АР-м терроризмэм пэуцу­жьыгъэнымкIэ икомиссие изэ­хэсыгъоу Адыгеим и ЛIы­шъхьэу КъумпIыл Мурат тхьа­мэтагъор зыщызэрихьагъэр республикэм и Правительствэ зычIэт унэм тыгъуасэ щыкIуагъ.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, Урысые Федерацием и Президент и Полномочнэ лIыкIоу КъФШъ-м щыIэм иаппарат АР-мкIэ ифедеральнэ инспектор шъхьаIэу Сергей Дрокиныр, АР-м и Премьер-­министрэу Геннадий Митрофановыр, АР-м иминистрэхэм я Кабинет хэтхэр, АР-м ипрокура­турэ, щынэгъончъэнымкIэ Фе­де­ральнэ къулыкъум Адыгэ РеспубликэмкIэ и ГъэIорышIапIэ, АР-м и МВД, АР-м и МЧС, муниципальнэ образованиехэм япащэхэр.

ХьапсчIэсхэр радикальнэ ислъамым пыхьанхэр къызы­хэкIырэм, чIыпIэ зыгъэIоры­шIэ­жьынымкIэ къулыкъухэм яIоф­шIэн зэрэзэхащэрэм, террориз­мэм пэуцужьыгъэнымкIэ уплъэ­кIунхэр зэрэзэхащэрэм япхыгъэ Iофыгъохэм зэхэсыгъом щатегущыIагъэх. Хэбзэ Iофы­шIэхэм, хэбзэухъумэкIо къулыкъухэм, общественнэ организациехэм зэдэлэжьэныгъэ пытэ зэдыряIэн зэрэфаер респуб­ли­кэм и ЛIышъхьэ къыхигъэ­щыгъ.

«Лъэпкъ, дин зэфыщытыкIэ­хэмкIэ Адыгеим непэ зыпкъиты­ныгъэ илъ. Терроризмэм пэуцужьыгъэнымкIэ республикэ комиссием унашъоу ыштэхэрэр чIыпIэхэм дэх имыIэу ащагъэцэкIэнхэ фае. Лъэпкъхэм якультурэ зырагъэушъомбгъуным, со­циальнэ зыпкъитыныгъэ щы­Iэным лъэшэу тынаIэ атедгъэ- тын фае», — къыIуагъ КъумпIыл Мурат.

Пщыныжь языгъэхьырэ Федеральнэ къулыкъум Адыгэ РеспубликэмкIэ и ГъэIорышIапIэ ипащэу Виталий Перхорович хьапсчIэсхэр экстремизмэм пыщагъэ мыхъунхэмкIэ Iофэу ашIэрэм фэгъэхьыгъэу къыIотагъ. Ащ къызэрэхигъэ­щыгъэмкIэ, мы лъэныкъомкIэ пщыныжь языгъэхьырэ учреж­дениехэм зыпкъ итэу Iоф ашIэ. ХьапсчIэсхэр психологхэм, дин­лэжьхэм ренэу аIуагъакIэх.

Пщыныжь ягъэхьыгъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ терроризмэм пэуцужьыгъэнымкIэ комиссием хэтхэм зэдэлэжьэныгъэу адыриIэр гъэпы­тэгъэным мэхьанэшхо зэриIэр республикэм и ЛIышъхьэ хигъэу­нэфыкIыгъ.

АР-м лъэпкъ IофхэмкIэ, Iэ­кIыб къэралхэм ащыпсэурэ ти­лъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхэсыгъом къызэрэщи­IуагъэмкIэ, муниципалитетхэм япащэхэм адэжь щызэхэщэгъэ Советхэу лъэпкъ зэфыщытыкIэхэм ягъэпытэнрэ дин ор­га­низациехэм гъусэныгъэ ады­ря­Iэнымрэ афэгъэзагъэхэм зе­гъэушъомбгъугъэ зэхэсыгъохэр район заулэмэ мыгъэ ащыря­Iагъэх. Ащ нэмыкIэу терроризмэм пэуцужьыгъэным тегъэ­псыхьэгъэ Iэнэ хъураехэри зэ­хащэгъагъэх. Ащ фэдэ Iофтхьабзэхэм терроризмэм пэуцужьыгъэнымкIэ муниципальнэ комиссиехэм ахэтхэр, Адыгеимрэ Пшызэ шъолъыррэ ащы­псэурэ быслъымэнхэм я Дин­дэлэжьапIэ, Мыекъуапэрэ Адыге­имрэ яепархие, обществен­нэ организациехэм япащэхэр хэлэжьагъэх. Лъэпкъ зэфыщытыкIэхэм алъэныкъокIэ зэмызэгъыныгъэхэр къэмыхъунхэм епхыгъэ Iофыгъохэм лъэшэу ахэм анаIэ щатырагъэтыгъ.

Адыгэкъалэрэ Тэхъутэмыкъое районымрэ япащэхэу ЛIы­хэсэ Махьмудрэ Шъхьэлэхъо Азмэтрэ зэхэсыгъом къыщыгущыIагъэх. Терроризмэм пэуцу­жьыгъэнымкIэ Iофэу ашIэрэм, IэкIыб къэралыгъохэм къарыкIыхэрэр зэратхыхэрэм ыкIи нэмыкI Iофыгъохэм ахэм ягугъу къашIыгъ.

КъумпIыл Мурат муници­пальнэ псэупIэхэм япащэхэм анаIэ тыраригъэдзагъ хэбзэу­хъумэкIо къулыкъухэу кощын Iофыгъохэм афэгъэзагъэхэм зэдэлэжьэныгъэу адыряIэр нахь зэрагъэпытэн фаем. Республи­кэм ипсэолъэшIыпIэхэу IэкIыб къэралыгъохэм къарыкIыгъэхэм Iоф зыщашIэхэрэм уплъэкIунхэр ащызэхащэнхэм мэхьанэшхо зэриIэр, илъэсыкIэ еджэгъур къызэрэблагъэрэм епхыгъэу гъэсэныгъэ языгъэгъотырэ учреждениехэм терроризмэм пэ­у­­цужьыгъэным зэрэфэхьазыр­хэмкIэ паспортхэр къаIахын зэрэфаер хигъэунэфыкIыгъэх.

Адыгэ Республикэм и Комитетэу чIыпIэ зыгъэIорышIэжьынымкIэ къулыкъухэм адэла­жьэрэм итхьаматэ игуадзэу Долэ Долэт терроризмэм пэуцужьыгъэнымкIэ политическэ, социальнэ-экономическэ процессхэр зэрауплъэкIухэрэр къыIотагъ.

Республикэм и ЛIышъхьэ къулыкъум ипащэ пшъэрылъ фи­шIыгъ мы лъэныкъомкIэ Iофэу ашIэрэр нахь агъэлъэшы­нэу. Терроризмэмрэ экстремиз­мэмрэ япхыгъэ зэщыгъэкъокIо кIуачIэхэр къыздикIыхэрэр нахь куоу зэхэфыгъэн фаеу ащ ылъы­тагъ. Мы лъэныкъомкIэ муниципалитетхэм яIофышIэхэм яIэ­пэIэсэныгъэ зыкъегъэIэты­гъэн зэрэфаем анаIэ тыраригъэдзагъ.

Коронавирусым пэуцужьы­гъэным фэшI прививкэ зарагъэ­шIыным цIыфхэр тегъэгушIухьэгъэнхэмкIэ пшъэрылъхэр КъумпIыл Мурат зэхэсыгъом икIэух къыщигъэнэфагъэх.

АР-м и ЛIышъхьэ ипресс-къулыкъу