«Мыекъуапэ инэфылъэхэм» тафэгушIо
КIэлэцIыкIухэмрэ ныбжьыкIэхэмрэ яхудожественнэ творчествэ фэгъэхьыгъэ Дунэе фестиваль-зэнэкъокъоу «Адыгеим ижъогъожъыехэр» мэкъуогъум и 18 —20-м Мыекъуапэ щыкIуагъ.
Урысыем, Адыгеим культурэмкIэ яминистерствэхэм, АР-м лъэпкъ культурэмкIэ и Гупчэ зэхащэгъэ зэхахьэм хэгъэгу 15-мэ яныбжьыкIэхэр, Урысыем ишъолъырхэм ялIыкIохэр хэлэжьагъэх.
НыбжьыкIэхэм орэд къаIуагъ, къэшъуагъэх, усэхэм къяджагъэх, музыкальнэ Iэмэ-псымэхэмкIэ мэкъамэхэр къырагъэIуагъэх.
ОсэшI купым итхьаматэу, Урысыем, Адыгеим, Ингушетием культурэмкIэ язаслуженнэ IофышIэу, КъокIыпIэм щыпсэурэ лъэпкъхэм искусствэхэмкIэ я Къэралыгъо музей ипащэу ШъэуапцIэкъо Аминэт фестиваль-зэнэкъокъум хэлэжьагъэхэм, хагъэунэфыкIырэ чIыпIэхэр къыдэзыхыгъэхэм къафэгушIуагъ. Фестивалым итын анахь лъапIэу «Гран-при» зыфиIорэр дунаим щызэлъашIэрэ ансамблэу «Мыекъуапэ инэфылъэхэм» ритыжьыгъ.
«Мыекъуапэ инэфылъэхэм» яхудожественнэ пащэу, Урысыем культурэмкIэ изаслуженнэ IофышIэу, Адыгеим инароднэ артистэу, Къэбэртэе-Бэлъкъарым изаслуженнэ артистэу Нэныжъ Айдэмыр фестивалым хэлэжьагъэхэр фэгушIуагъэх.