Лъэпкъхэр зэфэзыщэрэ мэфэкI

Мэлылъфэгъум и 25-р — адыгэ быракъым и Маф. Ащ фэгъэхьыгъэу дзюдомкIэ зэнэкъокъу республикэм испорт еджапIэу Кобл Якъубэ ыцIэ зыхьырэм щызэхащагъ.

ЕджапIэм изэIухыгъэ зэнэ­къокъу бэнэкIо 70-рэ хэлэжьагъ. Шъачэ, ТIуапсэ, Краснодар, Ставрополь, Новокубанскэ, Новочеркасскэ, Мыекъуапэ защызыгъасэхэрэр апэрэ чIыпIэхэм афэбэнагъэх. Илъэс 18 зыныбжьхэм ыкIи нахьыжъхэм алырэгъум яIэпэIэсэныгъэ къыщагъэлъэгъуагъ.

Адыгэ быракъым и Мафэ фэгъэхьыгъэ зэнэкъокъур рагъэжьэным ыпэкIэ Урысыем, Адыгеим ягимнхэр зэхахьэм щыIугъэх. Хэ­гъэгумрэ республикэмрэ ябыракъхэр щаIэтыгъэх.

Спорт еджапIэм ипащэу, ­Адыгэ Республикэм изаслуженнэ тренерэу Бастэ Сэлым зэнэкъо­къум хэлажьэхэрэм къафэгу­шIуагъ. Республикэ общественнэ движениеу «Адыгэ Хасэм» итхьа­матэу, СССР-м изаслуженнэ тренерэу Кобл Якъубэ ыгъэса­гъэхэм ащыщэу, самбэмкIи, дзю­домкIи СССР-м спортымкIэ имастерэу ЛIымыщэкъо Рэмэзан зэIукIэгъум къыщыгущыIагъ.

Республикэ быракъым и Мафэ дгъэмэфэкIыным Адыгэ Хасэр кIэщакIо зэрэфэхъугъэр, тилъэпкъэгъухэр зыщыпсэухэрэ хэгъэгу­хэм адыгэ быракъыр зэращыбыбатэрэр, республикэм ис лъэпкъ­хэр адыгэ быракъым зэрэзэфищэхэрэр Р. ЛIымыщэкъом хигъэу­нэфыкIыгъэх. Зэнэкъокъум анахь лъэшхэр щытекIонхэу бэнакIохэм къяджагъ.

Бэнэгъухэр

Пшъашъэхэри кIалэхэри алырэгъум гъэшIэгъонэу щыбэнагъэх. Къыблэм, Урысыем яхэшыпыкIыгъэ командэхэм ахэтхэр медальхэм афэбэнагъэх.

Апэрэ чIыпIэхэр къыдэзыхыгъэхэр: Шаталова Татьяна, кг 52-рэ, Мыекъуапэ щыщ, Карекян Кристина, кг 57-рэ, Шъачэ, Симонян Лариса, кг 63-рэ, Новокубанск, Кафанова Вероника, кг 63-м къехъу, Ставрополь.

Хъулъфыгъэхэм язэнэкъокъу щытекIуагъэхэр: Балахмедов За­мир, кг 60, Ставрополь, Ацумыжъ Азэмат, кг 66-рэ, ТIуапсэ, Джарымэкъо Долэт, кг 73-рэ, Мые­къуапэ, Колесник Александр, кг 81-рэ, ТIуапсэ, Датхъужъ Алый, кг 90-рэ, Мыекъуапэ, Акопян Вардкез, кг 90-м къехъу, Мые­къуапэ.

ГущыIэгъу тызыфэхъугъэхэ бэ­накIохэу Ацумыжъ Азэмат, ­Вардкез Акопян, Датхъужъ Алый, нэ­мыкIхэм зэнэкъокъур агу ри­хьыгъ.

Зэнэкъокъум исудья шъхьаIэу, Урысыем спортымкIэ дунэе класс зиIэ имастерэу ШъэоцIыкIу Рус­там, тренерхэу Беданыкъо Рэ­мэзан, Роман Оробцовыр, Бе­да­ныкъо Байзэт, Мерэм Саидэ, Хьакурынэ Дамир, фэшъхьафхэри спортсменхэм аIукIагъэх, ягу­­къэкIыжьхэр къаIотагъэх.

— Тренерхэр, спортсменхэр зэнэкъокъухэм ахэлэжьэнхэу гъо­гу зытехьэхэкIэ, адыгэ быра­къыр зыдаштэныр шэнышIу афэ­хъугъ, — къытиIуагъ Бастэ Сэлым. — Быракъыр агъэбыбатэзэ, нэпэеплъ сурэтхэр атырахых. Зэнэкъокъум хагъэунэфыкIырэ чIыпIэхэр къыщыдэзыхыгъэхэм медальхэр, щытхъу тхылъхэр аратыжьыгъэх.