Урысыем и Мафэ фэгъэхьыгъэу Мые­къуапэ иурам шъхьа­Iэхэм атлетикэ псын­кIэмкIэ зэнэкъокъухэр ащыкIуагъэх.

Километри 2,5-рэ зы къе­кIокIыгъом къыщачъын фэягъэ. Зэнэкъокъум хэлажьэхэрэм яшIоигъоныгъэ елъытыгъэу кило­метри 5 къачъынэу мурад зы­шIыгъэхэр бэ хъущтыгъэх.

Адыгэ Республикэм и Пра­вительствэ и Унэ дэжь спорт зэIукIэгъухэр щырагъэжьагъэх. Аныбжь емылъытыгъэу зэкIэри зэхэтхэу Мыекъуапэ иурамхэу Жуковскэм, Комсомольскэм, Советскэм, Краснооктябрьскэм, Пионерскэм, нэмыкIхэм къащы­чъагъэх. Зэнэкъокъур зыщырагъэ­жьэгъэ чIыпIэм къэсыжьыгъэх.

Рагъэжьэным ыпэкIэ

Спорт зэнэкъокъур рагъэжьэным ыпэкIэ гъогууанэм техьащт­хэр атхыгъэх, медицинэм иIофы­шIэхэр гущыIэгъу къафэхъугъэх. Сабыйхэри, зыныбжь хэ­кIо­та­гъэхэри атлетикэ псынкIэм зэрэ­пыщагъэхэр тшIогъэшIэгъоныгъ.

Километри 2,5 — 5-рэ къэзы­чъыщтхэм дзюдомкIэ, самбэмкIэ банэхэрэр, гандбол, футбол, бас­кетбол ешIэхэрэр, физкультурэм пыщагъэхэр, нэмыкIхэри ахэтлъагъощтыгъэх.

Адыгэкъалэ къикIыгъэ трене­рэу Чэтыжъ Алый спорт еджапIэхэм ятренерхэр, культурэм иIофышIэхэр игъусэх.

— Мыщ фэдэ зэIукIэгъухэр тищыкIагъэх, — къытиIуагъ Чэтыжъ Алый. — ХьакIэгъогъу Каз­бек тизэхэщакIохэм ащыщ. Псауныгъэм игъэпытэн ехьылIэгъэ Iофтхьабзэхэм цIыфыбэ зэ­ра­хэлажьэрэр лъэшэу тыгу рехьы.

— Нэбгырэ 20 тыхъоу Мые­къуапэ тыкъэкIуагъ, — къеIуатэ Тэхъутэмыкъое районым иадминистрацие физкультурэмкIэ ыкIи спортымкIэ и ГъэIорышIапIэ ипащэу Джарымэкъо Азмэт. — Псау­ныгъэр агъэпытэ зышIоигъохэу физкультурэм пыщагъэхэм япчъа­гъэ зэрэхахъорэр тигуапэ.

Тэхъутэмыкъое районым щыщ­хэу Бжыхьэкъоежъым къикIыгъэ­хэм ямайкэхэм якъуаджэ ыцIэ зэрэтетхагъэри нэплъэгъум къы­кIидзыщтыгъэ.

Адыгэ Республикэм самбэмкIэ испорт еджапIэ итренерэу, дунаим самбэмкIэ дышъэр къы­щызыхьыгъэ Мэрэтыкъо Сахьидэ бэнэкIо ныбжьыкIэхэм ахэтэу ты­IукIагъ. КIалэхэр зэнэкъокъум фигъэхьазырхэзэ, атлетикэ псын­кIэм шIуагъэу къытырэм щигъэгъозагъэх.

Федор Назден исабый курэ­жъыем ис, чъые зэрэшIоигъор къыхэщы. КIэлэцIыкIум зэнэкъо­къур зыфэдэр къыгурымыIоу цIыфхэм нэшIукIэ къахэплъэ. Гъырэп, ятэ къыриIорэм едэIу.

КIэлэцIыкIу спорт еджапIэу Джэнчэтэ СултIэн ыцIэ зыхьырэм зыщызыгъэсэхэрэ пшъэшъэжъыехэр дахэу фэпагъэх. Гандбол зэрешIэхэрэм дакIоу, атлетикэ псынкIэми пыщагъэх.

— Тызэхэтэу тычъэщт, зэнэ­къо­къум чанэу тыхэлэжьэщт, — къытаIуагъ пшъашъэхэм.

АфэгушIуагъэх

Апэрэ къекIокIыгъом ыуж километри 2,5-рэ къэзычъыгъэхэр къэнэфагъэх. Спорт еджапIэхэм защызыгъасэхэрэр тренерхэм апэ ишъыгъэхэм ащыщыгъэх. Мыекъопэ баскетбол клубэу «Ди­намо-МГТУ-м» итренер шъхьаIэу Андрей Синельниковымрэ гандбол клубэу «Адыифым» ипащэу Къудайнэт Мэджыдэрэ зэготхэу аужырэ метрэхэр къачъыгъэх. Гандбол ешIэхэрэ пшъашъэхэр, самбэмкIэ ыкIи дзюдомкIэ бэ­накIохэр пшъыгъэхэп.

Километри 5-р къэзычъи апэу къэсыжьыгъэ Петр Иваненкэм гущыIэгъу тыфэхъугъ.

— ПсэолъэшIэу Iоф сэшIэ, физкультурэм бэшIагъэу сыпылъ, зэнэкъокъухэм сахэлажьэ. МэфэкI зэхахьэр зэхэзыщагъэхэм тагъэгушIуагъ, — къытиIуагъ Петр Иваненкэм.

ЯтIонэрэ чIыпIэр къыдэзыхыгъэр спортышхом щашIэ. Юрий Абрамовыр Мыекъуапэ къыщы­хъугъ, тренер-кIэлэегъаджэу Къы­рым Iоф щешIэ. ИIахьылхэм адэжь къэкIуагъэу зэнэкъокъур зэрэзэхащэрэр зызэхехым, игуа­пэу хэлэжьагъ.

— Адыгэ Республикэм изаслуженнэ тренерэу Константин Ча­диныр сикIэлэгъум сипащэу хэ­гъэ­гум изэнэкъокъухэм сахэла­жьэщтыгъ. Урысыем и Мафэ гъэшIэгъонэу згъэкIуагъэу сэлъы­тэ. Синыбджэгъухэм, нэIуасэхэм саIукIагъ.

Ящэнэрэ чIыпIэр къыдэзыхыгъэ Иван Федоровым зэнэкъокъур шIэхыщэу аухыгъэу къыщыхъугъ. Спортым цIыфхэр зэрэзэфищэ­хэрэм мэхьэнэ ин ритыгъ.

Федор Назден испорт унагъо нахь къахэдгъэщы тшIоигъу. Ясабый курэжъыем исэу километри 2,5-рэ хъурэ гъогур къызэранэ­кIыгъ, ауж къинагъэхэп.

Адыгэ Республикэм физкульту­рэмкIэ ыкIи спортымкIэ и Ко­ми­тет итхьаматэу Дэгужъые Му­рат зэнэкъокъум хэлэжьагъ, анахь псынкIэу къэчъагъэхэм ащыщ. ХагъэунэфыкIхэрэ чIыпIэхэр къы­дэзыхыгъэхэм М. Дэгужъыер афэгушIуагъ, нэпэеплъ шIухьафтынхэр аритыжьыгъ.

Республикэм икIэлэцIыкIу ансамблэхэр зэхахьэм ипчэгу къы­щышъуагъэх, мэфэкIым хэлэжьагъэхэр зэфэгушIуагъэх.