Европэм футболымкIэ изэнэкъокъу къэлэ 11-мэ ащэкIо.

Урысыем ихэшыпыкIыгъэ коман­дэ ешIэгъуи 3 иIагъ. КIэух­хэм шъуащытэгъэгъуазэ. Бельгиер — Урысыер — 3:0, Урысыер — Финляндиер — 1:0, Даниер — Урысыер — 4:1.

Урысыер Данием зэрэде­шIагъэм спортым хэшIыкI фызиIэхэр джыри бэрэ тегущыIэщтых. Тэ анахьэу къыхэдгъэ­щырэр Данием щыкIогъэ зэIу­кIэгъум тиешIакIохэм яIэпэIэсэныгъэ икъоу къыщагъэлъэгъон зэрамылъэкIыгъэр ары.

Пчъагъэр зэфэдэу аухмэ Урысыер финалым и 1/8-м хэхьан ылъэкIыщтыгъ. Арэу щытми, тихэшыпыкIыгъэ командэ ешIэгъур шIозыхьыгъэр ауж къинэрэ Даниер ары.

Пчъагъэр 0:2-у зэнэкъокъур тшIуахьызэ, Данием иешIакIохэм ащыщ шапхъэхэр ыукъуагъэх. А. Соболевым дысэу къыпэуцуи, ешIапIэм щытыригъэфагъ. Пенальтир А. Дзюбэ дэгъоу ыгъэ­цэкIагъ, хъагъэм Iэгуаор ридзагъ — 1:2.

Гугъэм икъежьапI

Урысыем иешIакIохэр нахьыбэрэ апэкIэ илъыхэу зыфежьэхэм, гугъэ афытиIэу зэнэкъокъум тылъыплъэщтыгъ. Пчъагъэр 2:2 хъун ылъэкIыщтэу къытщы­хъущтыгъ. А. Головиным, А. Со­болевым, А. Дзюбэ, нэмыкIхэм Данием иухъумакIохэр агъэгумэкIыщтыгъэх. ТиешIакIохэр апэкIэ зылъыкIуатэхэкIэ теубытэгъэ икъу къызхагъафэщтыгъэп.

ОшIэ-дэмышIэу тиухъумакIохэм ащыщ хэукъоныгъэ ышIыгъ. Iэгуаор къызызэкIедзэжьым, ти­къэлэпчъэIутэу М. Сафоновым IэкIэхьагъэп. Данием иешIакIо къэлапчъэм Iэгуаор дидзагъ — 3:1.

Гугъэу тиIэр нахь макIэ хъугъэу тиухъумакIохэр икIэрыкIэу хэукъох, Данием иешIакIо пчъагъэм хегъахъо — 4:1.

Зыкъиухъумэным фэмыхьазырым текIоныгъэр къыдихын зэри­мылъэкIыщтым ехьылIэгъэ тхыгъэу шIэныгъэлэжьхэм яIэр шъэ пчъагъ. ТиешIакIохэр ащ щы­гъуазэхэп е ухъумэн Iофыгъохэм афэхьазырхэп.

«Зенит» итренер шъхьаIэу Сергей Семак пэшIорыгъэшъэу къыIогъагъ: «Апэу тиешIакIохэр зыпылъынхэ фаер якъэлапчъэ къызэраухъумэщтыр ары. Амал агъотмэ, апэкIэ илъыщтых, хъагъэм Iэгуаор радзэным фэбэ­нэщтых».

Даниер командэ лъэшэп. Урысыем икомандэ дэеу зэрешIагъэр ыгъэфеди, текIоныгъэр къы­дихыгъ.

Европэм футболымкIэ изэнэ­къокъу лъэкIуатэ, бэдзэогъум и 11-м аухыщт.