Джэнчэтэ СултIан тэгъэлъапIэ
Республикэ гандболым лъапсэ фэзышIыгъэ Джэнчэтэ СултIан фэгъэхьыгъэ шIэжь зэнэкъокъу Мыекъуапэ щыкIуагъ.
Урысыем, Адыгеим язаслуженнэ тренерэу Джэнчэтэ СултIан 1949-рэ илъэсым жъоныгъуакIэм и 9-м Хьакурынэхьаблэ къыщыхъугъ. КIэлэеджэкIо командэу «АГУ-Адыифыр» Мыекъуапэ щызэхищагъ. Тренер шъхьаIэу Iоф ышIэзэ, «АГУ-Адыифым» гъогогъуи 2 ящэнэрэ чIыпIэр Урысыем къыщыдихыгъ, ыгъэсагъэхэм ащыщхэм дунэе зэнэкъокъухэм медальхэр къащахьыгъэх.
Игъонэмысэу ищыIэныгъэ зыхъожьыгъэ Джэнчэтэ СултIан фэгъэхьыгъэ шIэжь зэнэкъокъухэр илъэс къэс Мыекъуапэ щызэхащэх. КIэлэеджэкIо командэхэм язэIукIэгъухэм Тольятти щыщ пшъашъэхэм апэрэ чIыпIэр къащыдахыгъ. Мыекъуапэ ятIонэрэ чIыпIэр къыфагъэшъошагъ. Тольятти иятIонэрэ командэ ящэнэрэ чIыпIэр ыхьыгъ. Астрахань, Волгоград, Краснодар, Ростов-на-Дону яешIакIохэри зэнэкъокъум хэлэжьагъэх.