Хэгъэгур гушхоныгъэм егъэпытэ
Хэгъэгум и Мафэ фэгъэхьыгъэ мэфэкI концертыр Мыекъуапэ ипчэгу шъхьаIэу В. И. Лениным ыцIэ зыхьырэм щыкIуагъ.
МэфэкI шъуашэм диштэу къалэм ипчэгу зэIухыгъ. Урысыем изыкIыныгъэ гъэпытэгъэным, цIыфхэм ящыIакIэ нахьышIу хъуным афэгъэхьыгъэ тхыгъэхэр нэплъэгъум итых, хэгъэгум ибыракъ ныбжьыкIэхэм агъэбыбатэ. МэфэкI зэхахьэр зезыщэхэрэ артистхэу Хьакъуй Андзаур ыкIи Мэкъулэ Руслъан Урысыер къэралыгъо гъэпсыкIэ иIэу зэрэпсэурэм, хэгъэгум итарихъ къаIотагъэх, Конституцием ехьылIэгъэ усэхэм къяджэх, Урысыем инеущрэ мафэ нахьышIу зэрэхъущтым къытегущыIэх.
Концертыр
Хэгъэгушхоу лъэпкъыбэ зыщыпсэурэм ихэхъоныгъэхэр музыкальнэ искусствэм щытэлъэгъух. Адыгэ Республикэм и Къэралыгъо филармоние и Къэралыгъо симфоническэ оркестрэ композитор цIэрыIоу Нэхэе Аслъан ыусыгъэ «Нарт рапсодиемкIэ» концертыр къызэIуихыгъ. Оркестрэм идирижер шъхьаIэу, Адыгэ Республикэм изаслуженнэ артистэу Аркадий Хуснияровыр музкантхэм япащэу орэдышъор агъэжъынчыгъ.
Адыгэ Республикэм изаслуженнэ артистэу Виктор Марковым «Сикъэралыгъо ибыракъ» зыфиIорэ орэдыр къыIуагъ. Урысыем ехьылIэгъэ орэдхэмкIэ ансамблэу «Ошъутенэм» иартистхэу Даутэ Сусанэ, Мамхыгъэ Маринэ, Юрий Конжиным зэхахьэр лъагъэкIотагъ.
Республикэм и Къэралыгъо Камернэ музыкальнэ театрэу А. Хьанэхъум ыцIэ зыхьырэм иартистхэр зэхахьэм чанэу хэлэжьагъэх. Адыгэ Республикэм инароднэ артисткэу Ирина Кириченкэм, республикэм изаслуженнэ артисткэу Елена Лепиховам хэгъэгум ичIыгу, идэхагъэ афэгъэхьыгъэхэ орэдхэр мэкъэ IэтыгъэкIэ къаIуагъэх.
Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артистэу Дзыбэ Мыхьамэт мэфэкIым, лъэпкъхэм языкIыныгъэ яхьылIэгъэ орэдхэм таригъэдэIугъ.
Анахьэу тызыгъэгушIуагъэхэм ащыщ Адыгэ Республикэм изаслуженнэ артистэу Еутых Вячеслав. АдыгабзэкIэ къыIуагъэхэ орэдхэу Мыекъуапэ, хэгъэгум, шIулъэгъум афэгъэхьыгъэхэр гум къегущыIыкIых.
Республикэм и Лъэпкъ театрэу И. Цэим ыцIэ зыхьырэм иартисткэу Нэхэе Мэрджанэт Урысыем ехьылIэгъэ усэм къеджагъ. АР-м искусствэхэмкIэ иколледж щеджэхэрэ Къэгъэзэжь Алисэрэ Елизавета Призовамрэ мэфэкIым ехьылIэгъэ орэдыр зэхытагъэхыгъ.
Республикэм и Къэралыгъо филармоние и Къэралыгъо урыс лъэпкъ оркестрэу «Русская удалым» концертыр къыгъэдэхагъ. Анастасия Истамуловам гушхоныгъэ хэлъэу зэлъашIэрэ орэдэу «Я лечу над Россией» мэкъэ IэтыгъэкIэ къыIуагъ.
Нысхъэпэ театрэм иартистэу Ованес Тотосян, ансамблэхэу «Долинам», «Сюрпризым», «Радугэм», «Мыекъуапэ инэфылъэхэм», искусствэхэмкIэ республикэ колледжэу У. Тхьабысымэм ыцIэ зыхьырэм, нэмыкIхэм орэдхэр къаIуагъэх, къэшъуагъэх.
Адыгэ Республикэм и Къэралыгъо ансамблэу «Ислъамыем» Урысыем щыпсэурэ лъэпкъхэм язэпхыныгъэхэр гъэпытэгъэнхэм фэгъэхьыгъэ орэдхэр урысыбзэкIи, адыгабзэкIи ыгъэжъынчыгъэх, ансамблэм икъэшъуакIохэр уджыгъэх.
Адыгэ Республикэм культурэмкIэ и Министерствэ зэхищэгъэ пчыхьэзэхахьэм, режиссерыр Адыгеим искусствэхэмкIэ изаслуженнэ IофышIэшхоу Хьакъуй Аслъан, нэбгырабэ еплъыгъ, лъэпкъ зэфэшъхьафхэр зэфищагъэх. Республикэм щыпсэухэрэм, хьакIэхэм языгъэпсэфыгъо уахътэ гум шIукIэ къинэжьынэу агъэкIуагъ.
ЕмтIылъ Нурбый. Сурэтхэр мэфэкI зэхахьэм къыщытетхыгъэх.