благъэу къекIолIэгъэ адыгэ литературэм хьалэлэу илъэс 30 хъугъэу щэлажьэ, хэбзэ IофшIэн пшъэрылъышхори ащ готэу егъэцакIэ, илъэс 14 хъугъэу лъэпкъ гъэзетэу «Адыгэ макъэм» иредактор шъхьаI. КъызэрэсIуагъэу, пасэу тхэныр къэзыштэгъэ кIалэм поэтическэ ыкIи нэмыкI тхылъхэри къыдигъэкIыгъэх: «Огум ишIулъэгъу», «Гум ишъэф», «КIэлэцIыкIум идунай», «Сызэжэгъэ ощхыр», «Сыадыг», «Лъэуж шIуцI», «Лъэпкъым ишъэо кIас», «ЕджакIэ зэтэгъашIэ», усэ сборникхэу «Лъэхъаным инэфапI», «Тэпышэс», «ГъэшIэрэ лъэпэчIас», нэмыкIхэри. БэмышIэу Тимур итхылъыкIэу «Нэфшъэгъо лъагъом ишъэф» зыфиIорэр Мыекъуапэ, Адыгэ Республикэм итхылъ тедзапIэ къыщыдэкIыгъ. Ащ зы пьесэрэ усэхэмрэ бэу къыдэхьагъэх.
УсэкIэ тхыгъэ пьесэр
Джырэ нэс зигугъу амышIыгъэ хъугъэ-шIэгъэ гъэшIэгъонэу адыгэхэр зыхэлэжьагъэхэм пьесэр къытегущыIэ. Ащ тхакIор зэреджагъэр: «Бромберг щыкIогъэ процессыр, е Адыгэр хьыкумым зэрэщаумысыгъэр». ЕдзыгъуитIу хъурэ пьесэу къэшIыгъуи 5-у зэхэтыр усэкIэ тхыгъэ. Пьесэм лъапсэ фэхъугъэр IэкIыбым къикIыжьыгъэ адыгэ шIэныгъэлэжьэу Едыдж Батырай нэмыц хъарзынэщым къыхихыжьыгъэ хъугъэ-шIэгъэ тхыгъэр ары. Мы пьесэр АР-м и Лъэпкъ театрэ исценэ щагъэуцуным джырэкIэ Iоф дашIэ. Адыгэхэм ятарихъ гугъэуз изы Iахь нэшхъэй мы хъугъэ-шIэгъэ чыжьэр зыфэгъэхьыгъэу пьесэм къыщыIотагъэр. НэкIубгъуи 120-рэ хъурэ пьесэу усэкIэ тхыгъэр зесэгъажьэм, сызэрэмыгугъэгъахэу, зы жьыкъэщэгъу гупсэфыкIэ сыджыгъ, джарэу сызIэпищагъ. Илъэси 170-рэ зытешIэжьыгъэ хъугъэ-шIагъэр непэм фэдэу зыхъурэр тхакIом тапашъхьэ къыригъэуцуагъ; ныбжьышхо зиIэ адыгэ лъэпкъым игъашIэ зэо-бэнэ зэпымычыжьхэм ахэтэу къызэрихьыщтыгъэр, шъхьэлъытэжьэу, Iэдэбэу, нэхъоеу, лIыгъэ напэу адыгэм иIагъэр зыфэдэр, джэнэтыпIэ чIыпIэр псэупIэкIэ Тхьэм къызафегъэшъуашэм, ар апсэ атызэ къаухъумэн фаеу зэрэхъугъэр IупкIэу щыгъэунэфыгъ мы произведением. Пьесэр анахьэу зэхьылIагъэр адыгэ дзэкIолI хые нэбгырищ — Шъалихь, Бачмыз, япащэу Гъубжьэкъо Муса насыпынчъагъэу къяхъулIагъэр ары. Пьесэм хэт геройхэм ащыщэу прокурорым къызэриIуагъэу, «Черкесмэ къащышIыгъэр гугъэкIод, Афызэхаплъхьэ хъущт гъыбзэ».
