Тыжьыныр къыдахын алъэкIыщтыгъэ
Олимпиадэ джэгунхэм ахэлэжьэщтхэр къыхэхыгъэнхэм фэгъэхьыгъэ зэнэкъокъур кушъхьэфэчъэ спортымкIэ Пензэ щыкIуагъ.
ЗэIукIэгъухэм командэхэр зэхэпхъагъэхэу ахэлэжьагъэх. Бзылъфыгъэхэри, хъулъфыгъэхэри якомандэхэм ахэтхэу зэнэкъокъугъэх. Апэрэ мафэм бзылъфыгъэхэм километрэ 25-рэ, ятIонэрэм км 125-рэ, хъулъфыгъэхэм апэрэ мафэм км 40, ятIонэрэм км 189-рэ къачъых.
Санкт-Петербург изэхэпхъэгъэ командэ апэрэ чIыпIэр къыдихыгъ. Санкт-Петербург иятIонэрэ командэ ятIонэрэ чIыпIэр ыхьыгъ. Адыгэ Республикэм ихэшыпыкIыгъэ зэхэпхъэгъэ командэ ящэнэрэ чIыпIэр къыдихыгъ.
Адыгеим испортсменхэр Санкт-Петербург икомандэу тыжьыныр зыхьыгъэм зы нэгъэупIэпIэгъукIэ ыуж къинагъ.
— ЗэIэпахырэ зэнэкъокъум тизэхэпхъэгъэ хэшыпыкIыгъэ командэ я 3-рэ чIыпIэр къызэрэщыдихыгъэм тигъэгушIуагъ, — къытиIуагъ Адыгэ Республикэм кушъхьэфэчъэ спортымкIэ и Федерацие итхьаматэу Анатолий Лелюк. — Урысыем кушъхьэфэчъэ спортымкIэ и Федерацие зэфэхьысыжьхэр ышIыщтых, Олимпиадэ джэгунхэу Токио щыкIощтхэм ахэлэжьэщтхэр къыхихыщтых.
Республикэм ихэшыпыкIыгъэ командэу джэрзыр къыдэзыхыгъэм хэтхэм тигъэзетеджэхэр ащытэгъэгъуазэх: СтIашъу Мамыр, Александр Евтушенко, Валерий Исламов, Елизавета Арчибасова, Алена Рицева, Гюнель Мехтиева.
Адыгэ Республикэм изаслуженнэ тренерэу Алексей Войновым бзылъфыгъэ командэм хэтхэр егъасэх. Юрий Курочкинымрэ Анатолий Лелюкрэ хъулъфыгъэхэм ятренерых.