Нысэм унагъор ыгощыгъэп
Адыгэ унагъом ипсэукIэ фэгъэхьыгъэ къэгъэлъэгъонэу «Угощэ дэгъумэ, урихьылIагъ» зыфиIорэм Мыекъуапэ тыщеплъыгъ.
ИлъэсыбэкIэ узэкIэIэбэжьмэ, спектаклэр Адыгэ Республикэм и Къэралыгъо камернэ музыкальнэ театрэу Хьанэхъу Адам ыцIэ зыхьырэм заулэрэ къыгъэлъэгъуагъ, еплъыгъэхэм агу рихьыгъ. А лъэхъаным артистхэу Нэгъой Маринэ, Шъхьэбэцэ Сыхьатбый, Хъурмэ Марыет, Пэрэныкъо Чатиб, нэмыкIхэм рольхэр къашIыщтыгъэх.
— Театрэр зышIогъэшIэгъонхэр къызэрэкIэлъэIухэрэр къыдэтлъыти, спектаклэр ятIонэрэу дгъэуцунэу зитэхъухьэм, Iофхэр псынкIэу лъыкIотагъэх, — къыIуагъ АР-м и Къэралыгъо камернэ музыкальнэ театрэ ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу, режиссерэу Сулейманов Юныс.
Адыгабзэм изэгъэшIэн, игъэфедэн ямэхьанэ къэIэтыгъэнымкIэ, зэхэщэн IофхэмкIэ республикэ общественнэ движениеу «Адыгэ Хасэр» театрэм IэпыIэгъу фэхъугъ.
— Спектаклэр адыгабзэкIэ макIо, — тизэдэгущыIэгъу лъегъэкIуатэ Адыгэ Хасэм итхьаматэу ЛIымыщэкъо Рэмэзан. — Адыгабзэр, лъэпкъ шэн-хабзэхэр нахьышIоу зэгъэшIэгъэнхэм тыпылъ. Музыкальнэ театрэм иартистхэм рольхэр къашIыхэзэ, орэдыбэ къаIо. Бзэм изэгъэшIэн орэдри хэлажьэу тэлъытэ. Музыкальнэ искусствэр бай дэдэу зэрэщытыр щыIэныгъэм къеушыхьаты.
Адыгэ Хасэмрэ музыкальнэ театрэмрэ зэгъусэхэу агъэуцугъэ къэгъэлъэгъоным адыгэхэм ямызакъоу, урысхэр, нэмыкI лъэпкъхэр еплъых. IэкIыб къэралыгъохэм къарыкIыжьыгъэхэ тилъэпкъэгъухэри музыкальнэ къэгъэлъэгъоным зыIэпещэх.
Къэгъэлъэгъоныр
Урысыем, Адыгеим культурэмкIэ язаслуженнэ IофышIэу Цэй Ерыстэм Аскъэлае щыщ. ЩыIэныгъэм хилъагъохэрэм, игумэкIгупшысэхэм атехыгъэу ытхыгъэ пьесэр къуаджэм щыпсэурэ адыгэ унагъом, щыIэныгъэм зэхъокIыныгъэу фэхъухэрэм яхьылIагъ.
Унагъом нысэ фэхъугъэ Светэ ироль Кобл Зурыет къешIы. Ащ ишъхьэгъусэр Дзэгъащт, артистыр Шъхьачэ Арсен. ШIу зэрэлъэгъух, сабыеу къафэхъугъэм Эдуард фаусыгъ. Нысэм къоджэ щыIакIэр ыгу рихьырэп, къалэм щыпсэуныр нахь къыхехы, унагъом екIыжьы сабыйри игъусэу.
Дзэгъащтэ колхозым хэт, тракторнэ бригадэм ипащ. Дэгъоу Iоф зэришIэрэм фэгъэхьыгъэу гъэзетэу «Адыгэ макъэм» тхыгъэхэр къихьагъэх. Дзэгъащтэ ятэ гумэкIыгъохэм зэлъаштагъэу щагум щэгъукIэ. Гъэзетым еджэзэ нэгушIо зэрэхъугъэм гуащэм гу лъитагъ, артисткэр ЛIые Бэл.
Режиссерым ишIушIагъэр гущыIэкIэ унагъом щызэраIорэм имызакъоу, нэплъэгъукIэ зэрэзэлъыIэсыхэрэр ары.
