Неущрэ мафэр зыIэ илъхэу, республикэм, къэралыгъом, дунаим хэ­хъоныгъэхэр ашIынымкIэ зыщыгугъыхэрэр ныбжьыкIэхэр ары. Ахэм ядунэееплъыкIэ, шIэныгъэу зэрагъэгъотырэм, пIуныгъэ-гъэсэныгъэу апа­гъохырэм елъытыгъэр макIэп.

Адыгеим мы лъэныкъом мэхьанэшхо реты. АР-м и ЛIы­шъхьэу КъумпIыл Мурат ныбжьыкIэхэм ялъагъо къыхахыным, яшIэныгъэхэм ахагъэхъоным фэIорышIэхэрэ Iофтхьабзэхэр тишъолъыр зэрэщызэхащэхэрэм ынаIэ тет зэпыт. АР-м гъэсэны­гъэмрэ шIэныгъэмрэкIэ и Ми­нистерствэ кIэлэцIыкIухэм ыкIи ныбжьыкIэхэм япIун ылъэны­къокIэ щыIэ къэралыгъо полити­кэр пхырыщыгъэнымкIэ и Гъэ­IорышIапIэ лъэныкъуитфыкIэ иIоф­шIэн зэхещэ. Ахэм нахь игъэкIотыгъэу ягугъу къэтшIыщт.

Апэрэр — «Форумная кампания» зыфиIорэр ары. Мыщ хэхьэ Урысые ыкIи шъолъыр форумхэм республикэм ис ныбжьыкIэхэр ахэлэжьэнхэр ыкIи ащ фэдэ Iофтхьабзэхэр Адыгеим щызэхащэнхэр.

НыбжьыкIэхэр республикэм лъэныкъо зэфэшъхьафхэмкIэ щыIэныгъэм хэгъозэнхэм фэшI гъэсэныгъэм ифорумхэр шъо­лъырым щызэхащэх. Джащ фэ­дэу Адыгеим щыпсэухэрэ ныбжьыкIэхэр Урысыем щызэхащэрэ Iофтхьабзэхэм чанэу ахэ­лажьэх.

Къыблэ федеральнэ шъолъы­рым иныбжьыкIэ проектнэ фо­румэу «СЕЛИАС-2020» зыфи­Iорэм Адыгеим икIыгъэ нэбгырэ 13 хэлэжьагъ. Iофтхьабзэр Iоныгъом и 27-м къыщегъэжьагъэу чъэпыогъум и 1-м нэс кIуагъэ. Республикэм щыщэу Игорь Жихаревым ипроект къы­хагъэщыгъ ыкIи грантэу сомэ 1066000-рэ къыфагъэ­шъошагъ.

Ахъщэу къыратыгъэмкIэ «Ныб­жьыкIэ медиа-гупчэу «Dobro Production» зыфиIорэр ешIы.

Урысыем щызэхащэхэрэ фо­румхэу «Территория смыслов», «ОстроVa», «Евразия Global», нэмыкIхэми Адыгеим ис ныбжьыкIэхэр чанэу ахэлэжьагъэх.

Адыгеим икIэлэеджэкIуищ Урысые зэнэкъокъоу «Большая перемена» зыфиIорэм ифинал хэхьагъ. Дарья Беляевам ахъщэ шIухьафтынэу сомэ 200 къы­ратыгъ. Арина Колесниковам ахъщэ шIухьафтынэу сомэ миллион къыфагъэшъошагъ. Джащ фэдэу апшъэрэ гъэсэныгъэ зы­щэзэригъэгъотыщт учреждением чIэхьанымкIэ зишIуагъэ къэкIощт баллэу 5 портфолиом къыхагъэхъуагъ. Александр Ко­ростовым ахъщэ шIухьафтынэу сомэ миллион къыратыгъ ыкIи ащи баллэу 5 портфолиом къы­фыхагъэхъуагъ.

ЯтIонэрэ лъэныкъор Адыгеим иныбжьыкIэхэм патриотическэ пIуныгъэ ягъэгъотыгъэным фэгъэзагъ. Республикэм гъэсэныгъэм иучреждениехэу итхэм пIуныгъэм епхыгъэ Iофтхьа­бзэ­хэр ащызэхащэх. Ахэм ащыщых класснэ сыхьатхэр, зэдэгущы­Iэгъухэр, зэнэкъокъухэр, нэ­мыкIхэри. Илъэс 13 хъугъэу Адыгеим республикэ дзэ-спортивнэ джэгукIэу «Зарница» зы­фиIорэр щызэхащэ.

