Шъолъырхэм академическэ музыкэмкIэ яфе­стиваль фэгъэхьыгъэ концертхэр Адыгеим и Къэралыгъо филармоние щыкIуагъэх.Адыгэ Республикэм культурэмкIэ и Министерствэ, АР-м и Къэралыгъо филармоние зэхащэгъэ Iофтхьабзэр мэкъуогъум и 3 — 4-м академическэ музыкэм имэфэкI хъугъэ.

Фестивалым фэгъэхьыгъэ нэрылъэгъу IэпыIэгъухэр гъэ­шIэгъонэу гъэпсыгъэх. Мэкъэ­гъэIухэр филармонием дэжь щыолъэгъух. Концертхэр зэрэ­кIощтхэм, хэлэжьэщтхэм яхьылIэгъэ тхыгъэхэм уагъэгъуазэ.

АР-м культурэмкIэ иминист­рэу Аулъэ Юрэ зэхэщэкIо купым итхьамат. Купым хэтых АР-м культурэмкIэ иминистрэ иапэрэ гуадзэу Ольга Гавшинар, культурэмкIэ Министерствэм иотдел ипащэу Шэуджэн Бэлэ, АР-м и Къэралыгъо филармоние ипащэу Къулэ Мыхьамэт, Адыгэ Республикэм икомпозиторхэм я Союз итхьаматэу, республикэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу Нэхэе Аслъан, Адыгэ Республикэм ис­кусствэхэмкIэ иколледжэу Тхьабысымэ Умарэ ыцIэ зыхьырэм ипащэу Куфэнэ Щамсэт, АР-м и Къэралыгъо филармоние и Къэралыгъо симфоническэ оркестрэ ихудожественнэ пащэу Темыркъанэ Петр, филармонием ипащэ игуадзэу Алена Поповар.

Къэгъэлъэгъонхэр

Республикэм искусствэхэмкIэ ихудожественнэ кIэлэцIыкIу еджапIэ, АР-м искусствэхэмкIэ икIэлэцIыкIу еджапIэу N 6-м защызыгъасэхэрэм ашIыгъэ сурэтхэр дахэх, лъэгъупхъэх. Илъэс 12 — 15 зыныбжь еджа­кIохэм чIыопсым, тыкъэзыуцу­хьэрэ дунаим еплъыкIэу фыряIэр, лIыхъужъныгъэм, шIэжьым, фэшъхьафхэм афэгъэхьыгъэ ягупшысэхэр сурэтхэмкIэ къыраIотыкIых. Музыкальнэ Iэмэ­-псымэхэр зыIыгъ артистхэм, Мыекъуапэ ичIыпIэ дахэхэм аты­рашIыкIыгъэ сурэтхэм концертым къэкIуагъэхэр ашIогъэшIэгъонэу яплъыгъэх.

УядэIуныр гуапэ

Республикэм и Къэралыгъо симфоническэ оркестрэ пчы­хьитIум музыкальнэ произве­дение 33-рэ филармонием къыщыригъэIуагъ. Урысыем, Къэ­бэртэе-Бэлъкъарым язаслуженнэ артистэу, дирижерэу Темыр­къанэ Петр Къэрданэ Хьэсанэ ипроизведениекIэ фестивалыр къызэIуихыгъ. Композитор цIэ­рыIом илъэныкъо гупсэ фэгъэ­хьыгъэу ыусыгъэм кIэлэцIыкIугъор, узыщапIугъэ лъэныкъо гу­псэр, къуаджэу е къалэу узы­­щыщыр, щыIэныгъэ гъогоу къэпкIугъэр, къыппэблэгъэ цIыф­хэр нэгум къыкIегъэуцох.

П. Чайковскэм, И. Штраус, Ж. Бизе япроизведениехэр, нэ­мыкIхэри залым щыIугъэх. Опе­рэу «Евгений Онегин», «Кармен» зыфиIохэрэм, фэшъхьаф­хэм къахахыгъэ пычыгъохэм тядэIугъ.

Адыгэ музыкальнэ искусствэм хэхъоныгъэ ин фэзышIыгъэ композитор цIэрыIоу Даур Ас­лъан ыусыгъэ «Симфоническэ къашъохэр» оркестрэм зэхы­тигъэхыгъэх. Зэлъэпкъэгъухэм язэпхыныгъэхэр искусствэм щы­зыгъэпытэгъэ А. Даурыр иIоф­шIагъэкIэ непи къытхэт. Ыгу къытемыожьырэми, лъэужэу къыгъэнагъэм цIыфыбэ рэкIо.

