ТелефонкIэ къатыгъ. Урысыем иныбжьыкIэхэм дзюдомкIэ язэнэкъокъу мэлылъфэгъум и 21-м Ермэлхьаблэ щырагъэжьагъ.

2001 – 2003-рэ илъэсхэм къэхъугъэ кIалэхэр зэIукIэгъухэм ахэлажьэх. Урысыем ишъолъыр 45-мэ ябэнэкIо 345-рэ мэфи 4-м зэнэкъокъущтых. Федеральнэ шъолъыри 8-мэ, Москва, Санкт-Петербург спортсменхэр къарыкIыгъэх.

Адыгэ Республикэм ихэшыпыкIыгъэ командэ хэтэу ЦIыкIушъо Асхьадэ, кг 55-рэ, апэрэ мафэм бэнагъэхэм ащыщ.

Джыракъые щапIугъэ нарт шъаом ящэнэрэ чIыпIэр хэгъэгум къыщыдихи, джэрзыр къыфагъэшъошагъ. Дышъэр зыхьыгъэр С. Богословских, Свердлов хэкум щыщ. Санкт-Петербург ибэнакIоу Д. Корчемкиным тыжьыныр къыдихыгъ, Краснодар краим зыщызыгъэсэрэ А. Царевыр ящэнэрэ хъугъэ.

Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлымэ къытиIуагъ зэнэкъокъур гъэшIэгъонэу зэрэкIорэр. Тиреспубликэ щыщ ныбжьыкIэхэр медальхэм афэбанэх.

Тренерэу Хьакурынэ Дамир, ащ ыгъэсэрэ бэнакIоу ЦIыкIушъо Асхьадэ тафэгушIо.