Политическэ IофшIэным ылъэ­ныкъокIэ мэхьанэшхо зи­Iэмэ ащыщ Урысые кIэлэцIыкIу-ныбжьыкIэ дзэ-патриотическэ общественнэ движениеу «ЮНАРМИЯ» зыфиIорэм зырагъэушъомбгъуныр. Ащ фэшI Адыгэ Республикэм и ЛIышъхьэ иIэпыIэгъукIэ 2020-рэ илъэсым республикэ бюджетым къыхэ­хыгъэу сомэ миллиони 3,2-рэ къафатIупщыгъ. Непэрэ мафэм ехъулIэу Адыгеим юнармейцэ 3790-рэ иI.

Ящэнэрэ лъэныкъор цIыфхэм финанс шIэныгъэу аIэкIэлъым хэгъэхъогъэныгъым епхыгъ. Ар пстэуми анахь ныбжьыкIэу тIоми тыхэукъощтэп. Адыгеим финанс шIэныгъэм ишъолъыр гупчэ щагъэпсыгъ. Ащ къыды­хэлъытагъэу республикэм щы­псэухэрэм мы лъэныкъомкIэ яшIэныгъэхэм зэрахагъэхъощтхэ егъэджэнхэр, Iофтхьабзэхэр афызэхащэх.

ЯплIэнэрэр — лъэпкъ про­ектэу «Гъэсэныгъэм» къыды­хэлъытагъэу шъолъыр проектэу «Социальная активность» зыфиIорэр Адыгеим щыгъэцэкIэгъэныр ары. Лъэпкъ про­ектхэм ягъэцэкIэн сыд фэдэрэ къулыкъуи анахь мэхьанэ зэритырэмэ ащыщ. Мы лъэны-къом къыдыхэлъытэгъэ Iоф­шIэ­нэу агъэ­цакIэрэм ишIуагъэкIэ «Социальная активность» зыфиIорэ про­ектым зэфэхьысы­жьышIухэр ешIых.

Ятфэнэрэр — экстремизмэм зимыушъомбгъуным фэшI пэшIорыгъэшъ Iофтхьабзэхэр зэ­хэщэгъэнхэм фэгъэхьыгъ. Урысые культурэм икъэухъумэн, лъэпкъхэм азыфагу зэгурымы­I­о­ныгъэ къимыхьаным афэгъэ­хьыгъэу федеральнэ гъэсэныгъэ проектхэу зэхащэхэрэм респуб­ликэр чанэу ахэлажьэ.

Адыгеим щыпсэухэрэ лъэпкъ зэфэшъхьафхэм яшэн-хабзэхэр къэухъумэгъэнхэм фэшI АР-м гъэсэныгъэмрэ шIэныгъэмрэкIэ и Министерствэ илъэс къэс фе­стивалэу «Мы разные — в этом наше богатство! Мы вместе — в этом наша сила» зыфи­Iорэр зэхещэ. Экстремизмэм ныбжьыкIэхэр щыухъумэгъэнхэм, лъэпкъ зэфэшъхафэу рес­публикэм щыпсэухэрэм азыфагу гуфэбэныгъэ илъыным, дин зэфэшъхьафхэр зылэжьыхэрэм зэгурыIоныгъэ яIэным тапэкIи Iоф адэшIэгъэнэу агъэнафэ.

НыбжьыкIэхэм Iоф адэпшIэныр, ахэм ашIогъэшIэгъоныщтхэ лъэныкъохэр бгъэнэфэнхэр псынкIэп, ау сыд фэдиз кIуачIэ пэIухьагъэми ахэм къызэкIа­гъэ­кIожьы. НыбжьыкIэгум уригъусэ зыхъукIэ ори удэкIэлэжьы, щы­Iэ­ныгъэм илъэныкъо пстэури зэ­бгъэ­шIэн, зэкIэми уалъыIэсын кIуачIэ зыхэогъо­тэжьы.

Абрэдж Сэтэнай.