Урысыем имэфэкI зеIэты
Урысыем и Мафэ фэгъэхьыгъэ сурэт къэгъэлъэгъон Мыекъуапэ къыщызэIуахыгъ.
Адыгэ Республикэм культурэмкIэ и Министерствэ, республикэм исурэт къэгъэлъэгъуапIэ зэхащэгъэ зэхахьэм искусствэм, гъэсэныгъэм, пIуныгъэм яIофышIэхэр, еджакIохэр хэлэжьагъэх.
Республикэм исурэтышIхэм я Союз итхьаматэу Елена Абакумовам зэхахьэр къызэIуи-хыгъ. Адыгэ Республикэм культурэмкIэ и Министерствэ иотдел ипащэу Шэуджэн Бэлэ хэгъэгум имэфэкI зызэриушъомбгъурэр, къэралыгъо гъэпсыкIэу иIэр зэрэпытэрэр, Адыгеим исурэтышIхэм яIэпэIэсэныгъэ зэрэхагъахъорэр зэхахьэм щыхигъэунэфыкIыгъ.
Ясэнэхьат Iоф рызышIэрэ сурэтышI 36-мэ яIофшIэгъэ 80 фэдиз мэфэкIым ехъулIэу къагъэлъагъо. Живописым, графикэм, бгъэфедэн плъэкIыщт искусствэм афэгъэхьыгъэхэм уагъэгъуазэ. Илъэс зэфэшъхьафхэм ашIыгъэхэ сурэтхэр къэгъэлъэгъуапIэм ифонд, сурэтышIхэм яунаехэм къахахыгъэх.
Адыгэ Республикэм инароднэ сурэтышIэу, республикэм и Къэралыгъо шIухьафтын къызыфагъэшъошэгъэ Гъогунэкъо Мухьарбый иIофшIагъэ жъы мыхъухэрэм ащыщ. Адыгэ пшъашъэм пщынэр егъэбзэрабзэ, лъэпкъ шъуашэу щыгъым къегъэдахэ. Пшъэшъэ къэшъуакIори кIэракI, дахэу мэуджы. Жъыум фэгъэзэгъэ пшъашъэри зэкIужьэу щыс.
ЗэлъашIэрэ сурэтышIэу Бырсыр Абдулахь щыIэныгъэм еплъыкIэу къыфигъотыгъэм урегъэгупшысэ. Архитекторым ичъыг псэолъэшI Iофыгъохэр зэрэзэхэщагъэхэм регъапшэ, амалэу щыIэр къызэрэбгъотыщтым уфещэ.
Къуанэ Аслъан исурэтэу лэжьыгъэм имэфэкI ехьылIагъэм лIыжъымрэ кIэлэцIыкIумрэ зэрэзэдэгущыIэхэрэм, мэфэкI мафэм зэрэуджыхэрэм, фэшъхьафхэм уахещэ. Сыда тэтэжъ кIэлэцIыкIум къыфиIуатэрэр? Джэуапыр къэбгъоты пшIоигъоу сурэтым уеплъы.
Ф. ПэтIыуащэм, Э. Овчаренкэм, Г. Назаренкэм, Н. ЛэупакIэм, фэшъхьафхэм ясурэтхэр щыIэныгъэм ехьылIагъэх. Къушъхьэхэм ядэхагъэ, тыкъэзыуцухьэрэ дунаим изэхъокIыныгъэхэм, нэмыкIхэм сурэтхэр афэгъэхьыгъэх.
Урысыем икъэралыгъо гъэпсыкIэ заводхэм, мэкъу-мэщым, культурэм, спортым, нэмыкIхэм ащызыгъэпытэхэу непэрэ мафэм илIыхъужъхэм афэгъэхьыгъэ сурэтхэри къэгъэлъэгъоным нахь игъэкIотыгъэу щытлъэгъухэ тшIоигъу.
СурэтышI цIэрыIоу Гъогунэкъо Мухьарбый къытиIуагъ лъэхъаным диштэрэ сурэтхэм Iоф зэрадишIэрэр. Сурэтым уеплъызэ удэгущыIэмэ укъызэхихы, къыбдэгущыIэжьы пшIоигъу. ЩыIэныгъэм къыхэхыгъэ сурэтхэм нахь узыIэпащэ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехьылIэгъэ къэгъэлъэгъонхэри республикэм щыкIощтых, тисурэтышIхэм ятворчествэ ихэхъоныгъэхэр ащытлъэгъущтых.
Мэкъуогъум и 16-м къэгъэлъэгъоныр зэфашIыжьыщт.