«АГУ-Адыиф» Мыекъуапэ – «Уфа-Алиса» Уфа – 32:26 (16:10).

Мэлылъфэгъум и 30-м АР-м испорт Унэшхоу Кобл Якъубэ ыцIэ зыхьырэм щызэдешIагъэх.

Я 7 – 12-рэ чIыпIэхэм афэбэнэрэ клубхэм «Адыифыр» ащыщ.

«Адыиф» къэлэпчъэIутхэр: С. Кожубекова – 1, Баскакова; ешIакIохэр: Клименко – 3, Краснокутская – 5, Серадская – 2, А. Морозова – 5, Богданова – 7, Измайлова – 2, Казиханова – 2, Кобл – 4, Стрельцова – 1.

Апэрэ зэIукIэгъур 36:29-у къа­лэу Уфа щаухыгъ. ЯтIонэрэ ешIэгъоу Мыекъуапэ щыкIуагъэр къызэрыкIоу щытыгъэп. Я 42-рэ такъи­къым пчъагъэр 24:16 хъугъэ. Ащ ыуж гушIуагъуи, гумэкIи зэIукIэгъум къызыдахьыгъэх. Я 50-рэ такъикъ: 28:24-рэ, такъикъи 2 къэнагъэу 30:25, 31:26-рэ.

Е. Краснокутскаям хъагъэм Iэгуаор редзэ – 31:26-рэ. «Уфам» иешIакIоу М. Тарасовам тикъэлапчъэ Iэгуаор къыдедзэ – 31:26-рэ, зэIукIэгъур аухынкIэ къэ­на­гъэр нэгъэупIэпIэгъуи 10. И. Из­майловам ухъумакIор ыгъэплъэхъуи, пчъагъэр зэри­хъокIыгъ – 32:26-рэ.

«Адыифыр» зэнэкъокъум щы­лъыкIотэным фэшI джыри зэ хъа­гъэм Iэгуаор ридзэн фэягъ, ау уахътэ щыIэжьыгъэп.

ЕплъыкIэхэр

— ТикъэлэпчъэIутэу Светлана Кожубековар ешIэкIо анахь дэ­гъоу зэIукIэгъум къыщыхахыгъ, — къытиIуагъ «Адыифым» итренер шъхьа­Iэу Никита Голуб. — ЯтIонэрэ едзыгъор едгъэжьэгъэ къодыеу Светлана Кожубековам шъобж къытыращи, ешIапIэм икIыжьыгъ, ар тиклуб къегоуагъ. Тиспортсменкэхэр дэгъоу ешIагъэхэу сэлъытэ, Iэгоуи 9 — 10-кIэ «Уфам» ыпэ титэу уахътэ къыхэкIыгъ. Гум къео ащ фэдэ кIэух ешIэгъум зэрэфэхъугъэр.

«Адыифыр» Уфа зыщешIэм ухъумэн Iофыгъохэр зэригъэцэкIагъэ­хэм уигъэрэзэнэу щытэп. Мыекъуапэ щыкIогъэ зэIукIэгъуми ащ фэдэ щыкIагъэхэр фэхъугъэх.

ЖъоныгъуакIэм и 8-м «Адыифыр» Москва щыIукIэщт «Лучым», ятIонэрэ ешIэгъур жъоныгъуакIэм и 14-м зэнэкъокъур Мыекъуапэ щыкIощт. ТекIоныгъэр зыхьырэм я 11-рэ чIыпIэр суперлигэм къыщыдихыщт.