Унэгъо зэгъэфагъэм бырсыр зэрэхилъхьагъэр нысэм зыдишIэжьи, гуащэм елъэIугъ къыфигъэгъунэу. Къуаджэм къэзыгъэзэжьыгъэ нысэм иIокIэ-шIыкIэхэмкIэ, ихъупхъагъэкIэ гъунэгъухэр зыIэпещэх. Артисткэм ролыр къызэIуихызэ шIыкIабэ къызэригъотырэм спектаклэр къегъэдахэ.
УзэшIужьыныр къин
Зым зыр ыгъэмысэныр арэп режиссерым гупшысэ шъхьаIэу къэгъэлъэгъоным щыпхырищырэр. Унагъоу узыхэхьагъэм илъэпкъ шэн-хабзэхэр бгъэлъэпIэнхэм, лъыбгъэкIотэнхэм ямэхьанэ къеIэты. Гуащэм иорэд уедэIузэ, къуаджэм къыщекIокIырэ къэбарым ухещэ. Унагъом зэрэфэгумэкIырэр ролым дэгъоу къыщеIуатэ. Ишъхьэгъусэ сабыим фэзэщы. Джэгуалъэхэр фишIыгъэх, ау гущыIэ фабэу риIо шIоигъор бгъэгум «щэсты, щэжъэ». Сабыир къалэм щыI.
Артист пэпчъ ролым зэрэхэщагъэр анахьэу къызыщылъагъорэр унагъом игъэпытэн тегущыIэхэзэ, зым зыр едэIун ылъэкIы зэрэхъугъэр ары. Режиссерым гум ихъыкIырэр артистыр щагум е унэм зэрэщызекIорэмкIэ къыуегъашIэ. Пщым джэгуалъэу ыгъэхьазырыгъэр зэритыщт сабыир ымыгъотэу щагум зыдидзэкIэ зыгъэгумэкIырэм укIэупчIэн ищыкIэгъэжьэп.
Гум иорэд
Дирижер шъхьаIэр Адыгэ Республикэм изаслуженнэ артистэу Аркадий Хуснияров. Орэдышъор Адыгэ Республикэм искусствэхэмкIэ изаслуженнэ IофышIэшхоу, композиторэу Хъупэ Мурат ыусыгъ.
Оркестрэр къадежъыузэ зэшIужьыгъэхэ зэшъхьэгъусэхэу Дзэгъащтэрэ Светэрэ гум иорэд къызэдаIо. ШIулъэгъу дахэ зэфыряIэу зэрэпсэухэрэм нэбгырабэ къызэрехъуапсэрэр орэдым щызэхэтэхы. Гъунэгъухэр, Iахьылхэр унэгъо ныбжьыкIэм къыфэгушIох, Эдуард цIыкIу адыгэ шъуашэр щыгъэу лъэпкъ къашъом хелъасэ…
ЕплъыкIэхэр
СурэтхэмкIэ къэгъэлъэгъоныр гъэкIэрэкIагъэ. Адыгэ унэр, щагур, ны-тыхэм ясурэтхэр щыIэныгъэм къыхэхыгъэх. Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартистхэр, театрэр зышIогъэшIэгъон пшъашъэхэр спектаклэм еплъыгъэх, къэгъэлъэгъоным щызэхахыгъэм тегущыIэх. Спектаклэм къуаджэм щеплъынхэ фаеу зылъытэхэрэм бзылъфыгъэ ныбжьыкIэу Рузанэ ащыщ.
— Тыгу рихьыгъ, адыгэ къэIуакIэхэр тшIогъэшIэгъоных. «Къо дэгъу уиIэмэ,нысэ дэгъу уиIэщт» пщым къызэриIорэм мэхьэнэ ин етэты, — ягупшысэхэм тащагъэгъуазэ шIэныгъэлэжьхэу Хьанэхъу Руслъанрэ Беданэкъо Муратрэ. — Ныбжь зэфэшъхьаф зиIэхэм къэгъэлъэгъоныр афагъэуцугъ.
Орэдхэр зэзыгъэфэгъэ артист цIэрыIоу Пэрэныкъо Чатибэ, жъыум фэгъэзагъэхэм, нэмыкIхэу шэпхъэ лъагэм къэгъэлъэгъоныр фэзыIэтыгъэхэм тафэраз.