2021-рэ илъэсым мэлылъфэгъум и 29-м къашъом и Дунэе мафэ фэгъэхьыгъэ Iофтхьабзэу «Культурный хоровод» зыфиIорэр Адыгеим ипсэупIэхэм зэкIэми ащыкIощт. Ащ къыдыхэлъытагъэу зэхащэщт концертхэм республикэм щызэлъашIэрэ цIыфхэр ахэлэжьэщтых. «Удж-хъурай» зыфиIорэ къашъомкIэ мэфэкI Iофтхьабзэр зэфашIыжьыщт.

Тэхъутэмыкъое районым инароднэ ансамблэу «Адыги» зыфиIорэм къуаджэу Очэпщые дэт культурэм и Унэ концерт къыщитыщт. Лъэпкъ фольклор-этнографическэ ансамблэу «Ащэмэзыр» къуа­джэу Фэдз кIощт. Лъэпкъ творчествэм изаслуженнэ купэу «Мыекъуапэ инэфылъхэр» зыфиIорэм Джэджэ районым дэт культурэм и Унэ концерт къыщитыщт.

АР-м культурэмкIэ и Министерствэ къызэрэщаIуа­гъэмкIэ, лъэпкъ проектэу «Культура» зыфиIорэм къыдыхэлъытагъэу гъэцэкIэжьынхэр зыщыкIогъэ учреждениехэм къашъом и Мафэ фэгъэхьыгъэ мэфэкI Iофтхьабзэхэр ащызэхащэщтых.