Урысыем и Кубок ыкIи Урысые Федерацием икоман­дэ­хэм тхэквондомкIэ язэнэкъокъухэр мэкъуогъум и 16 — 23-м Мыекъуапэ щыкIуагъэх.

Адыгэ къэралыгъо университетым испорт Унэшхоу Кобл Якъубэ ыцIэ зыхьырэм зэнэкъокъухэр щызэхащагъэх. Урысыем зэкIэ ишъолъырхэр зэIукIэгъухэм ахэлэжьагъэх.

— Командэ 36-рэ, бэнэкIо 350-м нахьыбэ алырэгъум щызэIукIагъэх, — къы­тиIуагъ командэхэм язэнэкъокъу исудья шъхьа­Iэу Икромхон Яхябоевым. — Сэ Узбекистан сыщыщ, Хабаровскэ сыщэпсэу. Адыгэ Республикэм дэгъоу къыщытпэгъо­кIыгъэх. Зэхэщэн Iофхэр къытфигъэпсынкIагъ республикэм испорт еджапIэу N 2-м ипащэу Хъот Юныс. Спортсменхэм, судьяхэм яфэIо-фашIэхэр гум рихьэу агъэцэкIагъэх. Адыгэ Республикэм ичIыопс, ичIыпIэ дахэхэр тагъэлъэгъугъэх. ГукъэкIыжь гъэшIэгъонхэр тиIэхэу тадэжьхэм тэгъэзэжьы.

ЦIэрыIохэр хэлэжьагъэх

Олимпиадэ джэгунхэм, Европэм, дунаим язэнэкъокъухэм хагъэунэфыкIырэ чIыпIэхэр къащыдэзыхыгъэхэр, дунаим и Кубок фэбэнагъэхэр зэIукIэгъухэм ахэлэжьагъэх. Урысыем спортымкIэ изаслуженнэ мастери 3, спортымкIэ дунэе класс зиIэ мастери 7, Урысыем спортымкIэ имастери 106-рэ зэ­нэкъокъум щызэIукIагъэх.

Адыгэ Республикэм щыщ бэнэкIуи 7-мэ яIэпэIэсэныгъэ зэIукIэгъухэм къащагъэлъэгъуагъ.

ТекIоныгъэр къыдэзыхыгъэхэр

Татарстан ихэшыпыкIыгъэ командэ апэрэ чIыпIэр къыдихыгъ. Челябинскэ хэкум ятIо­нэрэ чIыпIэр ыхьыгъ. Адыгэ Республикэмрэ Москва хэкумрэ якомандэхэм ящэнэрэ чIыпIэхэр афагъэшъошагъэх.

Татарстан, Дагъыстан, Ростов хэкум, Че­лябинскэ, нэмыкIхэм ябэнакIохэр яIэпэIэсэныгъэкIэ нахь къахэщыгъэх. КIалэхэри, пшъашъэхэри щысэ зытырахыхэрэм ащыщых.

Адыгеим ибэнакIохэр

Яонтэгъугъэхэм ялъытыгъэу Урысыем и Кубок фэбэнагъэхэм медали 3 къахьыгъ. Кристина Дюбинам, кг 73-рэ, зэIукIэгъухэм текIоныгъэр къащыдихи, дышъэр къыфагъэшъошагъ.

Даур Къадырбэч, кг 74-рэ, Эрик Огиенкэм, кг 68-рэ, ятIонэрэ чIыпIэхэр къыдахыгъэх.

Апшъэрэ категорие зиIэ тренерэу Вла­димир Есиным ыгъасэхэрэ ныбжьыкIэхэм тагъэгушIуагъ, ямедальхэм ахагъэхъонэу афэтэIо.

Командэхэм язэнэкъокъу Кристина Дюбинар, Дзэгъащтэ Аринэ, Даур Къадырбэч, Эрик Огиенкэр чанэу хэлэжьагъэх, Уры­сыем джэрзыр къызэрэщахьыгъэр гъэхъагъэкIэ афэтэлъэгъу.

