Адыгеим икъэбэртэе шы лъэпкъэу Налмэсыр дунэе къэгъэлъэгъонэу «Иппосфера-2021-м» хэлажьи, ятIонэрэ чIыпIэр къыфагъэшъошагъ.

Шы лъэпкъхэм якъэгъэлъэгъон Санкт-Петербург щызэхащагъ. Урысыем, СНГ-м яшъолъырхэм къаращыгъэ шы лъэпкъ зэфэ­шъхьаф 200-м нахьыбэмэ зэхэщакIохэм уасэ афашIыгъ.

Зэхэт IофшIапIэу «Шыу Хасэм» ишыухэм Адыгэ Республикэр фестиваль-зэнэкъокъум къы­щагъэлъэгъуагъ. Мэфи 4-м шы лъэпкъхэм яплъыгъэх. ЗэIукIэ­гъухэр шъоф зэIухыгъэм щы­кIуагъэх. Конкурым, шыхэр зы­хэлажьэхэрэ спектаклэхэм, IэпэIасэм иеджапIэ, нэмыкIхэм ащызэнэкъокъугъэх.

«Къэбэртэе шы лъэпкъыр» зыфиIорэм Адыгеим, Къэбэр­тэе-Бэлъкъарым, Къэрэщэе-Щэрджэсым яшыхэр хэлэжьагъэх. Кощ­хьаблэ щыщэу Зыхьэ Руслъан ишэу Налмэсым апэрэ чIыпIэр къыдихыгъ.

Шы лъэпкъ зэфэшъхьафхэу зэ­нэкъокъум анахь дэгъукIэ ща­лъытагъэхэр фестивалым икIэух щызэрагъэпшагъэх. Налмэсым ятIонэрэ чIыпIэр къызэрэдихы-гъэм тигъэгушIуагъ.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ зэнэ­къо­къухэм «Шыу Хасэр» ахэлэ­жьэщт. Гъэхъагъэу ышIыхэрэмкIэ Адыге­им ищытхъу спортышхом лъагэу щиIэтыщт. Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан къытиIуагъ шы спортым зегъэу­шъомбгъугъэным ехьылIэгъэ Iоф­тхьабзэхэм язэхэщэнкIэ унэшъо хэхыгъэхэр зэрашIыгъэхэр.