«Зэкъошныгъ» Мыекъуапэ — «Спартак» Налщык — 1:0 (0:0). Мэкъуогъум и 9-м Адыгэ республикэ стадионэу «Зэкъошныгъэм» щызэдешIагъэх.

Зезыщагъэр: Вера Олейкина — Шъачэ. «Зэкъошныгъ»: Орехов, Подковыров, Хьагъур, Букия, Ещенко, Гагиты, Iащэ, Антоненко, Андрейченко, Къонэ, Ба­бенко. Къэлапчъэм Iэгуаор дэзыдзагъэр: Iащэ — 76. Шыумафэм пенальтир дидзагъэп — 53.

Зэкъош футбол клубхэм язэIукIэгъу гъэшIэгъонэу кIуагъэ. «Спартак» иешIакIохэу Хьачырэ Алан, Хъот Анзор, нэмыкIхэм къэлапчъэм Iэгуаор дадзэнэу амалышIухэр яIагъэх. Шыумэфэ Заур пенальтир зегъэца­кIэм, «Зэкъошныгъэм» икъэлэпчъэIутэу Ва­лерий Ореховым Iэгуаор къызэкIидзэжьыгъ.

Мыекъуапэ иешIакIохэу Iащэ Анзор, Юрий Андрейченкэр, Къонэ Амир, Сергей Бабенкэр, фэшъхьафхэри апэкIэ илъыщтыгъэх, ау зэIукIэгъум къырыкIощтыр апшъэ ралъхьажьын алъэкIыщтыгъэп. А. Iащэр ошIэ-дэмышIэу ыпэкIэ илъи, ухъумакIом IэкIэкIыгъ. Анзор къэлэпчъэIутэу Антон Антиповыр ыгъэплъэхъуи, хъагъэм Iэгуаор ридзагъ — 1:0. «Спартак» пчъагъэр зэрихъокIынэу бэрэ чIыпIэшIу ифагъ, ау къэлэпчъэIутэу В. Ореховым шIокIыныр къыдэхъугъэп. Валерий цыхьэшIэгъоу ешIэзэ, тиухъумакIохэм, зэкIэ ешIакIохэм ягуетыныгъэ къыIэтыгъ.

Пресс зэIукIэр

Пресс-зэIукIэр зэрэкIуагъэр, футбол клубхэм ямурадхэм афэгъэхьыгъэ тхыгъэхэр «Адыгэ макъэм» къыщыхэтыутыщтых.

ЕшIэгъухэр

«Форте» — «Анжи» — 1:0. СКА — «Черноморец» — 2:3, «Краснодар-3» — «Ессентуки» — 3:0, «Легион» — «Биолог» — 0:3, «Мэщыкъу» — «Динамо» — 2:2, «ТIуапсэ» — «Махачкала» — 0:0, «Интер» — «Кубань» — 0:7. Мэкъуогъум и 15-м «Зэкъошныгъэр» Махачкала щыIукIэщт «Анжи». Сурэтым итыр: КъэлэпчъэIутэу Валерий Ореховыр цыхьэшIэгъоу ешIэ.