Г. Мехтиевам иджэрз
Урысыем кушъхьэфэчъэ спортымкIэ изэIукIэгъухэр Воронеж щыкIуагъэх.
Мыжъо гъогум бзылъфыгъэхэр щызэнэкъокъугъэх. Адыгэ Республикэм кушъхьэфэчъэ спортымкIэ иеджапIэ зыщызыгъэсэрэ Гюнель Мехтиевам критериумым ящэнэрэ чIыпIэр къыщыдихыгъ.
Адыгэ Республикэм изаслуженнэ тренерэу Алексей Войновым зэнэкъокъум фигъэхьазырыгъэ Г. Мехтиевар Урысыем спортымкIэ имастер, хэгъэгум изэIукIэгъухэм медальхэр пчъагъэрэ къащихьыгъ.
Воронеж щыкIогъэ зэнэкъокъум Урысыем ишъолъыр 25-рэ фэдизмэ къарыкIыгъэхэр хэлэжьагъэх. Москва щыщэу Галина Чернышовам апэрэ чIыпIэр къыдихи, шIухьафтын шъхьаIэр фагъэшъошагъ. СпортымкIэ дунэе класс зиIэ мастерэу, Санкт-Петербург зыщызыгъэсэрэ Гульназ Хатунцевам тыжьыныр Воронеж къыщихьыгъ.