Мэлылъфэгъум и 20-м Урысыем ибзылъфы­гъэ­хэм кушъхьэфэчъэ спортымкIэ язэнэкъокъу Адыгэ Республикэм щырагъэжьагъ.

Апэрэ мафэм Мыекъопэ районым ипсэупIэу Каменномостскэм щырагъажьи, Лэгъо-Накъэ екIурэ гъогухэм зэнэкъокъур ащылъагъэкIотагъ.

Дышъэр, тыжьыныр къытфахьыгъэх

Километри 109-рэ хъурэ гъогур купым хэтхэу спортсменкэхэм къакIугъ. ХагъэунэфыкIырэ чIыпIэхэр зыхьыщтхэр язэрэмыгъа­шIэу яухьазырыныгъэ къэзыгъэ­лъэгъуагъэхэм Адыгэ Респуб­ли­кэм зыщызыгъасэхэрэр ащыщых.

Урысыем ихэшыпыкIыгъэ коман­дэ хэтэу, Адыгеим испорт­сменкэ цIэрыIоу Елизавета Ошурковам гъогу къиныр къызэринэкIи, апэрэ чIыпIэр къыдихыгъ.

Адыгэ Республикэм испорт­сменкэу Гюнель Мехтиевам ятIо­нэрэ чIыпIэр къыхьыгъ. Санкт-­Петербург къикIыгъэ Маргарита Сыродоевам ящэнэрэ чIыпIэр фагъэшъошагъ.

— Дышъэр ыкIи тыжьыныр Адыгеим щыщхэм къызэрэдахыгъэм мэхьанэшхо иIэу тэлъытэ, — къытиIуагъ Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк. — Хэгъэгушхом тиспорт­сменкэхэр щызэлъашIэх.

Дышъэр, тыжьыныр къыдэзы­хыгъэхэ Елизавета Ошурковамрэ Гюнель Мехтиевамрэ егъасэх Адыгэ Республикэм изаслуженнэ тренерэу Алексей Войновым.

Шъолъыр 31-рэ хэлажьэ

Урысыем ишъолъыр 31-мэ ялIыкIохэр хэгъэгум изэнэкъокъу хэла­жьэх. Спортсменки 131-рэ ха­гъэу­нэфыкIырэ чIыпIэхэм афэбанэ.

Быракъым и Мафэ фагъэхьы

— Адыгэ Республикэм икъэра­лыгъо быракъ и Мафэ мэ­лылъ­фэгъум и 25-м хэдгъэунэфы-кIыщт, — тизэдэгущыIэгъу лъегъэкIуатэ Анатолий Лелюк. — Адыгеим испортсменкэхэм хэ­гъэгум изэнэкъокъу гъэхъа­гъэу щашIырэр Адыгэ Республикэм ибыракъ и Мафэ фагъэхьы.

Хабаровскэ, Самарэ, Башкирием, Татарстан, Москва, Санкт­Петербург, Краснодар краим, Адыгеим, фэшъхьафхэм яныбжьыкIэхэр мэлылъфэгъум и 25-м нэс тиреспубликэ щызэнэкъо­къущтых.

Илъэс 15 — 16 зыныбжь пшъа­шъэхэр, кIалэхэр мэфэ заулэм къыкIоцI зэIукIэгъухэм ахэлэжьэщтых.

Адыгеим икъушъхьэхэр, мэз­хэр, псыхъохэр дахэх. Жьыр щыкъабз. Спорт зэнэкъокъухэр гъэшIэгъонэу щызэхащэх. Рес­публикэм щыпсэурэ лъэпкъхэр гуфэбэныгъэ ахэлъэу хьакIэхэм апэгъокIых.

Гъатхэм идэхэгъу Адыгеим щы­­зэхащэгъэ зэнэкъокъум хэла­жьэхэрэм гъэхъагъэхэр спортым щашIынхэу, ямурадхэм афэ­кIон­хэу афэтэIо. ШъунаIэ тешъудз:

Илъэс 15 — 16 зыныбжь пшъа­шъэхэр мэлылъфэгъум и 21-м зэнэкъокъугъэх. Мэлылъфэгъум и 22-м илъэс 15 — 16 зыныбжь кIалэхэри, пшъашъэхэри зэIукIэгъухэм ахэлэжьэщтых.