Я X-рэ Гъэмэфэ Спартакиадэм хэлэжьэщтхэм якъыхэхын фэгъэхьыгъэ зэнэкъокъур дзюдомкIэ Мыекъуапэ щыкIуагъ.

Адыгэ Республикэм щыпсэурэ кIалэхэу 2002 – 2004-рэ илъэсхэм къэхъугъэхэр алырэгъум щыбэнагъэх.

Яонтэгъугъэхэм ялъытыгъэу апэрэ чIыпIэхэр къыдэзыхыгъэ­хэм шъуащытэгъэгъуазэ. Шыбзыхъу Алый, кг 55-рэ, тренерыр Нэпсэу Бислъан, Юрий Балаян, кг 66-рэ, Григорий Саакян, кг 81-рэ, тренерыр Сергей Шутов, Алалэ Азэмат, кг 73-рэ, тренерыр Джарымэкъо Рустам, Ваган Григорян, кг 90-рэ, тренерыр Роман Оробцов, Бэгъ Аслъан, кг 100, тренерыр Беданыкъо Рэмэзан.

Адыгэ быракъым и Мафэ зэнэкъокъур республикэм дзюдомкIэ испорт еджапIэу Кобл Якъубэ ыцIэ зыхьырэм щызэхащагъ. ЕджапIэм ипащэу, Адыгэ Республикэм изаслуженнэ тренерэу Бастэ Сэлымэ республикэм и Къэралыгъо быракъ лъэпкъхэр зэрэзэфищэхэрэр, ащ тарихъ гъэшIэгъон зэриIэр къафиIотагъ. БэнакIохэм Урысыем ия X-рэ Гъэмэфэ Спартакиадэ гъэхъагъэ­хэр щашIынэу къяджагъ.

ЖъоныгъуакIэм Къыблэм изэнэкъокъоу Ермэлхьаблэ щыкIощтым Адыгеим ибэнакIохэр хэлэжьэщтых, адыгэ быракъыр зэIукIэгъум щагъэбыбэтэщт. Апэрэ чIыпIэхэр къыдэзыхыгъэхэр Урысыем щыпсэурэ лъэпкъхэм якIэух Спартакиадэ хэлэжьэщтых.