УIэшыгъэ кIуачIэхэм ямедалищ
Урысыем и УIэшыгъэ кIуачIэхэм дзюдомкIэ язэ- нэкъокъу Санкт-Петербург мэкъуогъум и 4 — 6-м щыкIуагъ.
Адыгэ Республикэм дзюдомкIэ ибэнэпIэ-еджапIэ зыщызыгъасэхэрэ хъулъфыгъэхэр алырэгъум щыбэнагъэх, хагъэунэфыкIыхэрэ чIыпIэхэр къыдахыгъэх.
Тулпэрэ Айдэмыр, кг 81-рэ, апэрэ чIыпIэр зэнэкъокъум къыщихьыгъ. ПашIо Алый, кг 66-рэ, Ингъуш Владимир, кг 90-рэ, джэрзыр къафагъэшъошагъ.
Апэрэ чIыпIэр къыдэзыхыгъэ Тулпэрэ Айдэмыр УФ-м дзюдомкIэ икIэух зэнэкъокъоу Iоныгъо мазэм Мыекъуапэ щыкIощтым хэлэжьэнэу фитыныгъэ иIэ хъугъэ. Урысыем и Кубок фэбэнэнхэу фитыныгъэ зиIэ хъугъэхэм ПашIо Алыйрэ Ингъуш Владимиррэ ащыщых.
Медали 4 Новочеркасскэ къыщыдахыгъ
СССР-м спортымкIэ имастерэу Геннадий Недвигиным фэгъэхьыгъэ шIэжь зэнэкъокъур я 21-у Новочеркасскэ щыкIуагъ. Хэгъэгум и Федеральнэ шъолъыри 3 зэIукIэгъухэм ахэлэжьагъ.
Адыгеим инарт шъаохэу Датхъужъ Алый, кг 90-рэ, Дэхъу Азэмат, кг 60, апэрэ чIыпIэхэр къыдахыгъэх, Урысыем дзюдомкIэ икIэух зэнэкъокъоу Мыекъуапэ бжыхьэм щыкIощтым хэлэжьэщтых.
Лъэцэр Амир, кг 60, Мыгу Меланэ, кг 70-рэ, медальхэр къахьыгъэх. А. Лъэцэрым тыжьыныр къыдихыгъ, М. Мыгум ящэнэрэ чIыпIэр къыфагъэшъошагъ.
Сурэтым итхэр: Адыгеим дзюдомкIэ ибэнакIохэу С.-Петербург хагъэунэфыкIырэ чIыпIэхэр къыщыдэзыхыгъэхэр.