«АГУ-Адыиф» Мыекъуапэ – «Луч» Москва — 28:16 (13:9). Мэлылъфэгъум и 30-м Мые­къуапэ щызэдешIагъэх. Зезыщагъэхэр: А. Семененко, Я. Стрепленый.

«Адыиф»: къэлэпчъэIутхэр: Баскакова, Скнарь, Толмачева; ешIакIохэр: Клименко — 2, Краснокутская — 2, Никулина — 3, Кириллова — 1, Серадская, А. Морозова — 1, Логви­ненко —1, Богданова — 6, Измайлова — 2, Куцевалова — 7, Казиханова — 2, Кобл, Стрельцова.

Я 11-рэ чIыпIэм фэбанэхэрэ клубхэр Москва зыщызэIокIэхэм 25:25-у зэнэкъокъур аухыгъ. Мыекъуапэ ятIонэрэ ешIэгъур зыщызэхащэм, текIоныгъэр къы­дэзыхыщтыр кIэухым нахь къыщынэфагъ.

Пчъагъэр зэрэлъыкIуатэщтыгъэр: 1:1,1:2, 4:5, 5:7, 8:8. Тикъэ­лэпчъэIутэу Л. Баскаковам «Лучым» икъэлапчъэ Iэгуаор я 24-рэ такъикъым дидзагъ — 10:8. Я 2-рэ едзыгъом А. Куцеваловам зэкIэлъыкIоу гъогогъуи 3 хъа­гъэм Iэгуаор ридзагъ. Е. Краснокутскаяр, Д. Казихановар ошIэ-дэмышIэу апэкIэ илъыхэзэ пчъагъэм хагъахъо — 19:11. «Лучым» иешIакIохэм А. Борисовар къа­хэщы, гъогогъуи 8 хъагъэм Iэгуа­ор ридзагъ. Ащ игъусэхэм къыдырагъэштэн зэрамылъэкIырэр «Адыифым» къызыфигъэфедагъ.

«Адыифыр» нахь шъуамбгъоу ешIэщтыгъ, Л. Баскаковам цыхьэшIэгъоу къэлапчъэр къыухъумэщтыгъ. З. Коблым зэхэщэн Iофхэр егъэцакIэх, Д. Богдановам, Г. Изайловам, В. Логвиненкэм пчъагъэм хагъахъо.

А. Куцеваловам фэгушIох

«Адыифым» 28:16-у ешIэгъур къыхьи, суперлигэм щыкIорэ зэнэкъокъум я 11-рэ чIыпIэр къыщыдихыгъ. Ангелина Куцеваловам гъогогъуи 7 хъагъэм Iэгуа­ор ридзагъ, иIэпэIэсэныгъэкIэ къахэщыгъ. ЗэхэщакIохэм А. Ку- цеваловар ешIэкIо анахь дэгъоу къыхахыгъ. Клубэу «Адыифым» ипащэу Къудайнэт Мэджыдэ А. Куцеваловам фэгушIуагъ, нэпэеплъ шIухьафтыныр ритыжьыгъ.

Зэфэхьысыжьхэр

Хэгъэгум гандболымкIэ суперлигэм щыкIорэ зэнэкъокъум клуб 12 хэт. «Адыифым» я 11-рэ чIыпIэр къызэрэдихыгъэр гъэхъэ­гъэ инэу тлъытэрэп, иешIакIэ хигъэхъон фае. Ащ дакIоу, къы­хэтэгъэщы зэнэкъокъум изэхэщакIохэм шIыкIэшIухэр икъоу къызэрамыгъотыгъэхэр. ГущыIэм пае, гандбол клубхэм язэнэкъо­къу хэхьэхэрэ пэшIорыгъэшъ ешIэгъухэр заухым, «Уфа-Алисэр» я 12-рэ чIыпIэм щыIагъ. Я 7 – 12-рэ чIыпIэхэр къыдэзыхыгъэхэр купхэм ащызэIукIагъэх. «Уфа- Алисэр» зы IэгуаокIэ «Адыифым» къытекIуи, зэнэкъокъум щылъыкIотагъ. Я 9-рэ чIыпIэм щыIэгъэ «Адыифыр» я 11-рэ чIыпIэм фэбэнэн фае хъугъэ.

2021-2022-рэ илъэс ешIэгъур суперлигэм зэрэщыкIощтым зэхэщакIохэр егупшысэх. Я 12-рэ чIыпIэр зыхьыгъэр суперлигэм къыхагъэкIыщт. Апэрэ купым анахь дэгъоу щешIагъэр суперлигэм хагъэхьащт. Сыдэу хъугъэ­ми, «Адыифым» иешIакIэ хигъэ­хъон фае. Клубым имурадхэм афэгъэхьыгъэ тхыгъэхэр «Адыгэ макъэм» къыхиутыщтых.