«Махъшэм тесми тхьамыкIэм хьэр ецакъэ» зэраIорэр гум къегъэкIы мы нэбгырищым къащышIыгъэм. Пачъыхьэм идзэ хэтхэу зэзэгъхи пIалъэкIэ зэуагъэх, Венгрием иIофи аухыгъ, Польшэм итых. Ашъхьэ къырыкIощтым, зызыдагъазэ хъущтым нэбгырищыр зэдеусагъэх —УрысыемкIэ къагъэзэнти, зэхэо-зэхаплъ, Польшэм исынхэуи амал яIэп, арэу зэхъум, Пруссием кIохэмэ нахь уцупIэ-шъхьэIыгъыжьыпIэ щагъотынэу гугъагъэх. ЕтIанэ ТыркуемкIэ кIожьынхэшъ, адыгэу зэрэпхъо-итэкъухьагъэ хъугъэм, яхэкужъ зыгорэущтэу къагъэзэжьын яхьисапыгъ. Ау капитаныр — урысы-дзэм ипащэ, щэ шIуцIэу апашъхьэ къитэджагъ, ежь шIоигъом нэмыкI раIуи, зэрелъэIухи зэхихыгъэп. «Заор тыухыгъэ, тиIоф тшIагъэ. Джы Iизын къытэт шъхьафит гъогум тытехьажьынэу…» Ау мо «лъэпкъ IэлкIэ» зэджагъэхэм капитаныр пхъашэу къафилъыгъ, елбэтэу Iашэу аголъхэр къызпахынхэшъ агъэтIылъынэу къафигъэпытагъ. «Адыгэм иIашэ ыгъэтIылъы хабзэп», — раIожьыгъ, ар адыгэ шъуашэм, намысым ипкъыгъоу зэралъытэрэр гурагъэIоным пылъыгъэх, ау ер, зэмызэгъ-зэфилъыр, джащ къыщежьагъ. Шъыпкъэ, Муса шъэогъу-ныбджэгъуитIум, иакъыл ащ тефи, сыд хъугъэкIи Iашэр заокIэ амыгъэфедэнэу ялъэIугъ, ежьхэм заор къырагъажьэмэ, тэтиехэр ошъогум дэоенхэу зэдаштагъэ. Ау Пруссие хэгъэгу гъунапкъэр адыгэхэм зэпачыгъ, урыс капитаным имэхъэджэгъэ-бзэгухьагъи къягоуагъ, ор зэдашIэхыгъ: Шъалихьэрэ Бачмызэрэ мы зэутэкIым щыфэхыгъэх, ахэм щэу рагъэкIыгъэми пыим ицIыфхэри зыдихьыгъэх (нэбгырэ зыщыплI). Ыпсэ пытэу къэнагъэр Муса, ау ащ апэрэ мафэми охэмэ емынэ къызэрикIыщтыр ышIэщтыгъ, ежьыр зы нэбгыри еуагъэп, зэриIогъагъэу, ишхонч Iэтыгъэу дэуаещтыгъ. Ау узынэбгырэу пыим ихэгъэгу щыхъугъэр зэкIэ къыщыптырагъэкIэныр хьазабышху ыкIи насыпынчъагъ. Пьесэм хэтых прокурорыр, адвокат зафэу Вольф (ар Муса ихыягъэ ыгъэунэфыгъэу, ишъыпкъэу черкес шъхьэлъытэжьым къыфэгумэкIы). Анахь зыщемыжагъэм Муса шIулъэгъу лъапIэри къыфыкъозыгъ, прокурор жъалымым ыпхъу дахэу Маргрезе IокIэ, апэрэ нэплъэгъум нэбгыритIур зэфещэх, апсэ зы чысэ илъэу.
Тарихъ хъугъэ-шIагъэу Бромберг процессыр зыщыIагъэр зытефэрэр 1851-рэ илъэсыр, щылэ мазэм и 10-р ары. Хьыкумыр адыгэм зытырашIыхьагъэр щылэ мазэм и 12-р ары. Шыхьатэу Iофым щыгъуазэхэм лъэшэу яшIуагъэ къэкIуагъ шъыпкъэр гъэунэфыгъэнымкIэ, адвокатэу Вольфи лъэшэу черкесым фэгумэкIыгъ. Хьыкумым ыгъэунэфыгъ «Гъубжьэкъо Муса зи лажьэ иIэп, Зи ыIуагъэп, ыукIыгъэп, Унашъор: ар шъхьафит тэшIыжьы!»
