Гъобэкъуаехэм Кубокыр ахьыгъ
Советскэ Союзым и ЛIыхъужъэу Бжыхьэкъо Къымчэрые фэгъэхьыгъэ шIэжь зэнэкъокъур футбол цIыкIумкIэ Лъэустэнхьаблэ щыкIуагъ.
Лъэустэнхьэблэ псэупIэм ипащэу Гъонэжьыкъо Артур, Бжыхьэкъо Къымчэрые ыкъоу Юрэ футбол цIыкIумкIэ зэнэкъокъум хэлажьэхэрэм аIукIагъэх, гущыIэ фабэхэр афаIуагъ.
Илъэс къэс зэхащэрэ зэIукIэгъухэм команди 6-мэ яешIакIэ къащагъэлъэгъуагъ. Апэрэ чIыпIэр Гъобэкъуае къикIыгъэхэм къыдахыгъ. Очэпщые иешIакIохэм ятIонэрэ чIыпIэр афагъэшъошагъ. Пэнэжьыкъуае щыщхэм ящэнэрэ чIыпIэр ахьыгъ.
Теуцожь районым иадминистрацие апэрэ чIыпIэр къыдэзыхыгъэ командэм футбол решIэнхэу Iэгуаохэр шIухьафтын фишIыгъ. Лъэустэнхьэблэ псэупIэм игъэIорышIапIэ Кубокыр, щытхъу тхылъхэр, ахъщэ шIухьафтынхэр анахь дэгъоу ешIэгъэ командэхэм аритыжьыгъ.