Гъэтхэ уцыкIэм иосэпс шIэты ЛъапцIэу сыщэкIо сыщыфэубзэу. Сэ сигукIае тыгъэнэбзыеу ЗыхеIу чIыгум гур ыукъэбзэу. Бзэхыгъэп гугъэр Пщэгъо нэгъыфэу. ЩэIагъэр гъощагъэп Сыгу имыфэу. Осэпсы ткIопсэу слъапэ къыпычърэм Сыгу еукъэбзыми — тыгъэр къебзэи. Тхьэшхом къелъэгъу гу мэхэ хыер, Джэуап къысфэхъоу сэгупсэфыжьы. Осэпсы шIэтмэ запхъотэжьыгъ, Гукъаоу сиIэр зыдахьыжьыгъ. Тыгъэм ибзыйхэр къысфэнэжьыгъ, ЩэIагъэу сиIэм сыхищыжьыгъ. ЩыIэныгъэу сикIасэм О щэIагъэр! ЩыIэныгъэм ишапхъ, Адыгэ хабзэм ибзыпхъ. Бзылъфыгъэ бгъэгум ибзагъ. Хъулъфыгъэ бгъапэм щыпсагъ. УзимыIэр гунэкI, IэнэкI, УзимакIэр гумэкI хэмыкI. Узигъусэр гупсэф гу закI, Узэтагъэр акъыл мымакI. ЩыIэныгъэу сикIасэм ЩэIагъэр щысигъусэшIу. НахьышIум сыфэзыщагъэр СищэIагъэу сиухъумакIу. ХЪУТ Сар. Адэмый.