Якъэтынхэр тшIогъэшIэгъоных

Урысыем ителеканалэу «Матч-ТВ-м» ижурналистхэр Адыгэ Республикэм тыгъуасэ щыIагъэх.

Мыекъуапэ ихэушъхьафыкIыгъэ егъэджэпIэ-гъэсэпIэ IофшIапIэм журналистхэр къызэкIохэм ащ иIофышIэхэм, кIэлэеджакIо­хэм аIукIагъэх. Футболым ныбжьыкIэхэр фэзыгъасэхэу Къошк Адам, ащ ыкъохэу Юнысрэ Рустемрэ журналистхэм гущыIэгъу афэхъугъэх. Журналистхэм­рэ кIэлэеджакIохэмрэ ныбджэгъу ешIэгъу зэдыряIагъ.

Журналистхэм якуп ипащэу Георгий Черданцевыр тренер­хэм, еджапIэм иIофышIэхэм гущыIэгъу зафэхъум, упчIабэ къыратыгъ.

КIэлэеджакIохэм ашIогъэшIэгъоныр макIэп. Журналист сэ­нэ­хьатым урылэжьэныр Iоф къызэрыкIоу зэрэщымытыр Георгий Черданцевым, Роман Трушечкиным къаIотагъ.

ЕджэпIэ-гъэсапIэр лъэкIуатэ

Хъут Аслъан къызэриIуагъэу, атлетикэ онтэгъум, футболым, самбэм, дзюдом, нэмыкIхэм ныб­жьыкIэхэр афагъасэх. Спорт псэуалъэхэр нахьыбэ шIыгъэнхэм пылъых.

Журналистхэм еджэпIэ-гъэсапIэм итеплъэ зэрэдахэр, ща­гур къабзэу зэрэзэIухыгъэр, футбол зыщешIэхэрэр, нэмыкI­хэри зэрэзэтегъэпсыхьагъэхэр ашIогъэшIэгъоных. ПсэолъэшI Iофыгъохэр щэкIох.

Красноярскэ, Хабаровскэ, Москва хэкум, Мурманскэ, фэшъхьаф шъолъырхэм къарыкIыгъэ ныбжьыкIэхэр еджапIэм чIэсых.

IэпэIасэм иеплъыкIэхэр

Журналистхэр кIэлэеджакIо­хэм заIокIэхэм, анахьыбэрэ ныбжьыкIэхэр къызыкIэупчIагъэ­хэр сэнэхьатыр къыхэпхыным имэхьан. Георгий Черданцевым иеп­лъы­кIэхэм къащыхигъэщыгъ спортымкIэ журналистэу ущытыным, телевидением хъугъэ— шIагъэхэр къыщыпIотэнхэм афэшI зэпымыгъэоу Iоф зыдэпшIэжьын зэрэфаер.

— Бэрэ тхылъхэм уяджэн фае, — къыIуагъ Г. Черданцевым.

Журналистым ымакъэ тэрэзэу ыгъэпсыным, игущыIэ цIыфхэм алъыIэсыным, игупшысэхэмкIэ агурыIоным фэшI бэрэ IэкIэ тхэн фаеу телевидением ижурналистхэм къаIуагъ.

Роман Трушечкиным кIэлищ иI. Журналист сэнэхьатыр шIогъэшIэгъонэу къыхихыгъ.

— УикIэлэцIыкIугъом шIэныгъэу зэбгъэгъотырэм мэхьэнэ ин иIэу сэлъытэ, — къыIуагъ Р. Трушечкиным.

Журналистэу Нэгъуцу Роман Адыгэ къэралыгъо университетым щеджагъ. СпортымкIэ жур­налистэу зэрэщытым къыпкъырыкIызэ, щыIэныгъэм зэхъокIыныгъэу фэхъухэрэм къатегущыIагъ. Журналистым ылъэгъу­рэр, зэхихырэр зэфихьысыжьхэзэ хъугъэ-шIагъэхэр цIыфхэм алъегъэIэсых.

