Исурэтхэр щыIэныгъэм хэкIуакIэхэрэп
Республикэм щызэлъашIэрэ сурэтышIэу ДыдыкI Нурбый иIофшIагъэ щыIэныгъэм къызэрэхэнагъэм фэгъэхьыгъэ шIэжь къэгъэлъэгъон Мыекъуапэ щэкIо.
Н. ДыдыкIыр 1950-рэ илъэсым Хьатыгъужъыкъуае къыщыхъугъ. Урысыем исурэтышIхэм я Союз хэтэу искусствэм чанэу щылэжьагъ.
Адыгэ кIэлэегъэджэ колледжэу Андырхъое Хъусенэ ыцIэ зыхьырэм художественнэ графикэмкIэ иотделение щыригъэджагъэх. ИщыIэныгъэ иаужырэ илъэсхэм музеим Iоф щишIагъ.
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым шIэжь къэгъэлъэгъоныр щызэхащагъ. Музеим ипащэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэхахьэр зэрищагъ.
Адыгэ Республикэм культурэмкIэ иминистрэу Аулъэ Юрэ, Адыгеим исурэтышIхэм я Союз ипащэу Елена Абакумовар, Адыгэ Республикэм исурэтышI цIэрыIохэу Эдуард Овчаренкэр, Бырсыр Абдулахь, Хъуажъ Рэмэзан, Н. ДыдыкIым иIахьылхэу Сусанэрэ Хьэсанрэ, ныбджэгъоу иIагъэхэм ащыщэу Эльдарэ Мурат зэхахьэм къыщыгущыIагъэх.
Сурэт 70-рэ фэдиз музеим къыщагъэлъагъо. ГъэшIэгъоныр нэбгырабэмэ яунае хъугъэ сурэтхэр унагъом къырахыгъэхэу музеим зэрэщытлъэгъугъэхэр ары.
Жанрэ зэфэшъхьафхэмкIэ Н. ДыдыкIым сурэтхэр ышIыщтыгъэх. Тыкъэзыуцухьэрэ дунаим еплъыкIэу фыриIэр, цIыфхэм ящыIэкIэ-псэукIэ, нэбгырабэмэ атыришIыкIыгъэ сурэтхэр, нэмыкIхэри лъэгъупхъэх. КъэлэмкIэ ышIыгъэхэр сурэтышIым илъэгъо хэхыгъэх.
ЦIыф цIэрыIохэм ясурэтхэр бэ мэхъух. Тэ анахьэу къахэдгъэщы тшIоигъор пхъэм хишIыкIыгъэ сурэтхэр лъэпкъ гупшысэм зэрепхыгъэхэр ары.
Адыгэ Республикэм изаслуженнэ сурэтышIэу Хъуажъ Рэмэзан пхъэм сурэтыбэ хишIыкIыгъ. Н. ДыдыкIым иIофшIагъэ Р. Хъуажъыр къытегущыIэзэ, лъэпкъ искусствэм ибаиныгъэ къыхигъэщыгъ. Адыгэ къашъор къэзышIырэ хъулъфыгъэмрэ бзылъфыгъэмрэ ясурэт уеплъызэ, артист цIэрыIохэр нэгум къыкIэуцох. Ащ фэдэу дахэу укъэшъоным фэшI уилъэпкъ итарихъ, ишэн-хабзэхэр дэгъоу пшIэнхэ зэрэфаер сурэтышIым къегъэлъагъо.
Бзылъфыгъэм ыпашъхьэ пчэнэу щытыр, чэтыур зэбгъэпшэнхэкIэ гъэшIэгъоных. Шыхэм афэгъэхьыгъэ сурэтхэр, ахэм зызэрагъэпскIырэр, музеим ифонд къыхахыгъэ сурэтхэр гум къегущыIыкIых. Лъэпкъ культурэм фэгъэхьыгъэхэм узыIэпащэ.
БэшIагъэу дунаир зыхъожьыгъэ сурэтышIэу Н. ДыдыкIыр иIофшIагъэхэмкIэ къытхэт. Ащ ригъэджагъэмэ ащыщхэр искусствэм шIукIэ щашIэх.
— Пхъэм хишIыкIыгъэ сурэтхэм анэмыкI уемыплъыщтми, музеим укIон, къэгъэлъэгъоным зыщыбгъэгъозэн фае, — къыIуагъ сурэтхэм яплъызэ театроведэу, Адыгэ Республикэм искусствэхэмкIэ изаслуженнэ IофышIэшхоу Шъхьаплъэкъо Къэсэй.
ЖъоныгъокIэ мазэм икIэухым нэс къэгъэлъэгъоным музеим Iоф щишIэщт.
Сурэтхэр музеим къыщытетхыгъэх.
ЕмтIылъ Нурбый.