Муниципальнэ гъэпсыкIэ зиIэ «Адыгэкъалэ» терроризмэм пэшIуекIогъэнымкIэ икомиссие зегъэушъомбгъугъэ зэхэсыгъо бэмышIэу иIагъ. Терроризмэм зэрэпэуцужьыхэрэ, IэкIыб къэралыгъохэм къарыкIыгъэхэм зэдэлэжьэныгъэ зэрадыряIэ шIыкIэм мыщ щытегущыIагъэх.Зэхэсыгъом хэлэжьагъэх Адыгэкъалэ иадминистрацие ипащэ иапэрэ гуадзэу Гъыщ Марат, народнэ депутатхэм якъэлэ Совет итхьаматэу ТIэшъу Аскэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, администрацием иотделхэм, икъулыкъухэм япащэхэмрэ яспециалистхэмрэ, къалэмрэ республикэмрэ яхэбзэухъумэкIо къулыкъухэм, общественнэ организациехэм ялIыкIохэр.

Адыгэкъалэ ипащэ иапэрэ гуадзэу Гъыщ Марат лъэпкъ, дин зэфыщытыкIэхэр муниципальнэ образованием щыгъэпытэгъэнхэмкIэ чIыпIэ зыгъэIорышIэжьынымкIэ къулыкъухэм Iофэу ашIэрэм къытегущыIагъ. Ащ зэхэсыгъом зэрэщыхигъэу­нэфыкIыгъэмкIэ, лъэпкъ зэгурыIоныгъэм игъэпытэн тегъэ­псыхьагъэу ямуниципальнэ образование Iофтхьэбзэ зэфэшъхьафхэр щызэрахьэх, лъэпкъ зэфэшъхьафхэм къахэкIыгъэ, дин зэтемыфэхэр зылэжьырэ кIэлэцIыкIуишъэ пчъагъэхэр гурыт еджапIэхэм, нэмыкI учреждениехэм мафэ къэс якIуа­лIэх. Урысыем щыпсэурэ лъэпкъ­хэм ягушъхьэлэжь байныгъэ зыкъегъэIэтыгъэнымкIэ творческэ купхэр дунэе, урысые, республикэ фестивальхэмрэ зэнэкъокъухэмрэ зэрахэ­лажьэхэрэм мэхьанэшхо иI.

Гъыщ Марат зэрэхигъэунэфыкIыгъэмкIэ, Темыр Кавказым инэмыкI чIыпIэхэм ялъытыгъэ­мэ, лъэпкъ зэфыщытыкIэхэр ямуниципальнэ образование щыдэйхэп. Адыгабзэмрэ лъэпкъ хабзэмрэ якъэухъумэн тегъэ­псыхьэгъэ программэ гуадзэу «Убзэ зэгъашIэ, уилъэпкъ гъэлъапIэ» зыфиIорэр 2021-рэ илъэсым къызэрэхахыгъэр, ащ диштэу муниципальнэ зэнэкъо­къоу «Адыгэ пшъашъ» зыфиIорэр илъэс къэс зэрэзэхащэрэр, АР-м и Мафэ ехъулIэу адыгэ орэдыжъхэмрэ тхыдэIуа­тэхэмрэ яреспубликэ фестиваль зэхащэнэу зэрэрахъухьэрэр ащ къыIуагъ. Джащ фэдэу муниципальнэ образованием ипащэ дэжь нахьыжъхэм я Совет зэрэщызэхэщагъэми, лъэпкъ зэгурыIоныгъэмрэ зыпкъитыныгъэмрэ муниципалитетым къыщыухъумэгъэнхэмкIэ ащ хэтхэм Iофышхо зэрашIэрэми ар алъы­Iэсыгъ.

— 2021-рэ илъэсым иIоныгъо хэдзын зэфэшъхьафхэр зэрэщыIэщтхэм япхыгъэу зыныбжь имыкъугъэхэр зыхагъэлэжьэрэ Iофтхьэбзэ пчъагъэ шъолъыр заулэмэ зэращызэрахьагъэр къитымыдзэу блэттIупщы хъущтэп, — къыIуагъ Адыгэкъалэ ипащэ иапэрэ гуадзэ. – Администрациемрэ гъэсэныгъэ языгъэгъотырэ учреждениехэмрэ амал зэфэшъхьафхэр зэрахьащтых зыныбжь имыкъугъэхэр ащ фэдэ Iофтхьабзэхэм ахамыщэнхэм тегъэпсыхьагъэу.

Гъыщ Марат идоклад зытегущыIэхэ нэуж АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхэсыгъом къыщыгущыIагъ. Ащ ипсалъэ лъэпкъ, дин зэфэшъхьафхэр зэгурыIонхэмкIэ Адыгэ Республикэм иIофхэм язытет, радикальнэ ислъамым пэуцужьыгъэнымкIэ республи­кэмрэ Пшызэ шъолъыррэ ащы­псэурэ быслъымэнхэм я Дин­дэлэжьапIэ ипащэхэм зэдэлэжьэныгъэу дыряIэм афэгъэ­хьыгъагъ.