Зэкъотхэм яIофшIакI

ЗэхэщэкIо купым хэтэу, Урысыем, Адыге­им язаслуженнэ тренерэу Хъот Юныс IэпыIэгъу къафэхъугъэхэм лъэшэу афэраз. Адыгэ Республикэм тхэквондомкIэ и Федерацие ипащэу, спортымкIэ дунэе класс зиIэ мастерэу Филипп Беловым, республикэ спорт еджапIэу N 2-м иIофышIэхэу Шъао Заремэ, Гаяна Григорян, Наталья Шадрухинам, Адыгэ къэралыгъо университетым физкультурэмрэ дзюдомрэкIэ и Институт ипащэу Бгъуашэ Айдэмыр, спорт еджапIэу N 2-м итренерхэу Олег Тищенкэм, Александр Охрименкэм, Андрей Жевнэ, водителэу Дэхъужь Хьумэр, нэмыкIхэу зэхэщэн Iофхэр зезыхьагъэхэм Ю. Хъотыр афэраз.

Хьабэхъу Аскэр, Былымыхьэ Рэщыдэ, Кушъу Ибрахьимэ, Зэрамыку Шыхьамэ, ЖэнэлI Рэмэзан, фэшъхьафхэм яшIушIагъи Хъот Юныс къыхигъэщыгъ. Къэрэщэе-Щэрджэсым тхэквондомкIэ и Федерацие ипащэу Мафэ Бисан игупыкI гъунэ иIэп. БэнэпIэ алырэгъухэр къаритыхи, зэIукIэгъухэр шэпхъэ лъагэхэм адиштэхэу Мыекъуапэ щыкIуагъэх.

Къулаир агъэфедэ

— Зэнэкъокъур дэгъоу зэрэзэхащагъэм ишIуагъэкIэ спортсменхэм якъулай дэгъоу бэнапIэм щагъэфедагъ, — къытиIуагъ Урысыем и Кубок фэгъэхьыгъэ зэIукIэгъухэм ясудья шъхьаIэу, Урысые ыкIи дунэе категорие зиIэ судьяу Сергей Мутовкиным. — Сэ Нижний Новгород сыкъикIыгъ, зэнэкъокъухэм бэрэ сахэлажьэ. Мыекъуапэ лъэшэу тыгу рихьыгъ. БэнакIохэр алырэгъум зытехьэхэкIэ спортым пыщагъэхэр бэрэ Iэгу къафытеощтыгъэх, агу къаIэтыщтыгъ.

— Апэрэ чIыпIэр къыдэсхыгъ, Татарстан сыщыщ, — къытиIуагъ Алена Миронюк. —Бэнэгъухэр дэгъоу кIуагъэх. Адыгеим джыри сыкъэкIонэу сыфай.

— Адыгэ быракъыр зэнэкъокъум щыдгъэ­быбэтагъ, — игупшысэхэм тащегъэгъуазэ Урысыем и Кубок зыфэбанэм апэрэ чIыпIэр къыдэзыхыгъэ тиспортсменкэу Кристина Дюбинам. — Адыгеир спортышхом нахь цIэрыIо зэрэщыхъурэм тегъэгушIо.

— Хабаровскэ сыкъикIыгъэу Адыгэ Рес­публикэм ичIыопс идэхагъэ зысэлъэгъум, синыбджэгъухэм къэбарыкIэу къафэсIота-гъэр макIэп, — къеIуатэ судья шъхьаIэу Икромхон Яхябоевым. — Тхэквондом нахь зиушъомбгъуным Адыгэ Республикэм иIа­хьышIу хишIыхьагъэу сэлъытэ. Республикэм и Правительствэ спортым мэхьэнэ ин зэ­рэритырэр зэнэкъокъум къыщылъэгъуагъ. Адыгеим и ЛIышъхьэ, зэкIэ IэпыIэгъу къытфэхъугъэхэм «тхьашъуегъэпсэу» ятIожьы тшIоигъу. Зэнэкъокъу инхэм язэхэщэнкIэ Адыгеим лъэпсэшIу ышIыгъ.

ЕмтIылъ Нурбый. Сурэтхэм арытхэр: тренерхэр; Икромхон Яхябоевымрэ Хъот Юнысрэ; Адыгэ Рес­публикэм ибэнакIохэр зэнэкъокъух.