Урысыем и Кубок тхэквондомкIэ къыдэхыгъэным, хэгъэгум ишъолъыр­хэм якомандэхэм язэнэкъокъу мэкъуогъум и 17-м Мыекъуапэ къыщы­зэIуахыгъ, непэ аухыщт.

— Хэгъэгум ишъолъыр 36-мэ ябэнэкIо 350-рэ фэдиз зэIукIэгъухэм ахэлажьэ, — къыти­Iуагъ зэнэкъокъум исудья шъхьа­Iэу Сергей Мутовкиным.

— Зэнэкъокъум изэхэщэн Адыгэ Республикэр зэрэфэхьазырым укъытегущыIэ тшIоигъу.

— Адыгэ къэралыгъо университетым испорт Унэшхоу Кобл Якъубэ ыцIэ зыхьырэм зэнэ­къокъур щэкIо. Гуфэбэныгъэ ахэлъэу бысымхэр къытпэгъо­кIыгъэх. Нэрылъэгъу IэпыIэгъу­хэр лъэгъупхъэх, зэхэщэн Iоф­хэр дэгъоу агъэцэкIагъэх. Сэ Нижний Новгород сыщыщ. Адыгеим тыкъэкIоным ыпэкIэ шъолъырхэм ятренерхэр, судья­хэр гумэкIыщтыгъэх. Адыгеир зэнэкъокъум зэрэфэхьазыр шIы­кIэр амышIэу упчIэхэр къы­татыщтыгъэх. Мыекъуапэ ты­къызэкIом IофшIагъэу тлъэгъугъэм тигъэрэхьатыжьыгъ. Рес­публикэм и Правительствэ, университетым ипащэхэм та­фэраз. Зэнэкъокъур Адыгеим дэгъоу зэрэщыкIощтым тицыхьэ телъ.

— Тхэквондор Олимпиа­дэ джэгунхэм ахахьэрэ спорт лъэпкъхэм ащыщ.

— Токио щыкIощт олимпиа­дэ джэгунхэм Урысыем испорт­смен­хэр ахэлэжьэщтых. Тхэквондор спорт лъэпкъ гъэшIэ­гъон, ау зэнэкъокъухэм яплъыхэрэм япчъагъэ сшIомакI.

— Сыда ар къызыхэ­кIырэр?

— Тхэквондор зыфэдэ спорт лъэпкъыр Урысыем икъоу ща­шIэрэп. Гъэзетхэр, телевиде­ниер, радиор, нэрылъэгъу Iэпы­Iэгъухэр нахьышIоу къызы­фэдгъэфедэнхэ фае. ЗэIукIэгъу гъэ­шIэгъонхэр зэхатщэхэзэ, тхэквондом шэн-хэбзэ дэгъоу хэлъхэр, искуссствэ дахэу зэ­рэщытыр цIыфхэм алъыдгъэIэсынэу едгъэжьагъэшъ, Iофыр дэгъоу лъыкIотэщтэу тэгугъэ.

— Тхэквондор искусствэм ебгъапшэмэ, упчIабэ къэтэджы.

— КъызгурэIо зыфапIорэр. Тхэквондом пхъашэу щызэпэуцух, щызэбэных. Спортсменхэм шъобжхэр атыращэхэу къыхэкIы. Арэу щытми, къыхэзгъэщы сшIоигъу бэнакIохэр зэрэ­фэпагъэхэр, щынэгъончъагъэм ахэр зэрэфытегъэпсыхьагъэхэр. Спорт шъуашэм ухъумэн Iофыгъохэр егъэцакIэх.

— Зэнэкъокъум текIоныгъэр къыщыдэхыгъэным фэшI сыда анахьэу къыхэбгъэщырэр?

— Алырэгъум утехьэмэ, ущы­нэ хъущтэп. Зэфагъэ ахэлъэу судьяхэр зэрэзекIощтхэм цыхьэ фэпшIыныр нахь тэрэз. Спорт шапхъэхэр бэнакIохэм дэгъоу зэрагъашIэх. Мыхъо-мышIагъэ­хэр алырэгъум щызэрахьэрэп. Спортыр зэнэкъокъу къодыеп. ЦIыфыгъэ къыпхэфэныр, спорт шапхъэхэр бгъэцэкIэнхэр Iофыгъо шъхьаIэхэм ахэтэлъытэх.

— Зэнэкъокъур ежъу­гъэжьагъ. Мыекъуапэ щышъулъэгъугъэхэм къа­тегущыIэба.

— Бысымхэр дэгъу дэдэу къызэрэтпэгъокIыгъэхэр къыхэзгъэщыгъ. Республикэм испорт еджапIэ ипащэу Хъот Юныс, хэбзэ къулыкъушIэхэм гущыIэгъу тафэхъунэу игъо тифагъ. Адыге­им ичIыпIэ дахэхэр зэдгъэ­лъэгъухэ тшIоигъу.

— Лъэпкъ ансамблэу «Аб­рекхэр» зэнэкъокъум икъызэIухыгъо зэрэу­джы­­гъэр шъугу рихьы­гъэу сэлъытэ, бэрэ Iэгу шъуфытеуагъ.

— Адыгэхэм яфольклор гъэшIэгъон дэд. КIэлэцIыкIухэм ялъэпкъ къашъохэр мэшIолы­гъэм фэсэгъадэх, гур зыIэпащэ. ПсынкIэу къызэрэшъохэрэр, лъапэкIэ зэрэуцухэрэр умы­гъэшIэгъон плъэкIырэп.

— Пщынаоу Ешыгоо Аскэр, художественнэ пащэу ТхьакIумэщэ Налбек…

— Ахэр апэрэу тлъэгъугъэх, тагъэгушхуагъ. Зэнэкъо­къур Мыекъуапэ дэгъоу щыкIощт, ащ сицыхьэ телъ. Тафэраз зэхэщакIохэм.

— Зэнэкъокъур дэгъоу зешъущэнэу, шъуимурадхэр къыжъудэхъунхэу шъуфэтэIо.

— Тхьауегъэпсэу.

Сахьидэкъо Нурбый. Сурэтхэм арытхэр: зэнэ­къо­къум исудья шъхьаIэу Сергей Мутовкиныр; зэIукIэгъухэр алырэгъум щэкIох.