Адыгэ быракъым и Маф
Къэралыгъо гъэпсыкIэр егъэпытэ
Адыгэ Республикэм и Къэралыгъо быракъ и Мафэ фэгъэхьыгъэ мэфэкI зэхахьэр игъэкIотыгъэу Мыекъуапэ щыкIуагъ.
Республикэм и Къэралыгъо филармоние мэфэкIым диштэу зэIухыгъ. ЧIэхьапIэм дэжь нэрылъэгъу IэпыIэгъухэр къыщызэIуахыгъэх. Адыгэ Республикэм и Къэралыгъо быракъ исурэт кIэракIэу къызыщылъэгъорэ пхъэмбгъум ыпашъхьэ уцухэзэ, нэбгырабэмэ нэпэеплъ сурэтхэр зытырахых, мэфэкIым ехьылIэгъэ къэбархэр къаIуатэх.
МэфэкI зэхахьэр заублэм, Урысыем, Адыгеим якъэралыгъо гимнхэр филармонием щыIугъэх. Адыгэ Республикэм и Премьер-министрэ игуадзэу Сапый Вячеслав республикэм и ЛIышъхьэу КъумпIыл Мурат ыцIэкIэ къэзэрэугъоигъэхэм къафэгушIуагъ.
Адыгэ быракъым тарихъ гъогоу къыкIугъэм щыIэныгъэм мэхьэнэ ин зэрэщыриIэр, дунаим тет адыгэхэр зэрэзэфищэхэрэр, Адыгэ Республикэм и Къэралыгъо гъэпсыкIэ зэригъэпытэрэр хигъэунэфыкIыгъэх.
Адыгэ Республикэм и Къэралыгъо Совет — Хасэм и Тхьаматэ игуадзэу Шъао Аскэр, республикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан мэфэкI зэхахьэм къыщыгущыIагъэх.
Нэхъоим, зэзэгъыныгъэм, мамыр псэукIэм игъэпытэн республикэм и Къэралыгъо быракъ зэрафэгъэхьыгъэр къэгущыIагъэхэм ягупшысэхэм къащыхагъэщыгъ.
Тарихъым инэкIубгъохэр
Жъогъо 12-р, щэбзищыр къызыхэлыдыкIырэ уцышъо быракъым 1830-рэ илъэсым адыгэхэм языкIыныгъэ зэригъэпытагъэр, ащ тарихъэу пылъыр зэтыраIотыкIэу зэрэщытыр мэфэкI зэхахьэр зезыщагъэхэ Беданыкъо Замирэ ыкIи ОелI Адамэ къаIуагъ.
Уцышъомрэ жъуагъохэмрэ быслъымэн диным къыхэхыгъэхэу зымэ алъытэ. Я ХIХ-рэ лIэшIэгъум икъежьапIэ адыгэхэр зэрэзэхэтыгъэхэ лъэпкъ 12-м япчъагъэ жъуагъохэм къагъэнэфагъэу зылъытэхэрэр нахьыб. ЛIэкъо ыкIи лъэпкъ быракъ зэфэшъхьафхэр адыгэмэ яIагъэх. Арэу щытми, 1830-рэ илъэсым апэрэ быракъэу адыгэхэр зычIэуцуагъэхэр зэкIэмэ анахь лъапIэу хъугъэ. Ащ чIэтыхэ тилъэпкъэгъухэр адыгэ хэгъэгум фэбанэщтыгъэх.
МэфэкI концертыр
Адыгэ Республикэм и Къэралыгъо орэдыIо-къэшъокIо ансамблэу «Ислъамыем» мэфэкI концертыр къызэIуихыгъ. Лъэпкъ орэдыр ансамблэм къыIуагъ. «Пщыналъ» зыфиIорэр оркестрэм хэт пщынаохэм, жъыум фэгъэзагъэхэм гум рихьэу агъэжъынчыгъ.
ОрэдыIо цIэрыIоу Дзыбэ Мыхьамэт, шэны зэрэфэхъу-гъэу, лъэпкъ шIэжь орэдхэр къыIуагъэх.
Адыгэ Республикэм и Къэралыгъо филармоние и Къэралыгъо оркестрэу «Русская удалым» иартисткэу Анастасия Истамуловам урыс лъэпкъ орэдхэр мэкъэ IэтыгъэкIэ къыIуагъэх.
Къэрэщэе-Щэрджэсым, Адыгэ Республикэм язаслуженнэ артистэу ЛIыбзыу Аслъан лъэпкъ шIэжь орэдышъохэр пщынэмкIэ зэхытигъэхыгъэх.
КIэлэцIыкIу ансамблэу «Мыекъуапэ инэфылъэхэм» якъашъуи тигъэгушIуагъ. КIэлэеджакIохэр дахэу фэпагъэх, жьы акIэтэу мэуджых. КIэлэцIыкIу лъэпкъ орэдыIо ансамблэу «Долинэм» узыIэпещэ. МэфэкIым диштэу лъэпкъхэр зэфэзыщэрэ орэдхэр кIалэхэм, пшъашъэхэм гум рихьэу къызэдаIуагъэх. Тхьабысымэ Умарэ ыусыгъэу «Сикъуаджэр» къызыхадзэм, залым чIэсхэр Iэгу афытеуагъэх. «Долинэм» орэд къыIогъэ къодыеп, адыгэ къашъохэри къышIыгъэх.
Ансамблэу «Ащэмэзым» лъэпкъ орэдхэм, Мыекъуапэ искусствэхэмкIэ икIэлэцIыкIу еджапIэу N 1-м, «Ошъадэм» иорэдыIоу Цышэ Зарет, ансамблэу «Ошъутенэм» иорэдыIохэм тагъэгушIуагъ. Художественнэ амалхэр агъэфедэхэзэ, искусствэм ибаиныгъэхэм концертыр къагъэдэхагъ.
Композиторэу Анзорыкъо Чеслав ыусыгъэ орэдэу «Адыгэ быракъыр» Беданыкъо Замирэ къыхидзи, ансамблэхэм ахэтхэм адыгэ быракъхэр орэдым диштэу агъэбыбэтагъэх.
Адыгэ Республикэм и Къэралыгъо академическэ ансамблэу «Налмэсым» лъэпкъ къашъоу «Адыгэ уджхэр» къышIыгъэх. Артистхэм якъашъорэ яшъуашэрэ зэдиштэхэу пчэгум къашъор дахэу къыщагъэлъэгъуагъ.
Агу рихьыгъ
Къэзэкъхэм, ермэлхэм, къэндзалхэм, нэмыкIхэм яобщественнэ движениехэр зэхахьэм хэлэжьагъэх. Адыгэ Хасэм хэтэу ХъокIон Хьамедэ Еджэркъуае къырихыгъэ быракъыр мэфэкIым щигъэбыбэтагъ. СтIашъу Юрэ, МэщфэшIу Нэдждэт, Ольга Гавшинам, Кушъу Светланэ, Къуижъ Къэплъан, Едыдж Мэмэт, ЦIыкIушъо Аслъан, Къулэ Мыхьамэт, ЛIымыщэкъо Рэмэзан, Хьакъуй Аслъан, Тэу Аслъан, Шъхьэлэхъо Аскэр, нэмыкIхэм якIэух зэдэгущыIэгъу зэфэхьысыжьхэр щашIыгъэх. Лъэпкъхэр зэфэзыщэрэ мэфэкIым зызэриушъомбгъурэр хагъэунэфыкIыгъ, артистхэм лъэшэу афэразэх.
ЕмтIылъ Нурбый.