ТекIоныгъэм ия 76-рэ илъэс фэгъэхьыгъ
ЛIэужхэм яшIэжь уегъэгъуазэ
ТекIоныгъэм ия 76-рэ илъэс фэгъэхьыгъэ къэгъэлъэгъоныр Мыекъуапэ щыкIуагъ.
Адыгэ Республикэм культурэмкIэ и Министерствэ, республикэм исурэт къэгъэлъэгъуапIэ зэхащэгъэ зэхахьэм лIэуж зэфэшъхьафхэр хэлэжьагъэх. Республикэм и Къэралыгъо программэу «Культурэм ихэхъоныгъ» зыфиIорэм хэхьэрэ Iофтхьабзэр щыIэныгъэм къыпкъырэкIы.
Республикэм исурэтышI ныбжьыкIэхэм, искусствэр зышIогъэшIэгъонхэ кIэлэеджакIохэм язэнэкъокъоу «ЛIэужхэм яшIэжь» зыфиIорэм икIэуххэр зэфахьысыжьыгъэх. ЯIэпэIэсэныгъэкIэ къахэщыгъэхэм щытхъу тхылъхэр аратыжьыгъэх.
ОсэшIхэр
Зэнэкъокъум иосэшI куп ипащэу, Адыгэ Республикэм изаслуженнэ сурэтышIэу Хъуажъ Рэмэзан, Урысыем исурэтышIхэм я Союз хэтхэу Галина Овчинниковар, Тыгъужъ Руслъан, фэшъхьафхэри зэхахьэм къыщыгущыIагъэх.
— Сурэт пэпчъ гупшысэ хэхыгъэ хэолъагъо, — къытиIуагъ Хъуажъ Рэмэзан. — Анахьэу тынаIэ зытетыдзагъэр кIэлэеджакIохэм заор зэраумысырэр, мамыр псэукIэр зэрагъэлъапIэрэр ары. КIэлэцIыкIур сабыеу олъытэми, гукIэ зылъыIэсырэм лIэужхэр пытэу зэрепхых. Тятэжъхэм Хэгъэгу зэошхом илъэхъан лIыгъэу зэрахьагъэр ясурэтхэм къащагъэлъагъо. «Ситэтэжъ исурэт» зыфиIорэр шъхьафэу къыхэсэгъэщы. Шъыпкъэ, ащ фэдэ сурэтхэр кIэлэеджакIохэм илъэс къэс ашIых. Арэу щытми, псэ апытым фэдэу уяплъы, сэри ситэтэжъ слъэгъу сшIоигъоу гукIэ сэлъыхъо.
Щытхъу тхылъыр зыфагъэшъошагъэхэм Бырсыр Джамилэ ащыщ. Сурэтэу ащ ышIыгъэр заом илъэхъан къыхихыгъ. Бзылъфыгъэ ныбжьыкIэхэм шIомыкIыр къазгъырхэмкIэ зэкIатхъо, хьакум щызэхагъэнэгъэ машIом патакъо. Хъулъфыгъэ IофшIэныр бзылъфыгъэхэм зэрагъэцакIэрэр сурэтым къыуегъашIэ.
УдыкIэко Джэнэт, Пэунэжь Асыет, КъумпIыл Диянэ, Дарья Доценкэм, Александр Жуковым, Инесса Хыбыртовам, нэмыкIхэм ясурэтхэр лъэгъупхъэх. И. Хыбыртовам тэтэжъ исурэт ышIызэ сыда зэгупшысэщтыгъэр?
Ащ фэдэ ыкIи нэмыкI упчIэхэр кIэлэеджакIохэм къатыхэу зэхэтхыгъ. СурэтышI IэпэIасэу Абрэдж Гощэфыжь искусствэм пылъ кIэлэцIыкIухэм шIэжь къэбархэр къафиIуатэхэу зэхэтхыгъ.
Джэмакъэр зэхахы
Сурэтхэм уяплъызэ, лIэужхэм яджэмакъэ иджэрпэджэжь зэхэтхэу къытщэхъу. КIэлэеджакIохэм заор тхылъхэмкIэ, кинофильмэхэмкIэ ашIэ. Заом тхьамыкIагъоу къафихьырэм егъэгумэкIых. Заом кIэлэеджакIохэр фаехэп. Тарихъыр зэрагъашIэзэ, лIэужхэр зэзыпхырэ искусствэм гукIэ зыфащэи. «Къэрэмыхъужь ащ фэдэ зао», — гукIэ къаIо, сурэтхэр къагъэгущыIэхэ ашIоигъоу къэлэмыр аштэ, шъо зэфэшъхьафхэр агъэфедэх…
ЕмтIылъ Нурбый. Сурэтхэр къэгъэлъэгъоным къыщытетхыгъэх.