Хэгъэгум волейболымкIэ иапшъэрэ лигэ ия 2-рэ куп хэт командэхэм язэIукIэгъухэр спорт Унэшхоу «Ошъутенэм» щыкIуагъэх.

Я 5 — 10-рэ чIыпIэхэм якъы­дэхын фэбанэхэрэр Мыекъуапэ щызэдешIагъэх. «Динамо-МГТУ-м» изэIукIэгъухэм шъуащытэгъэгъуазэ.

«Динамо-МГТУ-р», ЦОП Краснодар край, «Дагъыстан» Махачкала, «Тюмень» Тюмень хэку, «Грозный-2» Грозный, «Рос­тов-Волей» Ростов-на-Дону пчъагъэр 3:0-у атекIуагъ.

ПэшIорыгъэшъ ешIэгъухэм очко пчъагъэу командэхэм къащахьыгъэр зэнэкъокъум къыщалъытагъ.

ЧIыпIэхэр

1. «Динамо-МГТУ» — 85 2. «Дагъыстан» — 69 3. «Ростов-Волей» — 40 4. «Тюмень» — 38 5. «Грозный-2» — 19 6. ЦОП — 13.

Апшъэрэ лигэм ия 2-рэ куп «Волжанин» Кострома апэрэ чIыпIэр къыщыдихыгъ, очкоуи 105-рэ къыхьыгъ.

— ХагъэунэфыкIырэ чIыпIэхэм ащыщ къыдэтхын тымылъэкIы­гъэми, ешIэкIэ дэгъу къэдгъэ­лъэгъуагъ, — къытиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм. — ЕшIэкIо ныбжьыкIэхэм яIэпэIэ­сэныгъэ хагъэхъуагъ.