Къэбэртэе-Бэлъкъарым исурэтышI цIэры­Iоу Мэзлэу Руслъан иIофшIагъэхэм якъэгъэ­лъэ­гъон Мыекъуапэ къыщызэIуахыгъ.

КъокIыпIэм щыпсэурэ лъэпкъ­хэм я Къэралыгъо музей Темыр КавказымкIэ икъутамэу Адыгэ Республикэм икъэлэ шъхьаIэ щыIэм къыщызэIуахыгъэ къэгъэ­лъэгъоныр искусствэм идунэе шапхъэхэм адештэ.

Музеим ипащэу, Урысыем, Адыгеим, Ингушетием культу­рэмкIэ язаслуженнэ IофышIэу ШъэуапцIэкъо Аминэт зэхахьэр зэрищагъ. Ащ ипэублэ гущыIэ зэкъош республикэхэр искусствэм зэрэзэфищэхэрэм фэ­гъэхьыгъагъ.

Адыгэ Республикэм культу­рэмкIэ иминистрэу Аулъэ Юрэ къызэгущыIэм, Мэзлэу Руслъан иIэпэIэсэныгъэ осэ ин фишIыгъ.

— Къэбэртэе-Бэлъкъарым икъуаджэу Алтуб Мэзлэу Руслъан къыщыхъугъ. Сэри а къуа­джэм сыщыщ, — къыщиIуагъ зэхахьэм Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм икIэлэегъаджэу, сурэтышIэу, лъэпкъ IэпэIасэу ГъукIэ Замудин. — Руслъан ышна­хьыжъэу Эдуарди зэлъашIэрэ сурэтышI.

ЯшIушIагъэкIэ зэкъош рес­публикэхэм ямызакъоу, Урысыем ишъолъырхэм, тилъэпкъэ­гъу­хэр зыщыпсэурэ IэкIыб хэгъэгухэм ащызэлъашIэхэрэ Мэз­лэу зэшхэм З. ГъукIэр къа­­щытхъугъ, яIэпэIэсэныгъэ зэ­рэ­хагъахъорэм фэшI афэгу­шIуагъ, ижъырэ адыгэ музыкальнэ Iэмэ-псымэу къамылыр зэшитIуми язырызэу афигъэшъо­шагъ. Нэпэеплъ шIухьафтынымкIэ ГъукIэ Замудин адыгэ орэ­дышъор дахэу къыригъэIуагъ.

АР-м и Лъэпкъ музей ипащэу Джыгунэ Фатимэ, сурэтышIхэу Мэзлэу Эдуардрэ Руслъанрэ зэхахьэм къыщыгущыIагъэх.

ИIофшIагъэ нэрылъэгъу

«IорыIуатэ нахьи нэрылъэгъу», адыгэмэ аIо. Мэзлэу Руслъан иIофшIагъэ дахэу, купкI иIэу къыпфаIотагъэми, икъоу къыбгурыIощтэп. Ор-орэу уеплъын, къыбгурымыIорэм укIэупчIэн фае. Зэхэпхырэр пшIо­гъэшIэгъон хъуным пае сурэ­тышIым игумэкI-гупшысэхэм защыбгъэгъозэныр нахьышIу.

IутIэным хешIыкIы

Р. Мэзлэум иIофшIэн зырегъа­жьэм, пIуаблэр, нэмыкI ижъырэ адыгэ пкъыгъохэр зэришIыхэрэм гушIуагъо хигъуатэщтыгъ.

Ышнахьыжъ, искусствэм хэшIыкI фызиIэхэр къеушъыйхэзэ, сэнаущыгъэу хэлъыр лъигъэ­кIотэн фаеу бэрэ къыраIощтыгъ.

— Лъэпкъ сурэтэу пшIырэр цIыфым фэдэу ыбзэкIэ къэб­гъэгущыIэн фае, — къеIуатэ Мэзлэу Руслъан. — Апэу щэIагъэ къызыхэбгъэфэным имэхьани къыбгурымыIо хъущтэп.

