Хэгъэгум гандболымкIэ ихэшыпыкIыгъэ бзылъфыгъэ командэ дунаим изэнэкъокъу хэлэжьэным фэшI пэшIорыгъэшъ зэIукIэгъухэр иIагъэх.

Апэрэ ешIэгъур

Тыркуер – Урысыер – 23:35 (12:19).

Мэлылъфэгъум и 16-м зэIу­кIэгъур Тыркуем щыкIуагъ.

ТихэшыпыкIыгъэ командэ хэтэу Дарья Дмитриевар ешIакIохэм къахэщыгъ, къэлапчъэм Iэгуаор гъогогъуи 6 дидзагъ.

ЯтIонэрэ зэIукIэгъур

Урысыер – Тыркуер – 45:24 (24:13).

Мэлылъфэгъум и 20-м Москва щызэдешIагъэх.

Самохинам гъогогъуи 7, Фоминам, Манагаровам, Скоробогатченкэм, Горшковам, Кирдяшевам плIырыплIэ хъагъэм Iэ­гуа­ор радзагъ.

Мыекъуапэ щыщэу Виктория Калининар къэлэпчъэIутэу зэIукIэгъухэм ахэлэжьагъ, цыхьэшIэгъоу ешIагъ.

Урысыем ихэшыпыкIыгъэ гандбол бзылъфыгъэ командэ Токио щыкIощтхэ Олимпиадэ джэгунхэм мыгъэ ахэлэжьэнэу фитыныгъэ къыдихыгъ.

2021-рэ илъэсым тыгъэгъазэм и 2 – 19-м дунаим изэнэкъокъоу Испанием щыкIощтым хэлэжьэнэу фитыныгъэ къызэрэдихыгъэм фэшI тиешIакIохэм, тренерхэм тафэгушIо.