Сурэттеххэм яIофшIагъэ икъэгъэлъэгъон-зэнэкъокъоу «Нэпкъхэр-2021-рэ» зыфи­Iо­рэр ящэнэрэу Урысыем щы­кIуагъ.

КъокIыпIэм и Къэралыгъо музей и Темыркавказ къутамэ къыщызэIуахыгъэ къэгъэлъэгъоным Урысыем ишъолъыр 60-мэ ясурэттеххэм яIофшIэгъи 150-рэ къыра­хьылIагъ. Урысыем, Адыгеим культурэмкIэ яминистерствэхэр, КъокIыпIэм искусствэхэмкIэ и Къэралыгъо музееу Мыекъуапэ дэтыр, Рязань исурэттеххэм ятворческэ IофшIапIэ, Урысыем исурэттеххэм я Союз икъутамэу Адыгэ Республикэм щыIэр, Мые­къуапэ икъэ­лэ сурэттех клуб кIэщакIо зы­фэхъугъэхэ къэгъэлъэгъонэу тикъалэ щыкIо­рэм иапэрэ едзыгъо Рязань щызэхащагъ.

Хэгъэгум ифотоклуб 93-мэ ясурэттех 700-м нахьыбэмэ яIофшIагъэ осэшI купым зэфихьысыжьыгъ. Сурэт мини 6 фэдиз зэхэщакIохэм къафагъэхьыгъ. Мыекъуапэ исурэттеххэм яIофшIэгъэ 46-рэ осэшIхэм къыхахи, финалым хагъэхьагъэх. Адыгэ Республикэм исурэттеххэм яклуб ипащэу, республикэм изаслуженнэ журналистэу Аркадий Кирнос къыIуагъ тисурэттеххэр хэгъэгум изэнэкъокъу чанэу зэрэхэлэжьагъэхэр зэхэщакIохэм къыдалъыти, Мые-­ къуапэ къэгъэлъэгъоныр къызэрэщызэIуа­хыгъэр.

Джэрзыр къэзыхьыгъэхэр

Урысыем исурэттеххэм якъэгъэлъэгъон­-зэнэкъокъу Адыгеим джэрзыр къыщыдихыгъ. Республикэм щытхъур къыфэзыхьыгъэхэм тигуапэу ацIэхэр къетэIох: Бычкова Александра, Войнов Дмитрий, Горский Александр, Данилюк Светлана, Еутых Саид, Картавкин Артем, Кирвякова Инна, Лутай Виктор, Никитин Борис, Орлова Марина, Кирнос Аркадий, Попов Леонид, Романов Владимир, Сергиенко Татьяна, Эльдарэ Мурат, Сысоева Виктория.

Сурэттеххэр едзыгъуи 4-мэ ащызэнэ­къокъугъэх. ШIуфэс сурэтхэр, псауныгъэм икъэухъумэн, чIыопсым идэхагъэ, нэмыкIхэм афэгъэхьыгъэхэр гъэшIэгъоных.

Челябинскэ исурэттеххэм яклубэу «Мыжъо бгырыпхым» хэгъэгум изэнэкъокъу апэрэ чIыпIэр къыщыдихыгъ.

Мыекъуапэ щыкIорэ къэгъэлъэгъоныр Адыгэ Республикэм и Къэралыгъо программэу «Культурэм ихэхъоныгъ» зыфиIоу 2020 — 2024-рэ илъэсхэм ателъытагъэм хэхьэ.

Сурэттеххэм яIофшIагъэ икъэгъэлъэгъон бэдзэогъум и 12-м нэс Мыекъуапэ щыкIощт.

Сурэтым итхэр: Адыгеим исурэттеххэр.