«Ессентуки» Ессентуки – «Зэкъошныгъ» Мыекъуапэ – 2:3 (0:0). ЖъоныгъуакIэм и 20-м Ессентуки щызэдешIагъэх. «Зэкъошныгъ»: Гиголаев, Подковыров, Хьагъур, ХъуакIо (Власов, 67), Букия (Крылов, 71), Ещенко, Газиты, Iащэ, Антоненко, Андрейченко, Къонэ.

Къэлапчъэм Iэгуаор дэзыдзагъэхэр: Iащэ – 47, 48, Крылов – 87, «Зэкъошныгъ»: Магомедов – 56, Гречкин – 65, «Ессентуки».

ЯтIонэрэ купэу «Къыблэм» щыкIорэ зэнэкъокъум «Зэкъошныгъэр» Ессентуки щыIукIагъ чIыпIэ командэу ауж къинэрэм. «Ессентуки» текIоныгъэр къыдихыным, чIыпIэу зыдэщытыр зэблихъу­ным фэбэнагъ. «Зэкъошныгъэри» зэнэкъокъум щылъыкIотэн имурад. ТиешIакIохэр бэрэ апэкIэ илъыщтыгъэх, ау къэлапчъэм благъэу екIунхэ, хъагъэм Iэгуаор радзэн алъэкIыщтыгъэп.

Футболым нахь хэгъозагъэхэм ащыщэу Iащэ Анзор ешIэгъум къырыкIощтым гукIэ зыфигъэ­загъ, шIыкIэу къыгъотыгъэм шIуагъэ къыхьыгъ. Метрэ 18 фэдизкIэ зыпэчыжьэ къэлапчъэм дауи, хъагъэм Iэгуаор я 47-рэ такъи­къым ридзагъ.

Зы такъикъ нахь темышIагъэу Анзор икIэрыкIэу гъэхъагъэ ышIыгъ. Метрэ 20-м нахьыбэкIэ зыпэчы­жьэ къэлапчъэм нарт шъаор зыдаом, Iэгуаор чэрэгъузэ ухъума­кIохэм аблэчъи хъагъэм ифагъ. Пчъагъэр 0:2 хъугъэ.

«Ессентуки» текIоныгъэр къыдихыным ишъыпкъэ рихьылIагъ. «Зэкъошныгъэм» ухъумэн Iофыгъохэр ыгъэцэкIэнхэр пшъэрылъ шъхьаIэу зыфилъытэжьыщтыгъ. Арэу щытми, «Ессентуки» нахь псынкIэу зэрешIэрэм къыхэкIэу тIогъогогъо тифутбол клуб икъэлапчъэ Iэгуаор къыдидзагъ. Пчъагъэм бысымхэр езэгъыхэ фэдэу къэлъагъощтыгъ. «Зэкъошныгъэм» итренер шъхьаIэу Ешыгоо Сэфэрбый ешIэкIуи 2 зэбли­хъугъ, тикомандэ нахьыбэрэ ыпэкIэ илъэу фежьагъ.

Денис Крыловыр метри 10 фэдизкIэ зыпэчыжьэ къэлапчъэм дэжь щытэу ухъумакIохэм ябэныгъ. ТиешIакIо Iэгуаоу къэлъэтэжьыгъэр къызыIэкIэхьэм, ошIэ— дэмышIэу къэлапчъэм дауи, пчъагъэм хигъэхъуагъ. Ащ ыуж зэIукIэгъум къырыкIощтыр «Зэкъош­ныгъэм» зыIэкIигъэкIыгъэп, 3:2-у текIоныгъэр къыдихыгъ.

Я 30-рэ ешIэгъухэр «Къыблэм» жъоныгъуакIэм и 20 – 21-м щыкIуагъэх. «Анжи» — «Интер» — 6:1, нэмыкI зэIукIэгъухэм шъуащыдгъэгъозэщт.