Зэдезыгъаштэрэр лъэкIуатэ
КIэлэеджакIохэм яя V-рэ Гъэмэфэ Спартакиадэ иятIонэрэ едзыгъо хэхьэрэ зэнэкъокъур дзюдомкIэ Къыблэм икъалэу Ермэлхьаблэ щыкIуагъ.
2002 — 2004-рэ илъэсхэм къэхъугъэхэ кIалэхэр, пшъашъэхэр Къыблэм изэIукIэгъухэм ахэлэжьагъэх. Адыгэ Республикэм ихэшыпыкIыгъэ командэ ятIонэрэ чIыпIэр къыдихыгъ. Краснодар краим икIэлэеджакIохэм апэрэ чIыпIэр ахьыгъ. Ящэнэрэ чIыпIэр Волгоград хэкум ибэнэкIо ныбжьыкIэхэм афагъэшъошагъ.
— Адыгэ Республикэм зыщызыгъэсэхэрэ ныбжьыкIэхэр IэпыIэгъу зэфэхъужьхэзэ, зэгурыIоныгъэ ахэлъэу зэнэкъокъум хэлэжьагъэх. Ащ ишIуагъэкIэ хагъэунэфыкIыхэрэ чIыпIэхэр къыдэзыхын зылъэкIыщтхэр нахьыбэ хъугъэх, — къытиIуагъ республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ.
Яонтэгъугъэхэм ялъытыгъэу хагъэунэфыкIыхэрэ чIыпIэхэр бэнэкIо 12-мэ къыдахыгъэх. Татьяна Шаталовам, кг 52-рэ, Мыгу Меланэ, кг 78-рэ, Бэгъ Аслъан, кг 100, апэрэ чIыпIэхэр къахьыгъэх. Тренерхэр Нэпсэу Бислъан, Мерэм Саид, Беданыкъо Байзэт, Беданыкъо Рэмэзан, Роман Оробцов.
Тыжьыныр къыдэзыхыгъэхэр бэнэкIуитIу. Ахэр ХьакIако Дан, кг 57-рэ, тренерхэр Мерэм Саидэрэ Шъхьэлэхъо Адамрэ, Анна Лоднева, кг 63-рэ, тренерхэр Адзынэ Алый, Мерэм Саид.
Ящэнэрэ чIыпIэхэр къызыфагъэшъошагъэхэр: Шыбзыхъо Алый, кг 55-рэ, Тыгъужъ ТIахьир, кг 60, Эдуард Мирошников, кг 60, Юрий Балоян, кг 66-рэ, Григорий Саакян, кг 81-рэ, Ваган Григорян, кг 90-рэ, Екатерина Соловьева, кг 78-м къехъу. Тренерхэу Нэпсэу Бислъан, Хьакурынэ Дамир, Хьабэхъу Адамэ, Роман Оробцовым, Беданыкъо Рэмэзанэ, Сергей Шутовым, Нэныжъ Байзэт джэрзыр къэзыхьыгъэхэр агъасэх.
Апэрэ чIыпIэр къыдэзыхыгъэхэу Къыблэм идышъэ медальхэр зыфагъэшъошагъэхэр Урысыем икIэлэеджакIохэм якIэух Спартакиадэ хэлэжьэщтых. Зэнэкъокъур шышъхьэIу мазэм Казань щыкIощт.
Адыгеим икIалэхэм ямызакъоу, типшъашъэхэри Ермэлхьаблэ дэгъоу зэрэщыбэнагъэхэм ишIуагъэкIэ республикэм ихэшыпыкIыгъэ командэ Къыблэм ятIонэрэ чIыпIэр къыщыдихыгъ. Казань дзюдомкIэ щыкIощт зэIукIэгъухэм тибэнакIохэм якъулай чанэу къыщагъэлъэгъонэу, хагъэунэфыкIырэ чIыпIэхэр къахьынхэу афэтэIо. .