Комитетым итхьаматэ зэхэсыгъом къызэрэщыхигъэщыгъэм­кIэ, мыкоммерческэ организацие 600-м ехъу тиреспубликэ щызэхэщагъ. Ахэм ащыщэу 300-р — общественнэ объединениех, 87-р — дин организациех, 178-р — нэмыкI мыкоммерческэ организациех. АР-м ихэбзэухъумэкIо, икъэралыгъо хэбзэ къулыкъухэм, чIыпIэ зыгъэIорышIэжьынымкIэ икъулыкъухэм, общественнэ объединениехэм азыфагу зэдэлэжьэныгъэ дэгъу зэрилъыр ары зыпкъитыныгъэмрэ зэгурыIоныгъэмрэ республикэм къыщаухъу­мэнхэ, экстремизмэмрэ терроризмэмрэ апэуцужьынхэ языгъэлъэкIырэр.

Общественнэ движениеу «Адыгэ Хасэр», Пшызэ къэзэкъ обществэм МыекъуапэкIэ иотдел, республикэ общественнэ движениеу «Адыгеим ис славянхэм я Союз», Урысые общественнэ организациеу «Адыгеим ис ермэлхэм я Союз» иреспубликэ къутамэ, респуб­ликэ общественнэ организа­циеу «Къэндзалхэм ялъэпкъ-культурэ просветительскэ обществэу «Дуслык» зыфиIорэр, урымхэм яреспубликэ общественнэ организациеу «Арго» зыфиIорэр, чIыпIэ общественнэ организациеу «Мыекъуапэ дэс нэмыцхэм ялъэпкъ-культурэ автономие» илъэсыбэ хъугъэу шIуагъэ къы­тэу зэрэзэдэлажьэхэрэр, джащ фэдэу Азербайджан, Осетием, Дагъыстан, Чэчэным, Ингушетием къарыкIыгъэхэу тиреспуб­ликэ щыпсэухэрэми Комитетым гъусэныгъэ зэрадыряIэр ащ къыIуагъ.

Лъэпкъ зэфэшъхьафхэм ялIыкIохэр зыхэхьэрэ общественнэ организациехэм лъэпкъ зэфыщытыкIэхэмкIэ ыкIи дин объединениехэр зэгурыIонхэмкIэ АР-м и ЛIышъхьэ дэжь щызэхэщэгъэ Советми, АР-м и Общественнэ палати, нахьыжъхэм я Советэу АР-м и ЛIышъхьэ дэжь щызэхэщагъэми, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет иобщественнэ, иэкспертнэ советэу экстремизмэм зэрэпэуцужьыхэрэ информационнэ политикэр къыхэзыхырэми гъусэныгъэ пытэ адыряIэу Iоф ашIэ.

IэкIыб къэралыгъохэм къарыкIыхэрэр урысые обществэм хэгъэзэгъэгъэнхэр лъэпкъхэмкIэ Урысыем зэрихьэрэ къэралыгъо политикэм изы Iахьэу зэрэщытыр Комитетым итхьаматэ къыIуагъ.

Гъыщ Маратрэ Шъхьэлэхъо Аскэррэ къашIыгъэ докладхэм афэгъэхьыгъэу зэхэсыгъом къы­щы­гущыIагъэх общественнэ движениеу «Адыгэ Хасэм» итхьаматэу ЛIымыщэкъо Рэмэзан, Адыгэкъалэ гъэсэныгъэмкIэ игъэIорышIапIэ ипащэу Пчыхьа­лIыкIо Светланэ, АР-м лъэпкъ IофхэмкIэ, IэкIыб къэрал ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, чIыпIэ дин организацием ипащэу КIыкI Абрек.

Дин пащэм зэхэсыгъом къызэрэщиIуагъэмкIэ, быслъымэнхэм зэряпащэм елъытыгъэу экстремизмэ, терроризмэ нэшанэ зиIэ бзэджэшIагъэхэр зэрамыхьанхэм, ахэм ягъогупэ пыбзыкIыгъэным ащ ренэу гъунэ лъефы, тапэкIи зэрэфэлъэкIэу ахэм ынаIэ атыригъэтыщт.

Муниципальнэ образованием терроризмэм пэшIуекIогъэнымкIэ икомиссие зэхэсыгъоу иIагъэм хабзэр амыукъоным, бзэ­джэшIагъэхэр зэрамыхьанхэм атегъэпсыхьэгъэ унашъохэр щаштагъэх, терроризмэм, экстремизмэм, радикализмэм апэуцужьыгъэнымкIэ, мамырныгъэр, зыпкъитыныгъэр, зэгурыIоныгъэр республикэм щыгъэ­пытэгъэнхэмкIэ пшъэрылъ гъэ­нэфагъэхэр ащафашIыгъэх.

Кушъу Аслъан.