Нысхъапэхэм псэ къапагъакIэ
Пшысэхэм атехыгъэ къэгъэлъэгъонхэр кIэлэцIыкIухэм ашIогъэшIэгъоных.
ЗэлъашIэрэ тхакIоу, драматургэу Къуекъо Налбый ытхыгъэ «Рыу, сибэщыр» жъы хъурэп. Адыгэ Республикэм и Къэралыгъо филармоние инысхъэпэ театрэу «Дышъэ къошыным» режиссерэу Нэгъой Асыет щигъэуцугъэ къэгъэлъэгъоным кIэлэцIыкIухэр ягуапэу еплъыгъэх.
ТIэшъу Светланэ, Нэгъой Зурет, Юрий Григоренкэм, Къапэ Саидэ, Виктория Токаренкэм, Сергей Вегериным рольхэр къашIых.
Мыхъо-мышIагъэхэр зезыхьэрэ нэгъучIыцэм цIыфхэм ямылъку къызыфигъэфедагъ, дышъэр къатырихыгъ. Шъэожъыем янэжъ шIу фишIэ шIоигъу. Дышъэр нэгъучIыцэм къытырихыжьынэу фежьэ, бэщымкIэ утынхэр рехых.
Шъэожъыем гъусэу иIэхэр нэгъучIыцэм зэребэныхэрэр, зэрагъэщынэрэр артистхэм гъэшIэгъонэу къагъэлъагъо. НэгъучIыцэм къымылэжьыгъэ мылъкур къытырахыжьы.
ГукIэгъум, зэфагъэм уафэзыпIухэрэ къэгъэлъэгъонхэр тапэкIи дгъэуцущтых, — къытиIуагъ театрэу «Дышъэ къошыным» ихудожественнэ пащэу, Адыгэ Республикэм инароднэ артистэу Сихъу Станислав.
КIэлэцIыкIухэр спектаклым еплъыхэзэ, къэгъэлъэгъоныр хъугъэ-шIэгъэ шъыпкъэу къащэхъу. Пшысэм техыгъэр щыIэныгъэм щалъэгъун алъэкIыщтэу артистхэм алъытэ. Ащ фэшI ролым псэ къыпагъакIэ, нысхъапэхэм ачIыпIэкIэ къэгущыIэхэзэ, орэд къаIозэ тхакIом игупшысэхэр цIыфхэм алъагъэIэсых.
ЕмтIылъ Нурбый.