Дэрбэ Тимур ипьесэу усэм илъыр адыгэбзэ къэбзэ зэкIу дэхэ дэдэкIэ тхыгъэ, ипычыгъо пэпчъ псынкIэ, гурыIогъошIу, орэд мэкъамэ кIэлъ, гупшысэу хэлъыр лъэшы, пьесэм исюжет икъоу къудыигъэ ыкIи уфэупцI. Герой шъхьаIэхэу адыгэ нэбгырищыр — адыгэ лъэпкъэу къызыхэкIыгъэхэр зилъапIэхэу, нэпэнчъагъэм ыпэу лIыгъэр къыхэзыхырэх. УсакIоу Дэрбэ Тимур адыгэм игутео зэхыуигъашIэу, фэсакъэу, ыл, ыгу зэрафэузырэр мыгъуащэу мы образ шъхьаIэхэр ыкIи нэмыкIхэу хъугъэ-шIагъэм хэлажьэрэ пэпчъ IупкIэу нэм къыкIигъэуцуагъ. Нэмыц пшъашъэу Маргрезе инэфынэгъэ-цIыфыгъэ дахэкIэ гум къинэу авторым ыгъэпсыгъ; ышъхьэ паемэ, къыомыблэщтхэри — капитаныр — урысыдзэм ипащэ, прокурор зэкъодзакIоу Маргрезе (пшъашъэм ятэ), хьыкумышIыр гур афигъэплъэу тхакIом къыригъэлъэгъукIыгъэх. Нэпсымрэ гушIуагъомрэ зэготэу пьесэ-усэм щызэхэошIэх; бэ гупшысэу мы хъугъэ-шIагъэм къыгъэущырэр, пьесэр уасэ зиIэ произведениешху — бэ къыубытырэр, къыпфызэхифырэр; щыIакIэр — Iоф къин, ащ игъогу мыжъожъ пытэхэмкIэ зэлъыпкIагъ, уфэмысакъмэ, узхэмыкIыжьын лажьэ къыпфахьыщт. Ауми, шIур текIуагъ, зы псэ закъоу къэнэгъэ адыгэу Гъубжьэкъо Муса хыеу алъытагъ.
Тимур итхылъыкIэу «Нэфшъэгъо лъагъом ишъэф» зыфиIорэм иятIонэрэ Iахьышхо усэхэмкIэ зэлъыпкIагъ. Ащ усакIом щыIэныгъэр зэрэзыпкъырищэу, зэрэзэхишIэрэр, ущыIэныр — щэIэгъэшхоу, Iушыгъэу, шъыпкъагъэу, зэфагъэу, къэбзагъэу зэрилъытэрэр ащыкIэгъэтхъыгъ. УсакIом ыгу пхырыкIырэ пстэумэ гумэкIи, гуузи, гушIуагъуи, насыпи, гъэшIэн шIулъэгъуи зэрахигъуатэрэр къащиIуагъ. ТхакIом ыпсэ ифэбагъэкIэ зэрэфэамалэу пьесэр ыкIи усэхэр ыгъэшъокIыгъэх; къыхэкIы ыгу ефэхэуи, къыхэкIы ыгу къигушIукIэуи, къиныри ешIэ, тхъагъоми гушIоу пэгъокIы — джарыба щыIэныгъэр зэрэзэхэлъыр.
УсакIор — цIыфы, дунэешхом икъурэ цIыкIу; къекIу ащи щэчыгъое такъикъ зэгъокIхэр, ау Iотэжьыгъо сыхьатхэр, мафэхэр нахьыбэх. ТхылъыкIэм къыдэхьэгъэ пьесэм ыкIи усэхэм Дэрбэ Тимур игупшысэ лъэшэу зызэриштагъэр, уигуапэу ухэтми уигъэдэIон ылъэкIы зэрэхъугъэр ахэолъагъо. «Бзыумэ афэдэу, Сэри шъхьафитэу Орэд къэсэIо», — еIо тхакIом.
ШIулъэгъур зыхиз сатырхэр, усэу «Поэзиер», мыхэм анэмыкIхэри тхэкIо чъэпхъыгъэу зигугъэ тэмэ пытэ хъугъэм ымакъэх, «Нэфшъэгъо лъагъом ишъэф» зыфиIорэ поэтическэ тхылъыкIэм лъэпэ мафэ ыдзынэу тыфэлъаIо.
Мамырыкъо Нуриет.