Хъугъэ-шIагъэм еплъыкIэу фыряIэр зэтемыфэу къызэрэ­хэкIырэм шIуагъэ къытэу зэхахьэм хьакIэхэм къыщаIуагъ. ЕплъыкIэу яIэр зэтемыфэрэми, шъыпкъапIэм фэкIонхэм фэшI шIыкIэхэр къызэдагъотых.

Гуетыныгъэм ишIуагъ

Сыд фэдэ IофшIэн огъэцакIэми, гуетыныгъэ фыуиIэн зэрэфаем журналистхэр къытегущыIагъэх. КIэлэеджакIохэр еджэнхэ, сэнэхьат хэхыгъэм зыфагъэсэным пае гуетыныгъэ ахэмылъэу щыIэныгъэм щылъы­кIотэнхэ зэрамылъэкIыщтыр журналистхэм хагъэунэфыкIыгъ.

Роналду, Месси

Футболым ешIэкIо цIэрыIо ущыхъуным фэшI дунаим щысэшIу къыщызыгъэлъэгъуагъэхэм Роналду ыкIи Месси къахагъэщыгъэх.

Роналду Португалием къыщыхъугъ, гъот макIэ зиIэ унагъом щапIугъ. Дунаим цIэрыIо щыхъу зэрэшIоигъор инэIуасэхэм ариIуи, имурадхэр къыдэ­хъугъэх. Гуетыныгъэ ин зэрэ­хэлъыр щыIэныгъэм къыщигъэлъэгъуагъ.

Месси Аргентинэм щыщ, илъэс 17 хъугъэу Испанием футбол щешIэ.

— ИкIэлэцIыкIугъом Месси къиныбэ зэпичыгъ, — къыIуагъ Г. Черданцевым. — КIэлэ лъхъан­чэу зэрэщытым фэшI футболымкIэ тренерхэр къы­фэягъэхэп. Месси сэнаущыгъэ ин зэрэхэлъым ишIуагъэкIэ иIэпэIэсэныгъэ хигъэхъон, зыкъызэIуихын ылъэкIыгъ. Гуетыныгъэр ыкIи сэнаущыгъэр зэрэзэпхыгъэхэм зэхахьэм щытегущыIагъэх.

Спорт къэтынхэр

Джырэ уахътэ Интернетыр, телефоныр, нэмыкIхэр кIэлэ­еджакIохэм нахь агъэфедэх. ШIэныгъэм хагъэхъоным, пIуныгъэ дэгъу яIэным «Матч-ТВ-р» зэрэпылъым журналистхэр къы­тегущыIагъэх. Урысыем щапIугъэ кIалэхэм футболыр ашIогъэшIэгъон, ау цIэрыIо хъу­гъэу къа­хэкIырэр макIэ. Ащ ыгъэгумэкIыхэу зэхахьэм упчIабэ къыщатыгъ.

Артем Дзюбэ ыцIэ къыраIуа­гъэми, Роналду е Месси агуа­гъэуцонэу къаIуагъэп.

Спорт псэуалъэхэр нахьышIоу гъэфедэгъэнхэм, шIэжь ныбжьыкIэхэм яIэным, шэн-хабзэхэр зэрагъэшIэнхэм, лъэпкъ зэфэшъхьафхэм ныбджэгъуныгъэ зэдыряIэным, нэмыкIхэм атегущыIагъэх.

ШIухьафтынхэр

Журналистхэр кIэлэеджа­кIохэм заIокIэхэм, нэпэеплъ шIухьафтынхэр аратыгъэх. Спортым щыцIэрыIохэм ямайкэхэм афытетхагъэх, фэбагъэ зыхэлъ гущыIэхэр афатхыгъэх. Футбол ешIэхэрэм спорт шъуа­шэхэр, Iэгуаохэр, фэшъхьафхэри аратыгъэх.

Журналистхэу Тимур Жу­равль, Нэгъуцу Роман, Роман Трушечкиныр, фэшъхьафхэр кIэлэеджакIохэм гущыIэгъу зэрафэхъугъэхэр, нэпэеплъ сурэт­хэу атырахыгъэхэр гъашIэм шIукIэ къыхэнэжьыщтых.

ЕмтIылъ Нурбый.