ЗэлъашIэрэ сурэтышI-модельерэу СтIашъу Юрэ, шIэныгъэ­лэжьэу Унэрэкъо Рае, лъэпкъ IэпэIасэу, IофшIапIэу «НАН-м» ипащэу Нэгъуцу Аслъан, культу­рэм иIофышIэхэу Едыдж Вик­торие, Сихьаджэкъо Иринэ, Чэ­мышъо Асыет, фэшъхьафхэм Р. Мэзлэум исурэтхэм анахьэу къахагъэщыгъэр IутIэным пкъы­гъуабэ зэрэхишIыкIырэр ары.

Къэбэртэе-Бэлъкъарым щызэлъашIэрэ орэдыIоу Ташло Алый мэлылъфэгъум и 30-м АР-м и Къэралыгъо филармоние щыкIощт концертым хэлэ­жьэнэу зегъэхьазыры. Артист цIэрыIор музеим къэкIуагъ, игуа­пэу къэгъэлъэгъоным еплъыгъ.

Бзэхэр зыщызэрагъэшIэрэ Гупчэу «Активым» ипащэу Едыдж Мэмэт къэгъэлъэгъоным еплъызэ, сурэтхэр шъо зэфэшъ­хьафхэмкIэ гъэкIэрэкIагъэхэу зэрэщытхэр къыхигъэщыгъ.

— Iофыр угу рихьэу, уфэ­шъыпкъэу улажьэ зыхъукIэ, къыбдэхъущтыр макIэп, — къы­тиIуагъ Адыгэ Республикэм изаслуженнэ сурэтышIэу Хъуажъ Рэмэзан. — Мэзлэу Руслъан иIофшIагъэ уапэкIэ уегъаплъэ. ПIуаблэкIэ ригъажьи, дунэе искусствэ лъагэм лъыIэсыгъ. Фэкъулаеу исэнэхьат дэлажьэ. IутIэным хэпшIыкIын плъэкIыщтыр тинэрылъэгъу.

— Руслъан иIофшIагъэ урегъэгупшысэ. IутIэным игъэфедэн хэшIыкI ин фыриI. Иакъыл хилъхьэзэ, шIыкIэшIухэр къе­гъотых, — къытиIуагъ Адыгеим исурэтышI цIэрыIоу Абрэдж Гощэфыжь.

Саугъэтым фэдэх

Унэшхо зэIухыгъэр, IофшIапIэр Мэзлэу Руслъан иIэшIа­гъэхэм къагъэдэхэщт. Саугъэтым фэбгъадэхэзэ, нэр пIэпахэу уяплъы.

Унэм идэпкъхэм сурэтхэр къякIущтых. Лъэпкъ тхыпхъэхэр, Iэмэ-псымэхэр иIэшIагъэхэм ахэолъагъох.

Угубжынышъ е зыбгъэгусэни IофшIэнэу ебгъэжьагъэр чIэб­дзыжьы зэрэмыхъущтыр Мэзлэу Руслъан исэнаущыгъэкIэ къыбгурегъаIо.

Зэпычыгъэ е цунтхъагъэ иIэшIагъэхэм ахэтлъагъорэп. IутIэныр мэстанэм рищыгъэу Iуданэм фэдэу сурэтым щыпхырещы, егъэIорышIэ, пкъыгъоу ышIырэм регъэкIу. Сурэтыр кIэракIэ, саугъэт теплъэ иIэ къэзышIырэр сурэтышIым ыIапэхэр, игуетныгъ, игупшыс.

IутIэныр сурэт ышIыным, зыфэе пкъыгъор хишIыкIыным ыпэкIэ темэным е нэмыкI чIыпIэу къызыщыкIырэм Р. Мэз­лэум къыщеугъои, IофшIэным фегъэхьазыры.

Р. Мэзлэум колледжыр, университетыр Налщык къыщиухыгъэх. ПIуаблэр зэришIыщт шIы­кIэм янэ фигъэсагъ. Гум къыхихыгъэ сэнэхьатым рылажьэзэ, дунаим цIэрыIо щыхъугъ. Къэ­бэртэе-Бэлъкъар къэралыгъо университетым щырегъаджэх.

Опсэу, зыIапэ дышъэр пы­зырэ Руслъан! О уишIушIагъэ те­гъэгушхо. ЩыIэныгъэм щыпхырыпщырэ лъэпкъ гъогур ду­наим щашIэ.

Къэгъэлъэгъоныр жъоны­гъуа­кIэм и 21-м нэс музеим щыкIощт.

ЕмтIылъ Нурбый.