Урысыем, Адыгеим янароднэ артистэу, композиторэу Нэхэе Аслъан кIэу ыусыгъэ произведением лъэпкъ музыкальнэ ис­кусствэр къыгъэбаигъ. «Нартхэм ярапсодие» гур зэредзэ, егъэлъыхъо, егъэгушхо. БлэкIыгъэ лъэхъаным уфызэплъэкIы­жьызэ, адыгэр нарт лIыхъужъ лъэпкъэу дунаим зэрэтетым уегупшысэ. Адыгэ шыум, лъэпкъ шъуашэм ятеплъэ дахэ, тишъуа­шэ кавказ илъэпкъхэм къякIоу зэращыгъым, гъэхъагъэу тиIэхэм нэшIукIэ зафэощэи.

Симфоническэ оркестрэм иди­рижер шъхьаIэу, Адыгэ Рес­публикэм изаслуженнэ артистэу Аркадий Хуснияровым гукIи, псэкIи музыкантхэм Iоф адешIэ. Оркестрэр ыгъэдаIозэ, ком­позиторым произведением хилъ­хьэгъэ лъэпкъ гупшысэр, адыгэ мэкъамэхэр къабзэу, зэгъэфагъэхэу типкъынэ-лынэхэм къа­лъегъэIэсых.

Дунэе классикэр зыгъэбаирэ музыкальнэ произведениехэм «Нартхэм ярапсодие» ахэтлъы­тэзэ, оркестрэм едэIухэрэм гукIэ зафэтэгъазэ. Тарихъым къы­пкъырыкIырэ IофшIагъэу ком­позиторым иIэхэм зызэрау­шъомбгъурэр гукIэ олъэгъу.

А. Хачатурян ибалетэу «Гаянэ» къыхэхыгъэ «Лезгинкэр» оркестрэм къызырегъаIом, дунаим щашIэрэ къашъоу «Лезгинкэм» имэкъамэхэм тхьакIу- мэр агъашIозэ гум щычэрэгъугъ.

Композиторхэу П. Чайковскэм, Дж. Россини, И. Кальман, Дж. Верди япроизведениехэр апэрэ пчыхьэзэхахьэм щызэхэтхыгъэх.

Фестивалыр къагъэдэхагъ

Кисловодскэ и Темыр-Кавказ къэралыгъо филармониеу В. И. Сафоновым ыцIэ зыхьырэм иартист цIэрыIохэу Анна Павловскаям, ащ ишъхьэгъусэу Мэ­къуао Астемир классикэм хэхьэгъэ произведениехэр къа­Iуагъэх.

АР-м и Къэралыгъо филармо­ние исимфоническэ оркестрэ хэтхэу, Адыгэ Республикэм ина­роднэ артисткэу Ольга Мами­кьян, Адыгеим изаслуженнэ артисткэу Любовь Гуль скрипкэмкIэ орэдышъор къыхадзэзэ, оркестрэр къадежъыугъ.

Къэралыгъо филармонием, АР-м и Къэралыгъо орэдыIо-­къэшъокIо ансамблэу «Ислъамыем» яорэдыIоу Дзыбэ Рус­лъан мэкъэ IэтыгъэкIэ композиторэу Дж. Верди, нэмыкIхэм аусыгъэ произведениехэр къыIуагъэх.

Филармонием иорэдыIоу, Адыгэ Республикэм инароднэ артисткэу Нэгъой Маринэ классикэм хэхьэгъэ произведениехэр, Жэнэ Къырымызэрэ Сэмэгу Гощнагъорэ зэдаусыгъэ орэдэу адыгэхэм яшэн-хабзэ фэгъэхьыгъэр къыIуагъэх, залым чIэсхэр къыдежъыугъэх.

Композиторэу Нэхэе Аслъан ыусыгъэ оперэу «Бзыикъо заом» къыхэхыгъэ пычыгъохэр, Кавказ шъолъырым фэгъэхьыгъэ произведениехэу Урысыем иком­позиторхэм аусыгъэхэр оркест­рэм къыригъэIуагъэх. Концертым хэ­лэжьагъ оркестрэм идирижерэу СтIашъу Къэплъан.

Филармонием илектор-музыковедэу Ирина Ибрагимовам композиторхэм, артистхэм, про­изведениехэм яхьылIэгъэ къэбархэр гъэшIэгъонэу къыIота­гъэх, зэхахьэр дэгъоу зэрищагъ.

Адыгэ Республикэм культу­рэмкIэ иминистрэу Аулъэ Юрэ дирижерхэм, артистхэм гущыIэ фабэхэр къафиIуагъ, щытхъу тхылъхэр аритыжьыгъ.

Концертыр Г. Свиридовым ыусыгъэ «Время, вперед» зыфиIорэмкIэ аухыгъ. Фестивалым «Гъогу маф!» етэIо.

ЕмтIылъ Нурбый.