Футбол клубхэу «Зэкъошныгъ» Мыекъуапэ ыкIи «Спартак» Нал­щык 2020 — 2021-рэ илъэс ешIэгъум зыхэлажьэхэм, мурадэу яIагъэр зэфэдагъ. Сыда къадэхъугъэр?

Зэкъош футбол клубхэр мэкъуогъум и 9-м Мыекъуапэ щызэдешIагъэх, «Зэкъошны­гъэр» 1:0-у текIуагъ. Пресс-зэIукIэм командэхэм ятренер шъхьаIэхэм гущыIэгъу тащыфэхъугъ.

— Адыгеим щыщ кIалэхэр нахьыбэ хъу­хэу командэм щедгъэшIэнхэу унашъо зы­тэшIым, опыт зиIэ ешIэкIуи 8 «Зэкъош- ныгъэм» хэкIыжьыгъ. НыбжьыкIабэ тштагъэ, ау яIэпэIэсэныгъэ хагъэхъонэу игъо ифа­гъэхэп. ЗыкъызэIуахыным фэшI уахътэ ящыкIагъ, — къыIуагъ тренер шъхьаIэу Ешыгоо Сэфэрбый. —

Къуаджэм къипщырэ кIалэм исэнаущыгъэ къызэIуихынымкIэ уежэн фае…

«Зэкъошныгъэм» я 14-рэ чIыпIэр къыдихыгъ, очко 25-рэ къыхьыгъ. ТекIоныгъи 7 къыдихыгъ, пчъагъэр зэфэдэу зэIукIэгъуи 4 ыухыгъ.

«Зэкъошныгъэм» иешIакIоу Къонэ Амир гъогогъуи 10 къэлапчъэм Iэгуаор дидзагъ, Iэщэ Анзор — 7, Ещенко Олег — 3, Крылов Денис — 2. Зырыз дэзыдзагъэхэм ащыщых Ю. Андрейченкэр, Р. Хьагъурыр, Д. Антоненкэр, С. Бабенкэр.

«Спартак» Налщык я 10-рэ чIыпIэр къыдихыгъ, очко 42-рэ ригъэкъугъ. ТекIоныгъэр 11 къыдихыгъ, зэфэдэу 9 ешIагъ.

— ЧIыпIэ хэхыгъэ тыфэбэнэнэу пшъэрылъ тиIагъэп. Республикэм щапIугъэ кIалэхэр едгъэшIэнхэу, яIэпэIэсэныгъэкIэ къахэщы­хэрэм тынаIэ атетыдзэнэу щытыгъ. Апэрэ чIыпIэхэм ащыщ къыдэтхынэу, апэрэ купым тыхэхьан фаеу типащэхэм къытаIомэ, тищы­кIэгъэ ешIакIохэм талъыхъущт, зэнэкъо­къум тызэрэхэлэжьэщт шIыкIэм тегупшысэщт, — къыIуагъ «Спартак» итренер шъхьаIэу ШэкIо Ащэмэз.

Зэкъош клубхэм футбол ешIэкIо цIэрыIохэр ащагъэсэнхэ алъэкIыщтэу зылъытэхэрэм адетэгъаштэ. 2021 — 2022-рэ илъэс ешIэгъур рагъэжьэным ыпэкIэ тренер шъхьа­Iэхэм ямурадхэр къядгъэIотэщтых. Ауж къи­нэхэрэм «Зэкъошныгъэр» къахэкIыжьыщтэу, зэкъош клубхэм нахьыбэрэ тагъэгу­шIощтэу тэгугъэ.

Сурэтхэм арытхэр: Ешыгоо Сэфэрбый, ШэкIо Ащэмэз.